ROMA 15

Vakalomavinakataki Ira na Tani, ka Segai kivei Iko ga

1Sa dodonu vakaidina vei keda sa kaukauwa na noda vakabauta me da vukei ira na malumalumu ena kena colati na nodra i colacola. Sa sega sara ni kilikili me da vakalomavinakataki keda ga vakai keda. 2Ia me da vakalomavinakataki ira ga na wekada me ra vinaka kina, ka me tarai cake kina na nodra vakabauta. 3Ni sa sega ni vakalomavinakataki koya vakaikoya na Karisito; ia, me vaka ga ni sa volai ena i Vola Tabu: “Na nodra vosa ni veivakacacani eso me baleti iko e sa tau vei au.”#Same 69.9 4Ni veika kece sara sa volai ena i Vola Tabu ena gauna e liu era sa volai me da vakatavulici kina, ka me noda kina na i nuinui sa basika mai na vosota kei na veivakayaloqaqataki e solia vei keda na i Vola Tabu. 5Ia me qai vukei kemuni na Kalou, o koya na i vurevure ni vosota kei na yaloqaqa, mo ni lomavata kina vakai kemuni ena nomuni muria na i vakarau i Karisito Jisu, 6ka mo ni duavata ka domodua ena vakacaucautaka na Kalou, na Tama ni noda Turaga ko Jisu Karisito.

Na i Tukutuku Vinaka Vei Ira na Kai Matanitu Tani

7O koya oqo mo ni qai veivakadonui vakai kemuni kina, me vaka sa vakadonui kemuni ka ciqomi kemuni na Karisito; ni kitaka oqo me vakalagilagi kina na Kalou. 8Au via tukuna vei kemuni ni a mai dua na dauveiqaravi vei ira na Jiu ko Karisito me vakaraitaka na yalodina ni Kalou, me vakayacori kina na vosa ni yalayala ni Kalou vei ira na nodra qase, 9me rawa talega kina ni ra vakacaucautaka na Kalou na kai matanitu tani ena vuku ni nona yalololoma levu. Me vaka sa kaya na i Vola Tabu:

“Au na vakarokorokotaki kemuni ena kedra maliwa na kai matanitu tani;

Ka'u na vakacaucautaki kemuni ena sere.”#2Samu 22.50; Same 18.49

10Sa kaya talega:

“Mo ni reki, na kai matanitu tani, kei ira na tamata ni Kalou!”#Vrua 32.43

11Sa kaya tale,

“Ni vakarokorokotaka na Turaga, na veimatanitu kecega;

Me vakacaucautaki koya na tamata kecega.”#Same 117.1

12E a kaya talega o Aisea:

“Ena lako mai e dua na kawa i Jese;

Ena vakaturi cake o koya me liutaki ira na kai matanitu tani,

Ka ra na vakanuinui vua.”#Aisea 11.10 (LXX)

13Me qai vakasinaiti kemuni na Kalou, o koya na vu ni nuinui, ena reki kecega kei na vakacegu ena vuku ni nomuni vakabauti koya, me na tubu cake tikoga kina na nomuni vakanuinui ena kaukauwa ni Yalo Tabu.

Na Vu ni Volavola Doudou i Paula

14Kemuni na wekaqu, oi au vakataki au sa vakabauta ni o ni sa sinai tu ena yalo vinaka, kei na kila-ka, ka sa rawa kina mo ni veivakavulici vakataki kemuni. 15Ia ena i vola oqo au sa doudou sara me'u tukuna tale yani kina vei kemuni e vica na ka. Au sa doudou ena vuku ni lolomasavu sa solia vei au na Kalou, 16me'u dua na tamata i Karisito ka me'u veiqaravi vei kemuni na kai matanitu tani. Au sa cakacaka me vaka e dua na bete ena noqu vunautaka na i Tukutuku Vinaka, mai vua na Kalou, me ra yaco kina na kai matanitu tani me ra i soro e vakabau ena mata ni Turaga, ni sa vakacabori ira vua na Yalo Tabu. 17Sa qai rawa kina vei au, ena vuku ni noqu sa sema tu vei Karisito Jisu, me'u cibitaka na noqu veiqaravi ena cakacaka ni Kalou. 18Au sa doudou me'u tukuna na veika ga sa vakayacora na Karisito ena noqu bula, me rawa kina vei ira kai matanitu tani me ra talairawarawa vua na Kalou. Sa vakayacori na veika oqo mai na nona vosa kei na veika sa cakava, 19mai na kaukauwa ni cakacaka mana kei na veika veivakurabuitaki eso, ka vakakina ena kaukauwa ni Yalo Tabu. O koya oqo, ena noqu sa lako voli mai Jerusalemi ki Ilirikumi, au sa vunautaka kece kina na i Tukutuku Vinaka me baleti Karisito. 20Na gagadre ni yaloqu sai koya me'u vunautaka na i Tukutuku Vinaka ena veivanua e se sega ni bau rogoci vakadua kina na i tukutuku kei Karisito, me'u kakua kina ni la'ki cakacaka ena dua na yavu sa tara oti tu e dua tale na tamata. 21Me vaka sa volai ena i Vola Tabu:

“O ira ka se bera ni tukuni vei ira na veika me baleti koya era na rai,

Kei ira ka se bera ni rogoca era na kila e vu-ni-yalodra.”#Aisea 52.15 (LXX)

A i Naki ni Veisiko i Paula ki Roma

22Sa i koya oqo na vuna ka'u sa tarovi kina vakavuqa me'u kakua ni lako yani kina vei kemuni.#Roma 1.13 23Ia oqo ni sa oti na noqu veiqaravi ena veiyasana oqo, ka sa balavu mai na gauna ka'u gadreva voli kina me'u mai raici kemuni, 24au sa nakita kina me'u sa lako yani oqo. Au sa gadreva me'u na sikovi kemuni ena noqu i lakolako ki Sipeini, ka mo ni qai vukei au talega me'u yaco rawa ki kea, ni sa na oti na noqu veisiko lekaleka vei kemuni. 25Ia ena gauna oqo, au se tei lako mada ki Jerusalemi me'u kauta na ka-ni-loloma vei ira na tamata ni Kalou maikea.#1Kori 16.1-4 26Ni ra sa lomasoli na i soqosoqo lotu mai Masitonia kei Akaia me ra solia e dua na nodra i solisoli me vukei kina o ira na dravudravua ena kedra maliwa na tamata ni Kalou mai Jerusalemi. 27A sa nodra vakataki ira ga na vakatulewa oqo; ia sa nodra i tavi talega oqo, me ra vukei ira. Me vaka ni ra sa vota na Jiu na nodra veivakalougatataki vakayalo kivei ira na kai matanitu tani, sa dodonu vakakina vei ira na kai matanitu tani me ra vota na nodra veivakalougatataki vakayago mai na nodra i yau kivei ira na Jiu.#1Kori 9.11 28Ena gauna ka'u na vakaotia kina na i tavi oqo ka solia vei ira na i lavo kece sara sa kumuni me baleti ira, au sa na qai gole ki Sipeini, ka la'ki sikovi kemuni yani ena noqu i lakolako ki kea. 29Ena noqu i lakolako yani, au kila ni'u sa na lako yani kei na veivakalougatataki taucoko i Karisito.

30Au sa vakamasuti kemuni na veiwekani, ena vuku ni noda Turaga ko Jisu Karisito kei na loloma sa solia vei kemuni na Yalo Tabu: mo ni duavata kei au ena nomuni masu vagumatua vua na Kalou ena vukuqu. 31Ni masulaka me'u na taqomaki mai na ligadra na tawa vakabauta mai Jutia, ka me ra ciqoma na noqu veiqaravi mai Jerusalemi o ira na tamata ni Kalou maikea. 32Ni kevaka sa vakaoqo na lewa ni Kalou, au na lako sara yani vei kemuni ena reki, ka marautaka e dua na gauna vinaka ni noda sota vata. 33Me qai tiko vata kei kemuni yadudua kece sara na Kalou, o koya na vu ni vakacegu. Emeni.

Actualmente seleccionado:

ROMA 15: FNV

Destacar

Copiar