LAKO YANI 5
5
O Mosese kei Eroni ena Mata i Tui Ijipita
1Ni sa oti o ya, e rau a qai lako o Mosese kei Eroni vei tui Ijipita ka kaya vua, “Sai koya oqo na vosa i Jiova, na nodra Kalou na Isireli, ‘Mo laivi ira na noqu tamata me ra lako, me rawa ni ra la'ki qarava na solevu tabu ena vukuqu ena vanua lala.’ ”
2Ia sa qai kaya na tui, “O cei ko Jiova? A cava me'u mai vakarorogo kina vua ka laivi ira na Isireli me ra lako? Au sa sega ni kilai Jiova, ka'u na sega ni laivi ira na Isireli me ra lako.”
3E rau a kaya, “Na nodra Kalou na Iperiu sa vakatakilai koya vei keirau. Mo laivi keimami mada me keimami lako me tolu na siga ki na vanua lala ka vakacaboisoro vei Jiova, na neimami Kalou. Ia kevaka e sega, ena vakavuna o koya me tauvi keimami na veimate ca, se keimami na vakarusai ena i seleiwau.”
4A sa kaya na tui Ijipita vei rau o Mosese kei Eroni, “A cava o drau sa via kauti ira tani kina na tamata mai na nodra cakacaka? Drau lesu tale kei ira na bobula ki na nomuni cakacaka!” 5Raica oqo, sa levu cake na kemuni i wiliwili mai vei ira na kai Ijipita, ia o drau sa qai via vakacegui ira mai na nodra cakacaka!”
6Ena siga vata ga o ya, a sa veivakaroti na tui vei ira na i vakatawa ni bobula kai Ijipita kei ira na i liuliu ni matacakacaka kai Isireli me vakaoqo: 7“Ni kakua ni solia vei ira na co me ra buli biriki kina me vaka eliu. Laivi ira me ra la'ki kauta mai na co me ra mai bulibuli kina. 8Ia me ra rawata tikoga na i wiliwili ni biriki ka dau rawa e liu, ka me kakua ni vakalailaitaki o ya, baleta ni ra sa rui vucesa; oqori na vuna era sa tagi kina ka kaya, ‘Laivi keimami me keimami lako ka vakacaboisoro vua na neimami Kalou.’ 9Me vakabibitaki na cakacaka e soli vei ira; era na qai cakacaka vakaukauwa kina ka sega ni vakarorogo ki na vosa e veivakacalai.”
10Era sa qai lako yani na i vakatawa ni bobula kei ira na i liuliu vakacakacaka ka kaya vei ira na tamata, “Sa kaya vakaoqo na tui, ‘Au na sega ni solia vei kemuni na co. 11Ni lako ka kauta mai na co vakataki kemuni mai na veivanua ga e rawa mo ni kunea kina, ia na nomuni cakacaka ena sega ni vakalailaitaki sobu.’ ” 12Era sa mani veilakoyaki yani na tamata ena vanua taucoko o Ijipita me ra vakasaqaqara ka kauta mai na co. 13Era a vakusakusataki ira tikoga o ira na i vakatawa ni bobula ka kaya, “Ni vakatotolotaka na cakacaka, ka me tautauvata ga ena kena eliu ni a dau vakarautaki rawa tu na co.” 14Era sa vakanakuitataki talega o ira na nodra i liuliu vakacakacaka na Isireli, o ira sa lesi mai vei ira na i vakatawa ni bobula ni tui, ka sa tarogi, “A cava na vuna o ni sega ni vakaotia kina na i wiliwili ni biriki ka dodonu me rawa ena noa, ka vakakina edaidai me vaka e liu?”
15Era sa qai rairai yani vua na tui o ira na i liuliu vakacakacaka ni Isireli, ka kaya, “Kemuni saka na tui, a cava na vuna o ni sa vakalolomataki keimami kina vakaoqo na nomuni bobula? 16Sa sega ni soli vei keimami na co, ia era sa kaya vei keimami, ‘Ni buli biriki!’ Ia mo ni raica mada na moku vakaloloma sa vakayacori vei ira na nomuni bobula! Sai ira ga na nomuni tamata era sa caka cala.”
17A sa sauma ga na tui ka vaka, “O ni sa rui vucesa ga ka sega ni via cakacaka, ka ni o ya na vuna o ni kaya kina me'u sereki kemuni ka mo ni la'ki vakacaboisoro vei Jiova. 18Ia oqo, ni lesu tale ki na nomuni cakacaka! Ena sega ni soli tale vei kemuni na co, ia mo ni rawata tikoga na i wiliwili ni biriki sa gadrevi vei kemuni.” 19Era sa kila sara na i liuliu vakacakacaka ni Isireli na veika dredre era sa sota kaya oqo mai na kena tukuni vei ira me ra rawata tikoga na i wiliwili ni biriki sa gadrevi vei ira.
20Ni ra lesu tale tiko mai vua na tui, era a sotavi Mosese kei Eroni, ni rau sa waraki ira tiko. 21Era a kaya vei Mosese kei Eroni, “Sa raica ko Jiova na veika drau sa cakava, ka na totogitaki kemudrau vakakina baleta ni drau sa vakavuna na nodra cati keimami na tui kei ira na nona vakailesilesi. O drau sa solia vei ira na i ulubale me ra vakamatei keimami kina.”
Sa Yalataka na Veisereki ko Jiova
22A sa vuki tale vei Jiova o Mosese ka kaya, “Kemuni na Turaga, a cava o ni sa vakasosataki ira kina vakaoqo na nomuni tamata? A cava o ni a vakatalai au mai kina kike? 23Me tekivu mai na gauna ka'u a lako kina vua na tui ka vosa ena vukumuni, a sa qai vakatekivu me vakacacani ira vakaca sara na nomuni tamata. Ia oqo, o ni sa sega ni vakayacora e dua na ka me ra vukei kina!”
Actualmente seleccionado:
LAKO YANI 5: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
