Zuwã 3

Zezusi hã, Nicodemosihi ma, te te irowahutuzé

1Aibâ hã te 're hâimana farizeu, Nicodemosi na isisi hã. Ta hã roti'wa, Zudeu norĩ ma hã. 2Tawamhã nimahã mara na Zezusihi u ma tô mo. Ãne te tãma tinha:

— Rowahutu'wa, wa tô aiwaihu'u za'ra ni, a hã rowahutu'wa 'Re ihâimana u'âsi mono we te te i'asatõrĩ na hã, e marĩ wa, ni'wa hã marĩ te te 'manharĩ waihu'u õ di, marĩ dama i'manharĩ waihu'u õ 're i'ab'manharĩ mono hã 'Re ihâimana u'âsi mono isiré hâimana õ wamhã.

3Tawamhã Zezusi hã ma ãma sada'â, ãne:

— Tô sena, wa za ãne aima waihu'u: Ni'wa hã poto téb õ wamhã, 'Re ihâimana u'âsi mono, da'ãma 're isib'a'uwẽ mono zéb ãma hã 're hâimana mono õ di za.

4Tahawa Nicodemosi hã ma tô ãma sadanha, ãne:

— E niha te za aibâ hã tipoto té, si'ihi nherẽ. E apâ te za ãzé tina di'i 're, duré poto téb da hã.

5Tawamhã Zezusi hã ma tãma waihu'u, ãne:

— Tô sena, wa za ãne aima waihu'u: Ni'wa hã 'Re ihâimana u'âsi mono, da'ãma 're isib'a'uwẽ mono zéb u hã, sébré õ di za, â na poto téb õ nherẽ, duré Ipẽ'ẽzani na. 6Ni'wa hã ti'ai ãma damama 'ra na poto wamhã, ti'ai ãma timama sipoto na te za tô 're hâimana. Tane duré, ni'wa hã 'Re ihâimana u'âsi mono Pẽ'ẽzani na poto té wamhã, te za oto ipẽ'ẽzani isi'utõrĩ'õ iwẽ ré 're hâimana. 7Tahawa a'rãmi tõ, te aima inharĩzé ma hã. E marĩ wa. Tô i'ru zahi, 're i'aipoto téb za'ra wa'aba mono da hã. 8Rowa'u hã te za rowapõ, te te sima iwẽzéb zarina. Wapari pibui pese di, te te irobruru'uzé hã. Tane nherẽ, waihu'u õ di, nima hawi isãna'ratazé hã duré nimomo i'rãsutuzé hã. Tane te duré 're romhâimana 'Re ihâimana u'âsi mono Pẽ'ẽzani na 're ipoto téb za'ra mono norĩ ãma hã.

9Tawamhã Nicodemosi hã te ãma sadanha, ãne:

— E niha tane hã.

10Zezusi hã ma sada'â, ãne:

— A hã rowahutu'wa, Izaraéu nhihudu norĩ ma hã. E niha tane nherẽ, ã norĩ hã sadaihu'u za'ra õ di. 11Tô sena, wa za ãne aima waihu'u: Wama iwaihu'u pese zarina, wa wa te 're nharĩ za'ra. Duré wa wa te 're wasu'u za'ra, wa te 're i'madâ'â za'ra mono hã. Tane nherẽ, a norĩ wa'wa hã wanhimirowasu'u na 're wazaze za'ra wa'aba mono õ di. 12Ti'ai ãma 're iromhâimana za'ra mono zém na te aima rowasu'u za'ra wa'aba nherẽ, ãma ĩzaze za'ra wa'aba õ di. E niha te za bété tawamhã ĩzaze za'ra wa'wa, hâiwa ãma marĩ 're ihâimana za'ra mono zém na te aima rowasu'u za'ra wa'aba wamhã. 13Ni'wa, niwamhã hâiwa u hã sébré õ di, Ti'ai ãma Dasiré Ipoto upana hã. Taha si ma tô wei mo, hâiwa hawi.

14— Mozési hã rop si 're irosa'wari mono ãma, wahi 'manharĩ ẽtẽ topsada brõzi 'manharĩ hã te te isasõmri ne, tane Ti'ai ãma Dasiré Ipodo hã i'ru zahi, da te dasiwi isasõmri da hã, 15uburé ni'wam norĩ hã te te 're saze za'ra mono wa, dahâimanazé isi'utõrĩ'õ hã te te sina 're uwaimrami za'ra mono da. 16'Re ihâimana u'âsi mono ma, ti'ai ãma 're idahâimana za'ra mono hã tãma dazawi pese uptabi wa, ma tô Ti'ra hã misi nherẽ we satõ, uburé te te 're isaze za'ra mono hã 're dâ'â za'ra mono tõ da, dâ'â ãna 're si'ubumroi u'âsi mono da. 17'Re ihâimana u'âsi mono ma tô ti'ra hã we satõ ti'ai u, te te 're da'anho'reptui mono da. Te te 're da'ahâ za'ra mono da, we te te satõrĩ õ di.

18— Ni'wa hã I'ra te te sazei wamhã, tinhimihâzé hã te te tãma pisutu õ di za, 'Re ihâimana u'âsi mono hã. Tazahã, ni'wa te te sazei õ wamhã, ma tô tinhimihâzé hã tãma pisutu siro, te te sazei õ wa, 'Re ihâimana u'âsi mono 'ra, misi pese 're ihâimana mono hã. 19Ãne da'ãma rowairébézé hã: 'Re ihâimana u'âsi mono hã ti'ai u ma tô we datẽme satõ, rowa'a hã. Tane nherẽ, robra si ma tô dasima sawi za'ra ni. E marĩ wa. Marĩ, da te 're i'manharĩ za'ra mono hã iwasété si wa. 20Ni'wa hã marĩ iwasédé te te 're a'manharĩ mono wamhã, rowa'a hã tãma 'ru ti. Rowa'a u te te sina irotété da hã, te te sima wẽ õ di, marĩ te te 're i'ab'manharĩ wasété mono zé hã da te tiwi waihu'u za'ra tõ da. 21Tazahã, ni'wa tô sena na marĩ te te 're a'manharĩ mono wamhã, te za rowa'a u sina rotété, ihâimanazé hã sõ'awi da te 'madâ'â za'ra da, i'uwaibaba 're ihâimana mono na hã, 'Re ihâimana u'âsi mono te te sima 're iwẽ mono zéb zarina.

Zezusi duré Zuwã Batista

22Ãne parimhã, Zezusi hã ma tô mo. Duré isiré 're inomro mono norĩ zama ma tô isiré ai'aba'ré, Zudéa na danhipti'a nho'õmo nhisi u. Tame ma tô niha bâtâ na tihâiba. Â dawabzuri hã ma tô duré dama a'manha. 23Zuwã Batista hã te duré â dawabzuri hã dama a'manha, Eno ãma, Salĩ 'ratamhã, tamemhã â za'ẽtẽ wa. Tamomo ma tô itẽme ai'aba'ré ni. 24(Ã hã, zahadu Zuwã hã dazazéb 're, da te sẽrẽ õ ré hã.)

25Tawamhã Zuwãhã siré 're inomro mono norĩ nima norĩ hã ma tô siwi sada'â Zudeu, 'Re ihâimana u'âsi mono ma, 're idasihâiba pese za'ra mono zém na. 26Tahawa, Zuwã Batistaha u ma tô ai'aba'ré. Ãne te tãma rowasu'u za'ra:

— Rowahutu'wa, Zodã zara niwĩ aihâimana ré, aibâ asiré ihâimana hã duré dama iwasu'u hã, â dawabzuri te dama a'manha. Da'ahâ na te uburé itẽme ai'aba'ré ni.

27Tawamhã Zuwã hã ma sada'âbâ za'ra, ãne:

— Ni'wai ma marĩ hã hâimana waihu'u õ di, 'Re ihâimana u'âsi mono te te tãma pisutu õ nherẽ. 28Asõ'a za'ra wa'aba, wa tô ĩsiwasu'u, ãne hã: “Wa hã Cristu õ di. Wa hã, isõwa, 'Re ihâimana u'âsi mono we te te ĩzatõrĩ, bâdâdi te sô sa'ra pese da.” Ãne na hã aima ĩsiwasu'u za'ra wa'aba zém na hã ma tô aré ĩwapari za'ra wa'wa. 29Dasina damro ãma, pi'õ hã za aibâ, ãma imro te hã. Aibâ za imro siwaihu hã isiré te tihâiba. Te za wapa imreme. Te za duré ãma sima rowẽ, imreme te te wapari wamhã. Ãne, Zezusihi ãma iromhâimanazém na hã ãma ĩma rowẽ uptabi di. 30Tô ta hã te te sina ihâimo u'âsi mono da si, pire na 're ihâimana mono zém na hã. Duré wa hã ĩpire na te ĩsina iti'awi u'âsi mono da si, iwa'rãmi.

Hâiwa hawi we imorĩ si, uburé danhipai u ipire uptabi hã

31Hâiwa hawi we imorĩ hã, uburé danhipai u pire uptabi di. Ni'wa hã ti'ai ãma a'uwẽ wamhã, ta hã te za te te 're rowasu'u, ti'ai ãma marĩ 're ihâimana za'ra mono na. Hâiwa hawi we imorĩ si, uburé danhipai u pire uptabi di. 32Ta hã te te 're rowasu'u, te te 're irob'madâ'â mono zém na, duré te te 're iwapari mono zém na zama. Tane nherẽ, ni'wa te te sazei õ di, isimirowasu'u na hã. 33Ni'wa hã isimirowasu'u na te te sazei wamhã, 'Re ihâimana u'âsi mono mreme tô sena 're ihâimana mono na, te za tô sena na waihu'u za'ra ni. 34Ta hã 'Re ihâimana u'âsi mono we te te isatõrĩ hã, 'Re ihâimana u'âsi mono mreme zarina, te te 're rowasu'u. E marĩ wa. 'Re ihâimana u'âsi mono hã Tipẽ'ẽzani sa'ẽtẽ uptabi na te te 're anhomri mono wa, wahuré. 35Imama hã Ti'ra te te 're sawi pese. Tahawa, uburé marĩ hã isib'rata ma tô tãma sõmri za'ra. 36Tahawa, ni'wa hã I'ra te te sazei wamhã, dahâimanazé isi'utõrĩ'õ te za sina uwaimra. Tazahã, ni'wa te te wẽ'õ wamhã, dahâimanazé isi'utõrĩ'õ tãma ihâimana da hã, mare di. 'Re ihâimana u'âsi mono nhimihâzép si te za te te 're sépata u'âsi.

Actualmente seleccionado:

Zuwã 3: xavBP

Destacar

Copiar