Zuwã 2

Cana ãma dasina damro ihâimana u, Zezusi imorĩzé

1Tawamhã maparane bâdâ ne pari, ma tô dasina damro hã tihâiba, Cana na 'ri wa'õtõ nhisi ãma, Galiléia ti'ai 'remhã. Tame te Zezusihi na hã dame tihâiba. 2Tawamhã Zezusihi zô duré isiré 're inomro mono norĩ zô zama, dasina damro u sihutu da hã, ma tô sô tahârâ za'ra ni. 3Tawamhã uva 'rãi wa'u isé hã si'utõrĩ wa, te Zezusihi ma ina hã tinha, ãne:

— Uva 'rãi wa'u isé hã ma tô ai'utõ.

4Tahawa Zezusi ma sada'â, ãne:

— Ãté a hã ĩna wẽ te, ĩma 'rui õ di za, marĩ te i'manharĩ da hã. E marĩ wa. Ĩte bâdâ hã zahadu iwa waptã'ã õ wa.

5Tahawa, te romhuri'wa norĩ ma, ina hã tinha, ãne:

— Tiha te te aima 'ru za'ra wa'aba wamhã, ma'ãpé mreme zamarĩ za'ra wa'aba za.

6Taha 'rata te piza ẽtẽ 'manharĩ hã aimasa, 6 na ihâiba hã. Taha 'remhã te â hã 're hâimana za'ra, 80 na duré niwamhã 120 litru na â pibuzé hã. Taha piza'a 're, â da te 're iséme mono na te Zudeu norĩ hã 're sisimisõ za'ra, sihâiba pese da hã, tihâimanazéb zarina. 7Tawamhã Zezusi hã te romhuri'wa norĩ ma ti'ru, ãne:

— Ma'ãpé ã hã piza isimasab 're, â hã 'masisi za'ra wa'aba.

Tahawa ma tô 'masisi za'ra â hã, isadawa u. 8Taha parimhã, ma tô Zezusi hã tãma 'ru za'ra, ãne:

— Ma'ãpé, oto â hã suru na amrami za'ra wa'aba, dasina damro wa, datoi 'madâ'â'wai u 'wasari aba da.

9Tawamhã datoi 'madâ'â'wa ma tô téiwa, â isirob'rãi wa'u isé hã. Nima hawim na hã uva 'rãi wa'u isé hã te te waihu'u õ di. Romhuri'wa norĩ si te te waihu'u pese za'ra di. Tahawa ma tô aibâ imro téb zô hâ. 10Ãne te tãma tinha:

— Dasaihuri na'rata hawi, te uva 'rãi wa'u isé isei uptabi hã da te dama 're õb za'ra, da te 're âhuri mono da hã. Sa'ẽtẽ na da te 're âhuri mono wap si, te iwa'u zei prã hã da te dama 're õb za'ra. Tanei õ di, a hã. Isei uptabi hã te a'â ité, i'rãsutu u da.

11Ã hã marĩ dama i'manharĩ waihu'u'õ, Zezusi hã ma tô 'manha imorĩ'rata na, Cana ãma Galiléia 'remhã. Tahawa, waihu'u pese uptabi na 're ihâimana mono zé hã ma tô hâi'ré. Ãne wa, isiré 're inomro mono norĩ hã ma tô saze za'ra.

12Taha pari, Zezusi hã, ina duré ino norĩ duré isiré 're inomro mono norĩ zama, ma tô ai'aba'ré, Cafarnau na 'ri nho'õmo nhisi u. Tame ma tô niha bâtâ na tihâimana za'ra.

Zezusi hã te te idazate mono zé, 'Re ihâimana u'âsi mono nhorõwa 'ri 'rãihâ hawi

Mateus 21.12-17; Marcus 11.15-19; Lucas 19.45-48

13Romhuture di oto, Zudeu norĩ te, Pascoa#2.13 Pascoa hã dato nhisi, Zudeu norĩ, 're isipo're pu'u za'ra mono zé, Ezitu hawi, 'Re ihâimana u'âsi mono te te isani za'ra zém na. na dato nhisi ihâimanazéb u hã. Tahawa, Zezusi hã ma tô mo, Zeruzalẽ u. 14Tawamhã 'Re ihâimana u'âsi mono nhorõwa 'ri 'rãihâ ãma 'ri 'wawi wa'ra 're, ma tô sõpẽtẽ za'ra ni'wam norĩ, powawẽ te te dama iwede za'ra hã duré pone'ẽrebâ, duré utu'u. Ma tô duré 'madâ'â za'ra, rob'uiprazém na te te dawi isaprĩ za'ra hã, tite wedezai 'rata isi'ubumro hã. 15Tawamhã Zezusi hã ma tô sada 'ma'manharĩ za'ra, danhimizama pré'ézé hã wedenhorõ na. Taha na ma tô uburé ta norĩ hã te te sate, duré pone'ẽrebâ hã duré powawẽ zama. Wedeza hã ma tô duré pizari za'ra, rob'uiprazém na isaprĩ'wa norĩ wi. Tahawa, rob'uiprazé isapotore hã ma tô ti'ai wa ropé. 16Tawamhã utu'u te te iwede za'ra norĩ ma, te duré tinha, ãne:

— Ã hã uburé robzani za'ra wa'aba. Sahâri za'ra wa'aba, Ĩmama nhorõwa ãma asima irowede za'ra wa'aba zé hã.

17Tahawa, isiré 're inomro mono norĩ hã ma tô ãma tipo're pu'u za'ra, Ibaihâ Iwazé pese na rob'ui'éré te te inharĩ na, ãne: “Asõrõwa, te 're isawi pese mono zé hã, te unhama ro'o ne ĩma 're hâimana, ĩpẽ'ẽ 'remhã.”

18Tahawa, te Zudeu norĩ ma roti'wa norĩ hã siwi sadanha, ãne:

— E marĩ te za i'manha, dama i'manharĩ waihu'u'õ hã, wa te ãma aiwaihu'u za'ra da, asimiroti pire aima ihâimanazéb zarina, ãne i'manharĩ na hã.

19Tawamhã Zezusi ma sada'âbâ za'ra, ãne:

— Ã hã 'Re ihâimana u'âsi mono nhorõwa 'ri 'rãihâ hã asiwi 'ri pru pese aba! Tawamhã apâ wa za 'ri, bâdâ si'ubdatõ na.

20Tawamhã asa te tãma nharĩ za'ra, ãne:

— E niha te za merẽ bâdâ si'ubdatõ na apâ i'ri. Oro ã hã da te dasiwi 'ri ré hã, 46 na ãma wahub za.

21Tane nherẽ, 'ri 'rãihâ na te te inharĩ hã, tihâiba te wasu'u, Zezusi hã. 22Hâiwa'utu parip si, isiré 're inomro mono norĩ hã ma tô ãma tipo're pu'u za'ra, te te inharĩzém na hã. Tahawa, ma tô saze za'ra, Ibaihâ Iwazé pese na rob'ui'éré hã duré Zezusi te te sina inharĩzéb zama.

Zezusihi ma waihu'u pese di, uburé danhimirosa'rada hã

23Zezusi hã Pascoa na dato nhisi u'âbâ, Zeruzalẽ ãma hâimana ré hã, ma tô da'ahâ na saze za'ra ni, marĩ dama i'manharĩ waihu'u'õ te te dama 're i'ab'manharĩ mono zé hã, da te 'madâ'â za'ra wa. 24Tane nherẽ, Zezusi hã te te sina da'a'umnhasi õ di, tãma dawaihu'u pese uptabi wa. 25Ni'wa hã dahâimanazém na te te tãma 're da'awaihu'u mono da hã, sô 're simnhasi mono õ di. E marĩ wa. Dahâiba mono bâ, da te 're irosa'rata za'ra mono zé hã tãma waihu'u pese uptabi wa.

Actualmente seleccionado:

Zuwã 2: xavBP

Destacar

Copiar