ROMA 8

Na Bula ena Kaukauwa ni Yalo Tabu

1O koya oqo sa sega kina ni wilika na Kalou na nodra cala o ira era sa tu vata kei Karisito Jisu. 2Baleta na lawa ni Yalo Tabu, o koya sa kauta mai vei keda na bula ena noda tu vata kei Karisito Jisu, sa sereki au mai na lawa ni valavala ca kei na mate. 3Na ka sa sega ni cakava rawa na Lawa, ena vuku ni malumalumu ni vakarau ni bula vakatamata, a sa cakava oti na Kalou. A sa vakarusa na i valavala ca sa tu ena i tovo ni bula vakatamata ena nona tala mai na Luvena, o koya sa lako mai ena yago sa tautauvata kei na yagoda i valavala ca na tamata, me i soro ni valavala ca. 4Sa cakava na ka oqo na Kalou me caka rawa kina na i valavala dodonu e vakarota na Lawa ena noda bula na tamata eda sa bula voli ena veiliutaki ni Yalo Tabu, ka sega ni vaka na i tovo e gadreva na yagoda. 5O ira era bula voli me vaka na ka e vinakata na nodra i tovo vakayago era sa vakarorogo ki na ka e gadreva na yagodra, ia o ira era sa bula voli me vaka na ka e vinakata na Yalo Tabu era sa vakarorogo ki na veiliutaki ni Yalo Tabu. 6Me lewai keda na noda i tovo vakayago sa kena i tinitini na mate; ia me lewai keda na Yalo Tabu sa kena i tinitini na bula kei na vakacegu. 7O koya oqo, sa yaco kina me ra meca ni Kalou na tamata era sa lewai mai na i tovo vakayago; ni ra sa sega ni muria tiko na lawa ni Kalou, ka sa dredre sara me ra talairawarawa kina. 8O ira era sa muria tikoga na i tovo vakayago era sa sega ni rawa ni vakalomavinakataka na Kalou.

9Ia o ni sa sega ni bula voli me vaka na ka e gadreva na yagomuni, o ni sa bula voli ga me vaka na ka e gadreva na Yalo Tabu, kevaka e dina ni sa bula tiko na Yalo ni Kalou e lomamuni. Na tamata yadua e sega ni tiko vua na Yalo i Karisito e sega ni nona na Karisito o koya. 10Ia kevaka sa tiko e lomamuni na Karisito, e dina ga ni sa mate na yagomuni ena vuku ni valavala ca, ia sa bula tiko na yalomuni ni sa vakadonui kemuni na Kalou. 11Ia kevaka sa tiko e lomamuni na Yalo ni Kalou, o koya sa vakaturi Jisu cake tale mai na mate, ena qai vakabula talega na yagomuni sa mate rawa o koya sa vakaturi Karisito mai na mate ena vuku ni nona Yalo Tabu sa tiko e lomamuni.#1Kori 3.16

12O koya oqo, oi kemuni na veiwekani, ni sa tiko na noda i tavi me da vakayacora, o ya me da kakua ni bulataka tiko na noda gagadre ni tovo vakayago. 13Ni kevaka o ni sa bula voli ga me vaka na ka e gadreva na yagomuni, o ni na mate; ia kevaka o ni sa vakamatea na veika e gadreva na yagomuni ena Yalo Tabu, o ni na bula. 14O ira sa liutaki ira na Yalo ni Kalou era sa luve ni Kalou. 15Na Yalo Tabu e solia vei kemuni na Kalou sa sega ni yalo ni veivakabobulataki me vakavurea vei kemuni na rere, ia na Yalo Tabu ga sa vakayacori kemuni mo ni luve ni Kalou, o koya eda sa kaci kina ena kaukauwa ni Yalo Tabu vua na Kalou, “Apa! Tamaqu!”#Kala 4.5-7 #Mari 14.36; Kala 4.6 16Na Yalo ni Kalou sa semati koya ki na yaloda yadua me vakadinadinataki kina ni da sa luve ni Kalou. 17Ni da sa luvena, eda na taukena na veivakalougatataki sa maroroya tu o koya me nodra na nona tamata, ka da na taukena vata talega kei Karisito na veika sa maroroya tu na Kalou me baleti koya; ni kevaka eda sa vakaivotavota ena nona vakararawataki na Karisito, eda na vakaivotavota talega ena nona lagilagi.

Na Lagilagi ena Gauna mai Muri

18Au vakasamataka oqo ni veika rarawa eda sota kaya tiko edaidai ena sega ni rawa ni vakatauvatani kei na lagilagi ena qai vakaraitaki vei keda ena gauna mai muri. 19Sa wawa tu ena nanamaki levu na veika buli me vakatakilai ira mai na luvena na Kalou. 20Ni a sa cudruvi tu o vuravura me vakayalia na nona i naki, ka sa sega ni yaco oqo me vaka na nona i naki vakaikoya ga o vuravura, ia sa nona i naki ga na Kalou me vakakina. Ia sa tikoga na i nuinui#Vteki 3.17-19 21ni na yaco mai na gauna me na sereki tale kina o vuravura mai na nona vakabobulataki ki na rusa ka me vakaivotavota ena bula galala uasivi sa nodra na luve ni Kalou. 22Eda sa kila tu me yacova mai na gauna oqo ni ra sa vutugu kece tu na veika buli ena rarawa, io me vaka na rarawa ni vakasucu gone. 23Ia era sa sega ni vutugu walega na veika buli; eda sa vutugu talega e yaloda oi keda sa tu vei keda na i sevu ni nona i solisoli na Kalou o ya na Yalo Tabu, ni da sa waraka tiko me vakayacori keda na Kalou me da sa luvena ka sereka na noda bula taucoko me galala.#2Kori 5.2-4 24Ni sai koya na noda vakanuinui oqo eda sa vakabulai kina. Ia kevaka eda sa raica rawa tiko na ka eda nuitaka tiko, sa qai sega tale ni okati oqori me i nuinui dina. Se o cei mada e dau nuitaka me yaco e dua na ka sa raica rawa tiko? 25Ia kevaka eda vakanuinui tiko ki na veika eda se sega mada ni raica, eda na waraka ga ena vosota.

26Sa vakakina na nona lako mai na Yalo Tabu me mai vukei keda ena noda malumalumu. Ni da sa sega ni kila na i vakarau ni masu e kilikili me da vakayacora. Sa vakamamasu tikoga na Yalo Tabu vua na Kalou ena vukuda ena vutugu sa sega na vosa me vakamacalataka rawa. 27Ia na Kalou, o koya sa raica na yalo ni tamata, sa kila na vakasama ni Yalo Tabu; ni sa dau masulaki keda na Yalo Tabu me vaka na ka e vinakata na Kalou.

28Eda sa kila ni sa cakacaka tiko na Kalou ena veika kecega me ra vinaka kina o ira era sa lomani koya, o ira sa kacivi ira o koya me vaka na lomana. 29O ira sa digitaka oti na Kalou sa lesi ira o koya me ra yaco me ra vakataka na Luvena, me yaco kina na Luvena me ulumatua ena kedra maliwa na tacina ena dua na matavuvale levu. 30A sa yaco kina me vakaoqo: o ira sa digitaki ira na Kalou, a sa kacivi ira; o ira sa kacivi ira o koya, a sa vakadonui ira; kei ira sa vakadonui ira o koya, a sa vota talega vei ira na nona lagilagi.

Sa Vakaraitaki na Loloma ni Kalou ena Vuku i Karisito Jisu

31Na cava tale me da qai kaya ena veika kece oqo? Kevaka sa noda i to na Kalou o cei ena qai noda meca? 32O koya ka a sega ni bureitaka na Luvena dina, ka ni a soli koya ga ena vukuda kece, ena sega li ni solia walega vei keda na ka kecega? 33O cei ena beitaki ira na digitaki ni Kalou? Na Kalou sara ga vakaikoya e sa vakadonui ira ka sa okati ira me ra sai valavala dodonu! 34O cei tale ena rawa ni vakacalai ira? Sa i Jisu Karisito ga ka a mate; a sa vakaturi cake tale, sa tiko ena liga i matau ni Kalou edaidai ka sa dau vakamamasu tiko vua na Kalou o koya ena vukuda. 35O cei me na tawasei keda rawa mai na loloma i Karisito? Na ka rarawa li, se na yaluma, se na dauveivakacacani, se na dausiga, se na luvaiwale, se na dauveivakarerei se na i seleiwau? 36Ia me vaka sa volai:

“Ena vukumuni, keitou sa vakamatei tiko kina ena siga taucoko;

Keitou sa vakatautauvatani kei na sipi ena vakarau vakamatei.”#Same 44.22

37Sega! Ena veika kece oqo eda na qaqa kina ena vuku i koya sa lomani keda. 38Ni'u sa vakadinata sara ni na sega tale ni dua na ka me na tawasei keda mai na loloma i Karisito; ena sega ni rawata na mate, se na bula, era na sega ni rawata na agilosi se o ira na daulewa mai lomalagi, se na veika e yaco edaidai se na veika ena yaco mai muri, 39se na vuravura e cake, se na vuravura e ra. Ena sega sara ni dua na ka me na rawa ni tawasei keda mai na loloma ni Kalou sa mai noda ena vuku i Karisito Jisu na noda Turaga.

Actualmente seleccionado:

ROMA 8: FNV

Destacar

Copiar