VAKATEKIVU 26
26
Tiko mai Kira o Aisake
1A sa yaco tale e dua na dausiga ena vanua o ya, ka duatani mai na dausiga sa donumaka o Epara-ama. A sa qai lako yani o Aisake i Kira vua na tui Filisitia o Apimeleki. 2E a rairai vei Aisake ko Jiova, ka kaya, “Mo kakua ni lako sobu ki Ijipita; mo tiko ga ena vanua au sa kaya vei iko mo tiko kina. 3Mo vakaitikotiko ga eke, ka'u na tiko vata ga kei iko ka vakalougatataki iko. Au na solia talega na vanua taucoko oqo vei iko kei ira na nomu kawa. Au na vakayacora na ka au sa bubului kina vei Epara-ama na tamamu.#Vteki 22.16-18 4Au na vakalewevuqataka na nomu kawa me vaka na veikalokalo ni lomalagi, ka'u na solia na vanua taucoko oqo vei ira na nomu kawa. Era na rawata na veimatanitu kecega e vuravura me'u vakalougatataki ira me vaka na noqu vakalougatataki ira na nomu kawa. 5Au na vakalougatataki iko, baleta ni sa talairawarawa vei au o Epara-ama na tamamu, ka sa muria na noqu i vakaro kecega.”
6A sa mani tiko voli ga kina mai Kira o Aisake. 7Era sa qai tarogi koya na tamata ena vanua o ya me baleta na watina; sa qai kaya o Aisake, “E ganequ o koya”; ka ni sa rere me kaya, “E watiqu o koya,” baleta ni sa nanuma de ra na qai vakamatei koya ka tauri Repeka na watina o ira na tamata e kea, ka ni rui matavinaka.#Vteki 12.13; 20.2 8Ni sa dede vakalailai na tiko nei Aisake mai kea, ena dua na gauna, sa qai rai sobu mai o Apimeleki na tui Filisitia ena katubaleka, ka raici rau o Aisake kei Repeka ni rau veidomoni tiko. 9Sa qai vakarota o Apimeleki me kau mai o Aisake, ka mai kaya vua, “Raica, na yalewa oqo e watimu ga. A cava o kaya kina ni ganemu?”
A sa kaya o Aisake “Au sa nanuma ni'u na vakamatei kevaka au sa kaya ni watiqu.”
10Sa qai kaya yani o Apimeleki, “A cava o sa cakava kina na ka oqo vei keimami? Kevaka sa qai yaco me la'ki moceri watimu e dua vei ira na noqu tamata, sa rawa ni vakavuna oqo me ora na loma i keimami ena cala levu.” 11A sa qai vakaroti ira kece sara na nona tamata o Apimeleki ka kaya, “Kevaka e dua na tamata sa vakasosataka na tamata oqo se na watina, ena vakamatei o koya.”
12A sa qai ia na teitei o Aisake ena vanua o ya, ka sa tamusuka talega ena yabaki vata o ya e vakadrautaki na veika sa kaburaka ki na qele, ni sa vakalougatataki koya ko Jiova. 13Sa tubu vakalevu na nona i yau ka sa yaco me tamata vutuniyau sara. 14Sa levu sara talega na nona sipi, na bulumakau, kei na nona tamata dauveiqaravi, ia era sa mani vuvutaki koya kina na kai Filisitia. 15Ena ka oqo, era sa qai buluta ena qele na i keliwai kece sara ka ra a kelia taumada na tamata i Epara-ama na tamana ena dela ni nona gauna.
16A sa qai kaya o Apimeleki vei Aisake, “Mo biuta na neimami vanua. O sa yaco mo rui kaukauwa cake sara mai vei keimami.” 17Sa qai biuta na vanua o ya o Aisake ka la'ki vakaitikotiko ena Buca o Kira. 18Sa qai kelia tale yani na veikeliwai era sa kelia ena gauna i Epara-ama na tamana, ka ra a buluta na kai Filisitia ena gauna sa mate kina o Epara-ama. A sa vakayacani ira o Aisake ena veiyaca kece a sa vakatokai ira kina o tamana.
19Era sa qai kelia e dua na i keliwai ena buca na tamata i Aisake, ka ra qai kunea e dua na mata ni wai. 20O ira na i vakatawa ni manumanu mai Kira era sa veileti kei na i vakatawa ni manumanu i Aisake, ka ra kaya, “Na wai oqo e neimami.” A sa vakatoka kina o Aisake me yaca ni keliwai o ya o Eseki,#26.20 Eseki kena i balebale veileti. baleta ni ra a veileti kei koya.
21Era sa qai kelia tale e dua na i keliwai na tamata i Aisake, ka ra sa veiletitaka tale, a sa qai vakatoka kina o koya me yacana o Sitina.#26.21 Sitina kena i balebale veisaqasaqa. 22A sa lako mai kea ka la'ki kelia tale e dua na i keliwai, ka sega ni dua na veileti e yaco kina; a sa vakatoka kina me yacana o Riopoci,#26.22 Riopoci kena i balebale galala se rumu. ni sa kaya, “Sa qai solia vei keda ko Jiova na galala ena vanua oqo, ka na yaco me da vuavuai kina.”
23Sa qai lako mai kea o Aisake ki Perisepa. 24Ena bogi o ya, sa rairai kina vua ko Jiova, ka kaya, “Oi au na Kalou i Epara-ama na tamamu. Mo kakua ni rere, ka ni'u sa tiko kei iko. Au na vakalougatataki iko kei ira na nomu kawa, ena vuku ni noqu yalayala vua na noqu tamata o Epara-ama.” 25A sa tara cake mai kea e dua na i cabocabonisoro o Aisake ka qaravi Jiova kina. Sa qai cakava e kea na nona i tikotiko, ka ra kelia na nona tamata e dua tale na i keliwai.
Na Veiyalayalati i Aisake kei Apimeleki
26A sa lako mai Kira o Apimeleki me mai raici Aisake. A salavata mai kei koya o Ausaci na nona daunivakasala kei Fikoli na komada ni nona mataivalu.#Vteki 21.22 27A tarogi iratou o Aisake ka kaya, “A cava dou mai raici au kina, ni dou sa cati au ka vakatalai au tani mai na nomudou vanua?”
28E ratou sa kaya vua, “Keitou sa qai kila ni tiko vakaidina kei kemuni ko Jiova, ka keitou sa nanuma kina me caka mada e dua na nodatou veiyalayalati. Keitou gadreva mo ni yalataka 29ni o ni na sega ni cakava e dua na ka ca vei keitou, ka keitou na sega talega ni cakava e dua na ka ca vei kemuni. Keitou a caka vinaka vei kemuni, baleta ni keitou a vakatalai kemuni yani vakavinaka. Ia oqo, sa matata vakasigalevu ni sa vakalougatataki kemuni ko Jiova.” 30A vakarautaka o Aisake e dua na magiti vei iratou, ka ratou sa kana ka gunu. 31Ena siga ka tarava, e ratou a yadra sara vakamataka ka cavuta yadudua na nodratou bubului. A sa qai vakamoce vei iratou o Aisake, ka ratou mai veitawasei yani ena vakacegu.
32Ena siga vata o ya, era sa lako mai na tamata i Aisake ka kaya vua na ka me baleta na i keliwai era sa kelia. Era sa kaya, “Keimami sa kunea na wai!” 33A sa vakatoka na i keliwai o ya me yacana o Sepa;#26.33 Sepa: Vosa vakaiperiu ka kena i balebale vosa bubului ka sa vakatokai kina na koro o ya me yacana o Perisepa#26.33 E kena i balebale keliwai ni vosa bubului se keliwai e vitu me yacova mai na siga edaidai.
Yalewa Tani e Vakawatitaka o Iso
34Ni sa yabaki 40 o Iso, a sa qai vakawatitaka e lewe rua na yalewa ni Itaiti, o Jutici na luve i Peri kei Pasemaca na luve i Eloni. 35O rau oqo erau sa kauta vakalevu mai na loma rarawa kei na dredre ni bula vei rau o Aisake kei Repeka.
Actualmente seleccionado:
VAKATEKIVU 26: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
