LAKO YANI 11

Ai Katini ni Totogi: Mate o Ira na Ulumatua

1A sa kaya vei Mosese ko Jiova, “Au na vakatauca tale mai e dua na i totogi vua na tui Ijipita kei ira na nona tamata. Ni sa oti o ya, ena qai laivi kemuni o koya mo ni lako. O koya ena cemuri kemuni tani mai na vanua oqo. 2Mo vosa vei ira na Isireli ka tukuna vei ira kece sara me ra kerea mai vei ira na tamata era sa tiko veivolekati na i ukuuku siliva kei na koula.” 3A sa vakauqeti ira na kai Ijipita ko Jiova me ra lomani ira na Isireli, ka yaco me ra rokovi Mosese na vakailesilesi ni tui kei ira na tamata. 4Sa qai kaya o Mosese vua na tui, “Sa kaya vakaoqo ko Jiova: ‘Ena lomaloma ni bogi au na qai lako voli ena nodra i tikotiko na kai Ijipita, 5ka ra na mate kece sara na ulumatua tagane ena vanua o Ijipita. Me tekivu mai na ulumatua tagane ni tui, o koya ena dabe ena i dabedabe vakatui me yaco sara ki na ulumatua ni yalewa bobula o koya e qaqi sila tiko ena i qaqi. Era na mate talega na ulumatua kece ni manumanu. 6Ena qai yaco e dua na veitagicaki levu ena vanua o Ijipita me vaka a sega ni se bau yaco vakadua e liu se me na yaco mai muri. 7Ena sega mada ga ni dua na koli me na kodrovi ira na Isireli se na nodra manumanu. O ni na qai kila kina ni'u sa vakayacora e dua na i vakatakilakila oi au, ko Jiova, me dusia na duidui e tiko ena kedra maliwa na kai Ijipita kei ira na Isireli.’ ” 8A sa qai tinia o Mosese na nona vosa ka kaya, “Era na qai lako kece mai vei au na nomu vakailesilesi kece sara, ka cuva sobu e mataqu ka vakamasuti au me'u kauti ira na kai noqu ka lako tani yani. Ni oti o ya, au na qai lako.” A sa qai lako tani mai na mata ni tui o Mosese ena cudru katakata.

9A sa qai kaya vei Mosese ko Jiova, “Ena sega tikoga ni vakarorogo vei iko na tui, ka me rawa kina me'u na cakava tale mada eso na noqu cakacaka mana ena vanua o Ijipita.” 10E rau a qai cakava o Mosese kei Eroni na cakacaka mana kece oqo ena mata ni tui, ia sa vakaukauwataka ga na loma i tui Ijipita ko Jiova, ka mani sega ni laivi ira kina na Isireli me ra biuta na nona vanua.

Actualmente seleccionado:

LAKO YANI 11: FNV

Destacar

Copiar