TAITO 2

Na Vakatavuvulitaki ni Vakavuvuli Dina

1Sa nomu i tavi mo vunautaka na ka e salavata kei na i vakavuvuli dina. 2Vakarota me ra yalomatua na qase, me ra loma vuku ka lewai ira vakavinaka, me taucoko vinaka na nodra vakabauta, me ra dau loloma ka dau vosota. 3Me vaka talega kina o ira na yalewa qase, me tiko vei ira na yalo e veidokai ka me ra kakua ni dauveibeitaki vakailasu se daumateni. Ia me ra dau vakatavuvulitaka na ka vinaka, 4ka tuberi ira na yalewa gone me ra dau lomani ira na watidra kei na luvedra. 5Me ra yalomatua ka yalosavasava, me ra radinivale vinaka ka dau talairawarawa vei ira na watidra, me kakua kina ni vosa vakacacataki na vosa ni Kalou.

6Vakamasuti ira talega na cauravou me ra lewai ira vakavinaka. 7Ia o iko sara mada ga mo i vakaraitaki vinaka ena ka kecega o cakava, ka mo vakaraitaka na dodonu kei na bibi ni nomu i vakavuvuli. 8Na veika kece o tukuna me dina ka sega ni vakamelei rawa me na vagalui kina na meca ka sega na ka ca e kaya rawa me baleti keda.

9Vakaroti ira na bobula me ra talairawarawa vei ira na nodra turaga ena ka kecega. Io me ra kakua sara ni sauma lesu na nodra vosa, 10se me ra butakoca na veika era taukena. Me ra vakaraitaka ga na nodra yalodina ena ka kecega, ka me ra vakarogovinakataka kina na i vakavuvuli ni Kalou na noda i Vakabula ena ka kecega era cakava.

Sa Noda i Nuinui na Karisito

11Sa vakaraitaki mai na lolomasavu ni Kalou me ra vakabulai kina na tamata kecega. 12Sa vakavulici keda me da biuta tani na i tovo kecega e sega ni tovo vakalou kei na gagadre ca vakayago, ka me da yalomatua, yalosavasava ka i tovo vakalou ena vuravura oqo, 13ni da sa waraka tiko na siga kalougata eda sa nuitaka voli mai, ni na rairai mai kina na noda Kalou levu ka noda i vakabula ko Jisu Karisito ena nona i serau lagilagi. 14#Same 130.8; Lako 19.5; Vrua 4.20; 7.6; 14.2; 1Pita 2.9Ni sai koya ga sa solia na nona bula ena vukuda, me voli keda vakadua kina mai na i valavala ca kecega, me vakasavasavataki keda me da sa nona tamata savasava ka dauguta vakalevu na caka vinaka.

15Mo vakatavuvulitaka na veika oqo ka vakayagataka na kaukauwa kece sa soli vei iko mo ia kina na veivakauqeti kei na veivunauci vei ira era sa vakarorogo. Mo kakua sara ni vakatara me dua e raici iko sobu.

Actualmente seleccionado:

TAITO 2: FNV

Destacar

Copiar