Lucas 21

Pi'õi mrotõ isibrob'õ, isõprubzé

Marcus 12.41-44

1Tawamhã Zezusi hã ma tô da'a'madâ, 'Re ihâimana u'âsi mono nhorõwa 'ri 'rãihâ ãma. Tame isibro pese norĩ hã ma tô a'madâ, tinhoprubzé te te nasi séme ré hã, danhoprubzé, da te 're iséme mono zéb 're. 2Tawamhã pi'õi mrotõ isibrob'õ hã ma tô duré 'madâ, maparane rob'uiprazé isapotore te te zai ré hã, ĩsurure da te ãma irob'uipra da hã. 3Tahawa te isiré 're inomro mono norĩ ma tinha, ãne:

— Tô sena wa za aima waihu'u za'ra wa'wa, ãne: Ã hã pi'õi mrotõ hã uburé danhipai u ma tisõ, tinhoprubzé hã. 4E marĩ wa. Da te isõmri za'ra hã isi'atarẽme si ma sõmri za'ra ni. Tazahã, õ hã sibrob õ nherẽ, uburé ma tô tisõ, aré ãma ihâimana da hã.

'Re ihâimana u'âsi mono nhorõwa 'ri 'rãihâ, za i'ri siprubzé

Mateus 24.1-2; Marcus 13.1-2

5Tawamhã nima norĩ isiré 're inomro mono norĩ hã ma tô tiwata za'ra 'ri 'rãihâ ãma, 'ri iwẽ uptabi na duré ẽtẽ na i'ri 'manharĩ wẽ na hã, duré 'Re ihâimana u'âsi mono ma 're idanhoprub za'ra mono zém na zama. Tahawa te Zezusi hã tinha, ãne:

6— Bâdâ te za iwa waptãrã, ã hã uburé za da te iprub za'ra da hã. Tawamhã ẽne hã sisisiwi simi'wara õ di za.

7Tahawa ma tô ãma siwi sadanha, ãne:

— Rowahutu'wa, e niwa te za uburé ãne hã tiromhâimana za'ra. E marĩ te za watobro, ãma iwaihu'uzéb da hã, oto iro'rutu na hã, ãne hã uburé iromhâimana za'ra zéb da hã.

8Tawamhã Zezusi hã ma tô tãma nharĩ za'ra, ãne:

— Ma'ãpé 're asi'madâ'â pese za'ra wa'aba mono, ni'wa hã te te aima rob'rãmi za'ra wa'aba tõ da. E marĩ wa. Da'ahâ uptabi na te za ĩnhisi na datẽme 're danomro. Ãne te za 're dasiwasu'u za'ra: “Wa hã Danho'reptui'wa” niwamhã duré ãne: “Bâdâ hã ma tô oto iwa waptãrã.” Ãne wamhã, da'ãma 're sasõmri za'ra wa'aba mono tõ. 9Dasi'wapéi wasu'u hã, duré danhib'apito norĩ zada 're idahâimana za'ra mono zé, da te 're isani za'ra mono wasu'u zama, 're wapari za'ra wa'aba mono wamhã, tãma 're aipahi za'ra wa'aba mono tõ. Tô i'ru zahi, imorĩ'rata na ãne hã iromhâimana za'ra da hã. Tane nherẽ, awa'awi rob'rãsutu õ di za a'â.

10Tawamhã ma duré ãma tãma uzusi za'ra, ãne:

— Dawamri mono bâ te za 're dasi'wapé za'ra. Duré ti'ai wa'õtõ nho'õmo 're roti'wa norĩ hã te za ihâiba amoi u roti'wa norĩ hã te te 're 'wapé za'ra. 11Nima niwĩmhã ti'ai popo isa'ẽne hã te za 're wairébé, duré mrab zépada hã, duré dahâzé waptu na za te te idaduri mono hã. Duré marĩ ipipa uptabi hã te za 're wairébé. Duré ãma iwaihu'uzéb da hã te za hâiwa nho're na marĩ isa'ẽne hã 're wairébé.

12— Tane nherẽ, uburé ãne hã romhâimana za'ra wana ré hã, te za da te 're aséme 'wa. Te za duré da te aima 're rob'manharĩ wasété za'ra wa'wa. Rowahutuzéb u te za da te 're asimroi wa'wa. Taha pari te za duré da te 're aséme 'wa, dazazéb re. Danhib'apito norĩ nho're u, te za da te 're asimroi wa'wa, duré roti'wa norĩ u zama. Ãne hã te za da te aima 're 'manharĩ za'ra wa'wa, ĩnhisi u'âbâ. 13Ãne wamhã, bâdâ te za aima 're hâimana za'ra wa'wa, ĩwasu'uwẽ na 're irob'mahârâ za'ra wa'aba mono zéb da hã, dama. 14Tahawa, õne haré asima 're waihu'u za'ra wa'aba mono, za 're inharĩ za'ra wa'aba mono zém na, 're aihâtâ'â za'ra wa'aba mono tõ da, asi'wawi za 're i'aimapa za'ra wa'aba mono zéb da hã. 15E marĩ wa. Wa hã 're i'aimreme zusi aba mono zéb da hã, wa za te aima 're anhomri 'wa, duré rowaihu iwẽ zama. Tawamhã asada 're ihâimana za'ra wa'aba mono norĩ hã siptete na te te 're ai'wapéi waihu'u za'ra wa'aba mono õ di za. Duré i'uptabi na wa, te te ãma 're asada'âbâ waihu'u za'ra wa'aba mono õ di za. 16Aimama norĩ hã te za te te dama 're aihâiba za'ré za'ra wa'wa, duré asisãnawã norĩ hã duré asiwadi norĩ hã, duré asiwaihu'u norĩ aba zama. Tawamhã nima norĩ asiré wa'wa hã, te za da te 're simro. 17Uburé te za da te 're ai'ruiwapari za'ra wa'wa, ĩnhisi u'âbâ. 18Tane nherẽ, aséré 'wa hã, si'manhimini waihu'u õ di za. 19Asiptete sina ĩ'ãma 're anomro u'âsi aba mono wap si, te za dahâimanazé isi'utõrĩ'õ hã asina 're i'uwaimrami za'ra wa'aba mo.

Zezusi hã, Zeruzalẽ za isiprubzém na te te inharĩzé

Mateus 24.15-28; Marcus 13.14-23

20Tawamhã Zezusi hã ma duré tãma waihu'u za'ra, ãne:

— Niwamhã Zeruzalẽ, dasi'wapéi 'manharĩ'wa norĩ te te siwi i'uirĩ na asiwi 'madâ'â aba wamhã, te za iwaihu'u za'ra wa'wa, za da te iprubzé hã oto tãma iro'rutu na hã. 21Tahawa, Zudéa ãma 're isi'ubumroi mono norĩ hã sisa'rei mono, simani za'ra da, ẽtẽ 'rãihâ u. Duré 'ri nho'õmo norĩ ãma 're isi'ubumroi mono norĩ hã ihawi wairébé. Duré rom na 're isi'ubumroi mono norĩ hã sisisi tõ, 'ri nho'õmo u hã. 22E marĩ wa. Ã hã bâtâ mono hã, dama rob'manharĩ wasété zéb ré, te za tihâimana za'ra, Ibaihâ Iwazé pese na rob'ui'éré isimi'wara siromo hã te te sina uwaimrami za'ra da. 23Taha bâtâ mono na hã, pi'õ iwasã ré norĩ ma hã ropipa uptabi di za, duré i'ra te te iwapsõmri ré norĩ ma zama! E marĩ wa. Sa'ẽtẽ na te za robzépata za'ra ni, taha bâtâ mono na hã. Duré 'Re ihâimana u'âsi mono nhimihâzé hã te za dazada tihâiba. 24Da'ahâ na te za ai'utõrĩ ni, sib'ézé 'wapa na hã. Duré ni'wam norĩ hã ti'ai wa'õtõ nho'õmo amoi u te za da te simro, pawasisi ré. Tawamhã Zudeu'õ norĩ hã te za siwi ti'â Zeruzalẽ hã, bâdâ tãma iwisi za'ra zé hã te te sina i'uwaimrami za'ra zéb u.

Ti'ai ãma Dasiré Ipodo, apâ za we imorĩzé

Mateus 24.29-31; Marcus 13.24-27

25Tawamhã Zezusi hã ma duré ãma uzusi, ãne:

— Marĩ hã te za 're wairébé, bâtâ na hã duré a'amo na hã duré wasi norĩ na zama, ãma iwaihu'uzéb da hã. Tawamhã duré ti'ai ãma hã uburé dapoto mono bâ te za dawi tirowaihu'u'õ pese za'ra za, dapahi te, â poré ruru'u ma, duré â poré sisasisi ma zama. 26Da'ahâ na te za dapahi te, 're danhimiza'rese'õ si'utõrĩ za'ra, niha za 're iromhâimana mono zém na, da te 're rosa'rata za'ra mono wa. E marĩ wa. Hâiwa na 're isimasa mono norĩ hã za oto sirési za'ra wa. 27Tawamhã Ti'ai ãma Dasiré Ipodo hã te za dasiwi 'madâ'â ni, hâiwa'a na apâ wei morĩ ré hã, waihu'u pese uptabi na duré ihâiba na rowa'a isa'ẽtẽ uptabi ré. 28Ãne hã iromhâimana za'ra zé sãna'rata za'ra wamhã, ma'ãpé asiptete u'âsi ĩ'ãma aihâimana za'ra wa'aba, asib'ru na, ato sina. Duré ai'rãi wahutu za'ra wa'aba, rob'umnhasi sina, 'Re ihâimana u'âsi mono hã romhutu na za oto te te asõ'reptu za'ra wa'aba wa.

Rob'rã figu wede na romnhimiré

Mateus 24.32-35; Marcus 13.28-31

29Tawamhã Zezusi hã te duré rowasu'u romnhimiré'é na, ãne:

— Ma'ãpé, ãma rosa'rata pese za'ra wa'aba, rob'rã figu wede na duré niwamhã aimawi rowede norĩ ãma zama. 30'Re su téb za'ra mono wamhã, te za iwaihu'u 'wa, tã ita'azéb u oto iro'rutu na hã. 31Tane duré, ãne hã marĩ 're iwairébé mono na 're 'madâ'â za'ra wa'aba mono wamhã, waihu'u za'ra wa'aba, 'Re ihâimana u'âsi mono da'ãma 're isib'a'uwẽ mono zé iwisizéb u oto iromhuture na hã. 32Tô sena wa ãne hã aima waihu'u za'ra wa'wa. Uburé ã hã iromhâimana mono zé hã te za tihâimana za'ra, ã bâtâ na dahâiba ré idahâimana za'ra hã dadâ'â za'ra õ ré. 33Hâiwa duré ti'ai me, te za ai'utõrĩ zahuré. Tane nherẽ, ĩmreme hã niwa si'utõrĩ waihu'u õ di za.

34Tawamhã Zezusi hã ma tô ãma 'rãsutu, ãne:

— Ma'ãpé, asimiza'rese sina 're aihâimana za'ra wa'aba mono! Dato na si 're ai'rãza'õtõ za'ra wa'aba mono tõ da. Duré niwamhã âzé na si 're asi'rãiwamnarĩ za'ra wa'aba mono tõ da, duré niwamhã ti'ai ãma ropire dahâimanazéb 're dama 're ihâimana za'ra mono na si, tô õ hã bâdâ hã za wisi wa, rosa'rese õ ré, aima wisi za'ra wa'aba tõ da. 35E marĩ wa. Ta hã za wisi wa, uburé ti'ai ãma 're idahâimana za'ra mono norĩ ma. 36Tahawa, ma'ãpé asimiza'rese sina 're aihâimana u'âsi za'ra wa'aba mono. Duré 're rowaptẽrẽ u'âsi za'ra wa'aba mono, uburé marĩ wi, 're asisõ'reptu za'ra wa'aba mono da, za 're iwairébé mono wi, duré hâiwi aimasa wa'aba da, Ti'ai ãma Dasiré Ipoto nho're, apâ wei morĩ wamhã.

37Zezusi hã bâtâ sidâpâsi ma tô te te dama 're rowahutu, 'Re ihâimana u'âsi mono nhorõwa 'ri 'rãihâ ãma hã. Tane nherẽ, 're mara mono wamhã, ma tô 're ne, Olivera na ẽtẽ 'rãihâ nhisi u, tame ãma 're awẽ mono da. 38Tawamhã awẽ wi, ma tô 're danomro, 'Re ihâimana u'âsi mono nhorõwa 'ri 'rãihâ u hã, da te 're wapari za'ra mono da.

Actualmente seleccionado:

Lucas 21: xavBP

Destacar

Copiar