San Mateo 4

In Amo Kuale Tlakatl okinekia kitlajtlakolmayawini in Jesús

(Mr. 1:12-13; Lc. 4:1-13)

1Satepan, in Espíritu Santo okiwikak in Jesús kan tlawaki kan diablo okinekia kitlajtlakolmayawini in Jesús.

2Okixikoj mach otlakuaj omenpoale tonale iwan omenpoale yuale, iwan satepan otiojsij. 3Ijkuakón, in tetlajtlakolmayaj owalaj inawak Jesús para kitlajtlakolmayawis, iwan okilwij:

―Tla melawak Tej titeKone de Dios, xikchiwa ma mokuepa pan in yinmej temej.

4Jesús okinankilij:

―In tiotlajkuilole kijta: “In tlakatl mach welis yolitos san ika tlakuale, sino noijki ika nochi tlajtole katlej Dios kijta.”

5Satepan, in diablo okiwikak in Jesús itech iweyikan in toTajtzin Dios, yen weyikan de Jerusalén, iwan okitlejkoltij ipan weyi tiopan. 6Iwan okilwij:

―Tla melawak Tej titeKone de Dios, ximotlamotla asta ipan tlale. Porke in tiotlajkuilole kijta:

Dios kinwaltitlanis iangelwan ma mitzpalewikan.

Mitzajkokuiskej ika inma,

para amo tikmomagati itlaj tetl itech mokxi.

7Jesús okilwij:

―Noijki in tiotlajkuilole kijta: “Amo xikyejyeko in Señor moDios para tikitas tlanon kichiwas.”

8Satepan, in diablo okiwikak in Jesús ipan se tepetl wejkapan, iwan okinmititij nochtin paismej de ixko yin tlaltikpak, iwan nochi tlan kipiaj. 9Iwan okilwij:

―Nochi in yin nimitzmakas, tla timotlankuaketzas iwan tinechweyikixtis.

10Tonses, Jesús okinankilij:

―Xitzinkisa, Satanás, porke in tiotlajkuilole kijta: “Xikweyikixti in Señor moDios, iwan sanwel Yej xiktekipano.”

11Ijkuakón in diablo okikajtej in Jesús, iwan owalajkej sekimej angelestin iwan okimonekuitlawijkej in Jesús.

Jesús opéj tekipanoa itech estado de Galilea

(Mr. 1:14-15; Lc. 4:14-15)

12Nijkuak Jesús okimatke nik in Juan Tlakuateekij okitzakej telpiloyan, ijkuakón Yej okiske de estado de Judea iwan oyáj itech estado de Galilea itech ipueblo Nazaret. 13Pero mach omokaj itech ipueblo Nazaret, sino yej oyáj ochantito itech oksé pueblo itoka Capernaum, katlej kajki itempan lago, iwan kajki itech región de Zabulón iwan de Neftalí. 14Ijkón otlapanok para ma mochiwa tlan okijkuiloj in profeta Isaías:

15Tlale de Zabulón iwan tlale de Neftalí,

ojtle katlej panotok itempan lago, ik ne lado de yen weyatl Jordán,

tlale de Galilea kan chantij katlej mach judiojtin.

16Nochtin yonmej tlakaj katlej oyekaj ijtik tlatleyualotl okitakej se weyi tlanextle.

Opetlanke in tlanextle para katlej

oyekaj itech iekawilo in mikilistle.

17Desde ijkuakón in Jesús opéj tetlapowia, iwan okijtoaya:

―Ximoyolpejpenakan (ximoyolkuepakan) de amotlajtlakol, porke yoajsiko in tonale para tlanawatis in Dios amonawak.

Jesús okinnotzke nawi michmajkej

(Mr. 1:16-20; Lc. 5:1-11)

18Jesús onejnentiaya itempan lago de Galilea. Okinmitak omen iknimej: Se itoka Simón, noijki kinotzaj Pedro, iwan oksé itoka Andrés. Okintlamotlatokaj inmichmatlawan ijtik atl, porke yejwan oyekaj michmajkej. 19Jesús okinmilwij:

―Namejwan anmichmajkej. Pero axan xiwikikan nowan, para ankintlapowiskej in tlakaj de notlajtol para ma momakixtikan kej yeskia ankinkitzkiskej michimej.

20San niman okinkajtejkej inmichmatlawan iwan oyajkej iwan Jesús.

21Ok achitzin tlayakapan, Jesús okinmitak ok omen iknimej: Se itoka Santiago iwan oksé itoka Juan, itelpokawan in Zebedeo, katlej oyekaj iwan intaj itech se barko okintilichojtokaj inmichmatlawan. Iwan Jesús okinnotzke. 22Yejwan san niman okajtejkej inbarko iwan intaj, iwan oyajkej iwan Jesús.

Jesús okinmachtij miekej tlakaj

(Lc. 6:17-19)

23Jesús onemia itech nochi in estado de Galilea, otlamachtiaya itech intiopanwan in judiojtin. Otetlapowiaya de yen kuale tlajtole katlej temakixtia de kenik in Dios tlanawatia. Iwan okinpajtiaya in tlakaj de nochi kokolistle iwan de nochi kualolistle. 24Otlapoayaj de Jesús asta ik nowian (nian nepa) país de Siria. Iwan tlakaj okinwalwikiliayaj nochtin katlej okipiayaj nochi tlamantle de kualolistle iwan de kokolistle, katlej okipiayaj mach kuale ejekatl, katlej mimikij, iwan katlej wilanmej (temetlamej). Iwan Jesús okinpajtij nochtin. 25Oyayaj iwan Jesús miekej tlakaj de estado de Galilea iwan de se región kan oyekaj majtlaktle pueblojtin katlej okitokayotiayaj Decápolis. Noijki oyayaj miekej de weyikan de Jerusalén, de estado de Judea, iwan de ik ne lado de yen weyatl Jordán.

Actualmente seleccionado:

San Mateo 4: nhy

Destacar

Copiar