EFESO 2

Mai na Mate ki na Bula

1 # Kolo 2.13 E liu o ni a mate tu vakayalo ena talaidredre kei na i valavala ca. 2O ni a muria na i tovo ca ni vuravura oqo; o ni a muria na nodra i liuliu na veikaukauwa vakayalo ena maliwa lala, sai koya na yalo sa lewai ira tu na tamata era talaidredre vua na Kalou. 3Oi keda kece eda a vakataki ira tale tu ga eliu ena noda muria na gagadre ca ni yagoda, ka vakayacora na dodomo ni yagoda, kei na noda vakasama, ka sa dodonu me da sota kaya na cudru ni Kalou me vakataki ira o ya.

4Ia na Kalou, o koya sa sinai ena yaloveivosoti, sa ka levu sara na nona lomani keda, 5ka sa kauti keda lesu mai ena noda mate tu vakayalo ena noda talaidredre me da bula vata kei Karisito. O ni sa vakabulai ena vuku ga ni lolomasavu ni Kalou. 6Sa vakaturi keda cake vata kaya ka vakatikori keda vata kei Karisito ena veiyasana vakalomalagi. 7Me vakaraitaka kina ena veigauna e muri ni sa sinai sara ena lolomasavu na Kalou, ka yalovinaka vei keda ena vuku i Karisito Jisu. 8Ni sa lolomasavu walega ni Kalou o ni sa vakabulai kina ena vuku ni vakabauti Karisito. O ni sega ni cakacakataka; ia sai solisoli walega ni Kalou. 9E sega ni vua ni cakacaka, me kakua ni dua me dokadokai koya kina. 10Ni sa buli keda na Kalou me da vakataka ga na keda i tuvaki oqo, kei na noda semati kei Karisito Jisu sa vakayacori keda kina me da cakava na i valavala vinaka ka sa vakarautaka taumada na Kalou ena vukuda.

Na Duavata ena Vuku i Karisito

11E dodonu mo ni kila ni o ni a kai matanitu tani, ka vakatokai mo ni tawa cili mai vei ira era cili, o ya o ira na Jiu. Na veicilivi sai koya na ka e dau caka ki na yagodra na tagane. 12Ena gauna o ya o ni sa bera ni tu vata kina kei Karisito. O ni sa bera ni matanitu vata kina kei ira na Isireli, ka sega kina ni nomuni na ka e yalataki ena veiyalayalati. E a sega na nomuni i nuinui ka sega ni vakabauta na Kalou dina e vuravura. 13Ia edaidai, ena nomuni sa tu vata kei Karisito, o ni sa qai kau vakavoleka mai kina oi kemuni ka dau tu vakayawa eliu ena vuku ni dra i Karisito. 14Ni sai koya na vu ni noda veivinakati tale, a sa vakayacori keda vata na Jiu kei na kai veimatanitu tani me da duavata ga, ka sa basuraka kina na bai dauveitawasei ni veicati. 15#Kolo 2.14A sa muduka sara ena yagona na Karisito na nodra Lawa na Jiu ka sa okati vata na kena i vakaro kei na kena i valavala, me rawa ni bulia cake kina mai na rua na kawa tamata e duabau ga na uma tamata vou sa semati ki vua, ka sa yaco kina vakaoqo na veivinakati. 16#Kolo 1.20Me vakaveivinakatitaki rau ruarua vua na Kalou ena duabau ga na yago, ka me muduki vakadua sara kina na veicati ena vuku ni kauveilatai. 17#Aisea 57.19A sa lako mai kina na Karisito ka vunautaka na i Tukutuku Vinaka ni veivinakati vei kemuni kece sara; vei kemuni na kai matanitu tani ka o ni sa yawa sara mai vua na Kalou, ka vakakina vei ira na Jiu, o ira sa volekati koya. 18Ni sa rawa ga ena vuku i Karisito me da torova rawa kina na Tamada ena Yalo e duabau ga oi keda kecega, na Jiu kei na kai matanitu tani.

19O koya oqo kemuni na kai matanitu tani, o ni sa qai sega kina ni wili vakavulagi tikoga se kai tani; ia o ni sa koro vata ga kei ira na tamata vakabulai ka lewe ni nona vuvale na Kalou. 20O kemuni talega sa vakayavutaki ena nodra yavu na i apositolo kei ira na parofita, ka sai vakadei ena tutu-ni-vale na Karisito. 21Sa i koya ga sa vesuka vata na i sema ni veitiki ni vale taucoko sara, ka sa vakatubura cake me vale tabu sa cabori vua na Turaga. 22Ena nomuni sa semati vua, o ni sa tarai cake vata talega vakakina kei ira na kena vo mo ni i tikotiko ni Kalou sa bula kina na Yalo Tabu.

Actualmente seleccionado:

EFESO 2: FNV

Destacar

Copiar