Zuwã 5

Zezusi hã, aibâ ihi'ré te te ipesezé

1Ronomro parimhã, Zudeu norĩ te, dato isa'ẽne hã ma tô tihâiba. Tahawa Zezusi hã ma tô mo, Zeruzalẽ u. 2Tame â ubumrozé hã te 're hâimana, Pone'ẽrebâ na 'ridawa za'ẽtẽ nhisi 'ratamhã, imrotõ na 'ridawa itẽme dazasizé hã. Ta hã Ebreu norĩ mreme na hã “Betezata” na isisi hã. 3Dazasizéb 'ratamhã, te ahâ na 're simi'wara, ihâzé ré norĩ hã: Itob'a norĩ, i'rãtẽire norĩ, duré ihi'ré norĩ zama. [Ta norĩ hã te te 're sapari za'ra, â hã 're sirési mono da. 4E marĩ wa. Nimahã bâtâ na hã Uburé Danhib'apito ma hâiwa hawi romhuri'wa hã te te 're si'ra, â hã te te 're rési mono da. Tawamhã imorĩ'rata na ihâzé ré ni'wa te te si'rai wamhã, te 're pese za'ra, siwa'ru dahâzé ãma 're ihâimana za'ra mono hã.] 5Tawamhã dawazarimhã te aibâ ihâzé ré hã 're sa'wari, 38 na ãma iwahu, tihâzé te te 're sépata mono ré hã. 6Tawamhã Zezusi hã aibâ nomro ré, te te 'madâ'â wamhã, duré tihâzé te te 're sépata mono ré, ãma iwahub za'ẽtẽ na te te waihu'u pese wa, ma tô ãne sadanha:

— E aipese da hã te asima iwẽ.

7Tawamhã aibâ ihi'ré hã te tãma siwasu'u, ãne:

— Apito, ni'wai õ di, â 're sisasisi mono wa, ĩ'ãma isi'rai'wa da hã, â ubumrozéb u. Ĩzébré da ĩsi'wapéi ré hã, ihâiba amo norĩ hã te za ni'wa hã ãzé, ĩwana.

8Tawamhã Zezusi hã te tãma tinha, ãne:

— Ma'ãpé, aiwahutu. Asa'warizé hã âri, aimorĩ da oto!

9Tawamhã awa'awi pesere ma tô aibâ hã tipese. Tiza'warizé hã ma tô ti'â. Timorĩ na ma tô duré oto sãna'rata. Ãne hã sabadu na ma tô tiromhâiba. 10Tahawa, Zudeu norĩ ma roti'wa norĩ hã ma tô tãma nharĩ za'ra, ãne:

— Ãhã na hã sabadu. Tawamhã 'Re ihâimana u'âsi mono nhimiroti zahi na rob'ui'éré hã te te 'rui õ di, ã bâtâ na asa'warizé i'âri da hã.

11Tane nherẽ aibâ hã ma sada'âbâ za'ra, ãne:

— Aibâ ĩpese'wa hã te ãne ĩma tinha: “Asa'warizé hã âri, aimorĩ da oto.”

12Tahawa te siwi sadanha, ãne:

— E 'wa hã aibâ, ma tô aima ti'ru, asa'warizé hã âri da, duré oto aimorĩ da hã.

13Tane nherẽ, te te waihu'u õ di, ni'wa te te ipese na hã. E marĩ wa. Da'ahâ uptabi na idahâimana za'ra wa'wa u sébré wa, Zezusi hã.

14Tawamhã ronomro pari, Zezusi hã ma tô aibâ sõpẽtẽ, 'Re ihâimana u'âsi mono nhorõwa 'ri 'rãihâ ãma 'ri 'wawi wa'ra 're. Ãne te tãma tinha:

— Ma'ãpé, ĩwapari! Ãhã na hã ma tô oto aipe. Tahawa, 're aiwasété mono tõ oto, ãhã nhipai u marĩ ipipa uptabi hã oto ai'ãma hâimana tõ da.

15Tawamhã aibâ hã ma tô mo, Zudeu norĩ ma roti'wa norĩ u. Zezusi te te ipese na ma tô tãma siwasu'u za'ra. 16Tahawa, ta hawim haré Zudeu norĩ hã te oto Zezusi hã siwi sarẽ, sabadu na aibâ hã te te pese wa.

17Tawamhã te Zezusi hã tãma nharĩ za'ra, ãne:

— Ĩmama hã te zahadu ãwa bâtâ u hã te te 're romhuri. Tane, wa zahadu ĩzama te 're romhuri.

18Ãne wa, Zudeu norĩ hã te te oto siwi iwĩrĩ da si, sabadu hã te te wazéb õ wap si õ di oto. Tazahã 'Re ihâimana u'âsi mono hã Timama uptabi na te te wasu'u wa, isine ihâimana na siwasu'u wab zama.

Zezusi hã, Timama zadawa para, pire na 're ihâimana mono zé

19Tawamhã Zezusi hã te tãma rowasu'u za'ra, ãne:

— Tô sena, wa za aima waihu'u za'ra wa'wa, ãne: I'ra hã, sihawimhã marĩ te te 'manharĩ waihu'u õ di. Imama hã marĩ te te 're a'manharĩ mono ré, te te 're i'madâ'â mono zéb zarina si te za te te 're a'manharĩ. Uburé marĩ, Imama te te 're i'ab'manharĩ mono hã, te za I'ra zama te te 're a'manharĩ. 20E marĩ wa. Imama ma, I'ra hã sawi uptabi wa. Tahawa, te za uburé marĩ hã te te tãma 're ahâi'ré, te te 're i'ab'manharĩ mono hã. Ã norĩ nhipai u marĩ isa'ẽtẽ uptabi hã te za duré tãma hâi'ré za. Tawamhã te za ãma atob'uzu za'ra wa'wa za. 21Imama hã, 're idadâ'â za'ra mono apâ te te 're ida'ahâiwa'utu mono ne, duré dahâimanazé te te dama 're i'anhomri mono ne, tane te za duré I'ra hã dahâimanazé te te dama 're anhomri, te te sima 're ida'awẽ mono norĩ ma hã. 22Imama hã te te da'ãma 're arowairébé mono õ di. Ti'ra ma si, ma tô tisõ, te te da'ãma 're arowairébé mono da hã, 23I'ra hã uburé da te dasiwi 're wazé pese mono da, Imama hã da te dasiwi 're iwazé pese mono ne. Ni'wa hã I'ra te te wazéb õ wamhã, Imama zama te te duré wazéb õ di, we isatõrĩ'wa hã.

24— Tô sena wa za ãne hã aima waihu'u za'ra wa'wa: Ni'wa hã ĩnhimiroti te te wapari wamhã, duré we ĩzatõrĩ'wa hã te te sazei wamhã, dahâimanazé isi'utõrĩ'õ hã te za tãma 're hâimana. Duré ãma rowairébé hã hâimana õ di za. Tazahã, ma tô saprĩ dadâ'â hawi, dahâimanazé isi'utõrĩ'õ u. 25Tô sena wa za duré ãne hã aima waihu'u za'ra wa'wa: Bâdâ hã te za oto wi. Ta hã ma tô wi, idâ'â za'ra norĩ hã 'Re ihâimana u'âsi mono 'Ra mreme za te te iwapari za'ra zé hã. Tawamhã imreme te te iwapari za'ra norĩ hã, dâ'â ãna te za oto 're hâimana za'ra. 26Imama hã dahâimanazém na'rata nhomri'wa na te 're hâimana. Tane ma tô duré Ti'ra ma pisutu, dahâimanazém na'rata nhomri'wa na 're hâimana mono da. 27Tawamhã Ti'ra ma, ma tô pisutu, isadawa para te te da'ãma 're arowairébé mono da, ta hã Ti'ai ãma Dasiré Ipoto wa.

28— Tahawa, ãma atob'uzu za'ra wa'aba tõ, te aima irowasu'u za'ra wa'aba zém na hã. E marĩ wa. Bâdâ hã te za oto wi, uburé idâ'â za'ra norĩ hã Ti'ai ãma Dasiré Ipoto mreme te te iwapari za'ra da hã. 29Ta norĩ hã te za wairé, ti'ru hawimhã. Tawamhã ni'wam norĩ hã marĩ te te 're i'manharĩ wẽ za'ra mono hã te za tihâiwa'utu za'ra, 're hâimana u'âsi za'ra mono da oto, dâ'â ãna. Tazahã, marĩ te te 're i'manharĩ wasété za'ra mono hã hâiwa'utu za'ra pari, te za 'Re ihâimana u'âsi mono ta norĩ ma, tinhimihâzé hã pisutu za'ra.

Zezusi hã, Timama zadawa para datẽme 're imorĩ na isiwasu'uzé

30— Ĩsihawimhã, marĩ te 're a'manharĩ waihu'u mono õ di. Ĩmama te te ĩma 're i'rui mono zéb zarina si, wa te tô te dama 're arowairébé. Dahâimanazéb zarina te da'ãma 're i'arowairébé mono zé hã, i'uwaibaba na wa te te 're 'manharĩ. E marĩ wa. Te ĩsima iwẽzéb zarina, ĩsima sô 're ĩrĩtĩ mono õ di, marĩ te 're a'manharĩ mono da hã. We ĩzatõrĩ'wa te te sima 're iwẽ mono zéb zarina si, wa marĩ hã te 're a'manharĩ.

31— 'Râwi te dama ĩsina 're rowasu'u mono wamhã, marĩ dai õ di za, te 're irowasu'u mono zé hã. 32Tane nherẽ, daré hã ni'wa te te dama 're ĩwasu'u mono hã. Ta hã, tô sena te te 're ĩwasu'u mono na hã ĩma waihu'u pese di.

33— Aibâ norĩ hã Zuwãhã u ma tô isatõrĩ za'ra wa'wa, te te siwi sadanharĩ da. Tawamhã ta hã te te irowasu'u hã, tô sena uptabi. 34Ĩnhimnhasi õ di, ni'wa te te dama ĩwasu'u wẽ da hã. Tane nherẽ, ãne hã wa tô aima rowasu'u za'ra wa'wa, asõ'reptuzé hã asina uwaimrami za'ra wa'aba da. 35Zuwã hã rob'uiwẽzé, ro'o haré isam ne, ma tô 're hâimana. Tawamhã niha bâtâ na ma tô asima irowẽ za'ra wa'wa, te te 're irob'uiwẽ mono zém na hã. 36Tane nherẽ, ĩwasu'u isiptete uptabi hã te tihâiba, Zuwã te te dama 're ĩwasu'u mono nhipai u hã: Ta hã marĩ te 're i'a'manharĩ mono zé, Ĩmama te te ĩma i'ruzéb zarina. Ta hã marĩ te 're i'ab'manharĩ mono zé hã, te te 're ĩwasu'u wẽ. Duré ta hã ĩwaihu'uzé, Ĩmama we te te ĩzatõrĩ na hã. 37Duré Ĩmama we ĩzatõrĩ'wa hã te te 're ĩwasu'u wẽ. Taha mreme hã niwa wapari za'ra wa'aba õ di aipo're na hã. Duré niwa asiwi ubu 'madâ'â aba õ di. 38Isimiroti hã aipẽ'ẽ 'remhã aima hâimana za'ra wa'aba õ di, we te te isatõrĩ hã saze za'ra wa'aba õ wa. 39Ibaihâ Iwazé pese na rob'ui'éré na, te ãma 're iromnhoré pese za'ra wa'aba mo, dahâimanazé isi'utõrĩ'õ hã ãma aima 're hâimana za'ra wa'aba mono da newa. Ta hã Ibaihâ Iwazé pese na rob'ui'éré hã te tô ĩwasu'u. 40Tane nherẽ, asima wẽ za'ra wa'aba õ di, we ĩtẽme i'ai'aba'réi wa'aba da hã, dahâimanazé isi'utõrĩ'õ hã aima 're hâimana za'ra wa'aba mono da.

41— Ti'ai ãma 're idahâimana za'ra mono hã da te dasiwi 're ĩ'uzei wẽ mono da, sô 're ĩnhimipari mono õ di. 42Tazahã oto a norĩ wa'wa hã ĩma aihâimanazé waihu'u pese za'ra wa'aba di. Ĩma waihu'u pese di, 'Re ihâimana u'âsi mono, aima isawi za'ra wa'aba õ na hã, tô sena. 43Ĩmama zadawa para wa tô wei mo. Tane nherẽ, ĩzô atob'uzu za'ra wa'aba õ di. Tazahã, oto ni'wa hã sihawi wei morĩ wap si, te za sô atob'uzu za'ra wa'wa. 44E niha te za bété ĩzaze za'ra wa'wa, da te 're i'ai'uze za'ra wa'aba mono zé hã aima wẽ za'ra wa'aba nherẽ, duré asima sô 're asõpré wa'aba mono õ nherẽ, 'Re ihâimana u'âsi mono si te te 're ai'uzei wẽ za'ra wa'aba mono da hã. 45Ĩ'ãma rosa'rata za'ra wa'aba tõ, wa hã za te i'ai'awasu'u wa'aba na hã Ĩmama nho'remhã. Mozésihi si te za ai'awasu'u wa'wa, ta hã asiwi 're umnhasi aba mono wa. 46Mozési hã asiwi sazei wa'aba 'wa'âhã, te aré asiwi ĩzazei wa'wa. E marĩ wa. Ta hã ĩwasu'u na ma tô rob'ui'éré. 47Tane nherẽ, te te irob'ui'érézé hã asiwi sazei wa'aba õ wamhã, e niha te za bété asiwi ĩzazei wa'wa, te 're irowasu'u mono zém na hã.

Actualmente seleccionado:

Zuwã 5: xavBP

Destacar

Copiar