VAKATEKIVU 29

Sa Yaco vei Lepani o Jekope

1A sa tomana yani na nona i lakolako o Jekope, ka yaco sara ki na nodra vanua na tamata mai na tokalau. 2Ni sa rai yani ki liu, a qai raica e dua na i keliwai ena loma ni buca, ka ratou davo volekata koto e tolu na qele ni sipi. Era sa dau mai gunu na sipi ena i keliwai oqo ka koto e delana e dua na vatu levu. 3Ni ra sa dauyaco kece yani kina na qele ni sipi, era na qai vaqiqica tani na vatu na i vakatawanisipi me ra gunu na sipi. Era a qai dau biuta lesu tale na vatu ena dela ni keliwai.

4Sa tarogi iratou na i vakatawanisipi o Jekope, “Kemudou na wekaqu, o dou sa lako mai vei?”

E ratou sa kaya, “Oi keitou oqo mai Karana.”

5Sa qai kaya vei iratou, “O dou bau kilai Lepani na makubui Neori?”

E ratou a sauma ka kaya, “Io, keitou kilai koya.”

6Sa qai tarogi iratou tale, “E bulabula vinaka tiko beka o koya?”

E ratou sa kaya, “Io, e bulabula vinaka tiko. Raica, sa lako mai oqo o Raijeli na luvena yalewa vata kei na nona qele ni sipi.”

7A sa kaya o Jekope, “E sa siga levu tu na vanua, ka se bera na gauna me ra dau kau mai kina i loma na sipi. A cava o dou sega ni vagunuva kina na sipi ka kauti ira yani me ra kana ena veico?”

8E ratou sa kaya, “Keitou sega ni rawa ni cakava na ka oqori me yacova ni ra sa yaco kece mai na i vakatawanisipi, ka me qai vaqiqici tani na vatu mai na gusu ni keliwai ka ra sa na qai vagunuvi na sipi.”

9Ni sa veivosaki tiko kei ira, sa kauti ira mai na sipi nei tamana o Raijeli ka ni dau vakatawani ira tiko. 10Ia oqo ni sa raici Raijeli na luve i Lepani yalewa na ganei tinana o Jekope kei na sipi nei na vugona o Lepani, sa lako yani o Jekope ka vaqiqica tani na vatu mai na gusu ni keliwai ka vagunuvi ira na sipi nei na vugona o Lepani. 11A sa reguci Rejieli o Jekope ka tagi vakadomoilevu. 12Sa kaya vua, “Oi au na luve i Repeka na ganei tamamu.”

Sa qai cici yani o Raijeli ka la'ki kaya vei tamana, 13ia ni rogoca o Lepani na i tukutuku baleti Jekope na luve i ganena, sa cici talega yani me la'ki tavaki koya; sa mokoti koya ka reguca, ka kauti koya yani ki vale. A sa kaya vei Lepani o Jekope na ka kece sa yaco. 14Sa qai kaya vua o Lepani. “O sa tiki ni yagoqu dina ka daru dra vata.” A sa tiko e kea o Jekope ena dua taucoko na vula.

Sa Cakacaka vei Lepani o Jekope

15A sa kaya vei Jekope o Lepani, “E sega ni dodonu mo cakacaka wale tu ga vei au baleta ni o wekaqu. Tukuna mai vei au se vica na kemu i sau.” 16E rua tiko na luve i Lepani goneyalewa; o koya e qase e yacana o Lia, ka gone vei rau o Raijeli. 17E rairai vinaka na yaloka ni matai Lia, ia o Raijeli e yalewa rairai totoka ka bulicaki vinaka.

18Ia sa domoni Raijeli o Jekope ka kaya, “Au na cakacaka vei iko me yabaki vitu kevaka o vakadonuya me'u vakawatitaki Raijeli.”

19A sa kaya o Lepani, “E vinaka cake me'u soli koya vei iko, ka ca kevaka au soli koya vua e dua na tamata tani e tiko kei au.” 20A sa mai cakacaka yani o Jekope me yabaki vitu me baleti Raijeli. E lekaleka wale ga na gauna o ya vei Jekope ka ni sa rui domoni Raijeli vakalevu.

21Sa qai kaya o Jekope vei Lepani, “Sa oti na noqu gauna ni cakacaka, solia mai vei au na luvemu yalewa me keirau vakawati.” 22Sa qai cakava e dua na magiti levu o Lepani, ka sureti ira kece mai na tamata ena vanua o ya. 23Ia ni sa bogi na vanua sa qai kauti Lia na luvena yalewa vei Jekope; erau a mocevata kei Jekope. 24(Ia o Lepani sa soli Silipa na nona bobula vei Lia me nona meimei.) 25Ia ena mataka ka tarava sa qai kunei Lia o Jekope. Sa qai kaya vei Lepani, “A cava o sa cakava kina na ka oqo vei au? Au a cakacaka vei iko me baleti Raijeli, A cava o veidabuitaki au kina?”

26Sa qai kaya o Lepani, “E sega ni dau kena i vakarau ena neimami vanua me soli me vakawati e liu o koya e gone ni sa bera o koya e qase. 27Mo wawa mada me oti na macawa ni solevu ni vakamau, au na qai soli Raijeli talega, kevaka o na cakacaka tale vei au me yabaki vitu.”

28Sa mai vakadonuya yani o Jekope, ia ni sa cava na macawa ni solevu ni vakamau, sa qai soli Raijeli tale o Lepani vua me watina. 29(Ia o Lepani sa soli Pila na nona yalewa bobula vei Raijeli me nona meimei.) 30A sa moceri Raijeli talega o Jekope, ka sa domoni koya cake vakalevu mai vei Lia. E a qai cakacaka vei Lepani me vitu tale na yabaki.

O Ira na Luve i Jekope

31Ia ni sa raica ko Jiova na nona lomani ga vakalailai o Lia mai vei Raijeli, a sa vakarawarawataka vua me vakaluveni; ia sa sega ga ni vakaluveni o Raijeli. 32A sa bukete o Lia, ka vakasucuma e dua na gonetagane. A sa kaya, “Ko Jiova sa raica na noqu rarawa, ena qai lomani au kina o watiqu”; ka sa vakatoka kina me yacana o Rupeni.#29.32 Rupeni: Na yaca oqo e rogorogo vaka na “raica, e dua na gonetagane” kei na “sa raica na noqu rarawa” ena vosa vakaiperiu. 33A sa bukete tale ka vakasucuma e dua tale na gonetagane, ka sa kaya, “Ko Jiova sa solia tale vei au na gonetagane oqo, baleta ni sa rogoca o koya ni'u sa sega ni lomani”; ka sa vakatoka kina me yacana o Simione.#29.33 Simione: Na yaca oqo e rogorogo vaka na “rogoca” ena vosa vakaiperiu. 34A sa bukete tale, ka vakasucuma e dua tale na gonetagane. A sa kaya, “Ia oqo, e sa na qai kabiti au vakalevu cake o watiqu, baleta ni'u sa vakasucuma vua e lewe tolu na luvena tagane”; ka sa mani vakatoka kina me yacana o Livai.#29.34 Livai: Na yaca oqo e rogorogo vaka na “kabiti” ena vosa vakaiperiu. 35Ia sa qai bukete tale, ka vakasucuma e dua tale na luvena tagane. A sa kaya, “Ena gauna oqo ka'u sa na qai vakacaucautaki Jiova kina;” ka sa vakatoka kina me yacana o Juta.#29.35 Juta: Na yaca oqo e rogorogo vaka na “vakacaucau” ena vosa vakaiperiu. A sa qai cegu na nona vakaluveni.

Actualmente seleccionado:

VAKATEKIVU 29: FNV

Destacar

Copiar