ROMA 13

Na Noda i Tavi Vei Ira na Veiliutaki Vakamatanitu

1Me talairawarawa na tamata kecega vei ira era veiliutaki ena matanitu, ni sega ni dua e veiliutaki rawa ke sega ni vakatara na Kalou. O ira era sa veiliutaki tiko oqo sa lesi ira kina na Kalou. 2O koya e saqati ira era veiliutaki tiko sa saqata tiko na ka sa lesia na Kalou; ka sa na vakavuna ga na nona cudruvi. 3Ni sa sega ni dodonu me ra rerevaki ira na i liuliu o ira era caka dodonu tiko, ia o ira ga sa kitaka na ca. O gadreva li mo kakua ni rerevaki ira na i liuliu? Ia cakava na ka vinaka, ka ra na qai vakacaucautaki iko o ira oqo. 4Ni sai talai ni Kalou o koya ka sa dau cakava na ka mo vinaka kina. Ia kevaka o sai tovo ca, mo rerevaki koya, ni sa tu dina na nona kaukauwa me veitotogitaki kina. Sa i koya na i talai ni Kalou ka sa nona i tavi me vakayacora na cudru ni Kalou vei ira era sa caka ca. 5Oqo na vuna e dodonu mo ni talairawarawa kina vei ira era sa veiliutaki, ka sega ni baleta walega na cudru ni Kalou, ia sa baleta talega na vakatulewa dodonu ni noda lewa-e-loma.

6Sa i koya talega oqo na vuna mo ni soli i vakacavacava kina, baleta ni ra sa okati me ra dauveiqaravi ni Kalou o ira sa veiliutaki ni ra sa vakayacora tiko na nodra i tavi.#Maciu 22.21; Mari 12.17; Luke 20.25 7Sauma kece na ka e dodonu me saumi vei ira na tamata, sauma na i vakacavacava vei ira e dodonu me saumi vei ira, na soli lavaki ki vua sa dodonu me soli kina na soli lavaki, na vakarokoroko vua e dodonu me vakarokorokotaki, kei na veivakalagilagi vei koya e dodonu me vakalagilagi.

Na i Tavi ni Tamata Vua na Wekana

8Me kakua ni tu e dua na ka o dinautaka tu kina vua e dua, ia sa nomu i tavi ga mo lomani ira na veiwekani. O koya yadua sa vakayacora vakaoqo sa talairawarawa ki na Lawa. 9Na Lawa eso me vaka na: “Mo kakua ni ia na veibutakoci; mo kakua ni laba, mo kakua ni butako, mo kakua ni kocokoco” — na veika kece oqo, vata kei ira tale na kena vo, sa kedra i soqoni vakadua na i vakaro oqo: “Mo lomana na kai nomu me vaka o sa lomani iko.”#Lako 20.14; Vrua 5.18; Lako 20.13; Vrua 5.17; Lako 20.15; Vrua 5.19; Lako 20.17; Vrua 5.21; Vsoro 19.18 10Kevaka o sa lomana e dua na tamata, o na sega vakadua ni cakava vua e dua na ka ca; o koya oqo, sa talairawarawa kina ki na Lawa taucoko na tamata sa dauloloma.

11Sa dodonu mo ni cakava na ka oqo, baleta ni o ni sa kila na kena sa yaco mai na gauna oqo mo ni yadra kina mai na moce. Ni sa qai voleka sara mai na gauna me da vakabulai kina me vakatauvatani kei na gauna eda se qai vakabauta kina. 12Sa voleka ni oti yani na bogi, ka sa voleka ni kida mai na mataka. Me da muduka laivi na i valavala butobuto, ka vakaiyaragi ena rarama. 13Me da vakaitovotaki keda vinaka, me vaka na tamata sa bula voli ena rarama; ka me muduki na i valavala vakasisila se na mateni, me muduki na daudara se na i valavala velavela, ka me kua na veileti se na vuvu. 14Ia ni taurivaka ga na i yaragi ni Turaga ko Jisu Karisito, ka tarovi kemuni mai na kena kauwaitaki na i tovo vakayago kei na vakayacori ni kena gagadre ca eso.

Actualmente seleccionado:

ROMA 13: FNV

Destacar

Copiar