2 KORINICA 5

Na Vale Vakavuravura kei na Vale Vakalomalagi

1Ia keitou sa kila, kevaka sa rusa na neitou vale vakavuravura, na yago i keitou sa dua na neitou vale mai vua na Kalou, na vale sa sega ni caka ena liga, sa vale sega ni rusa rawa mai lomalagi. 2Ni keitou tiko ena vale oqo keitou sa vutugu ka gadreva me keitou vakayagataka na neitou vale mai lomalagi. 3Ni keitou sa na vakaisulu kina sa na sega ni kune na neitou luvawale. 4Ni keitou tiko ena vale vakavuravura oqo, keitou sa vutugu ena kena tara-bi, oqo e sega ni vu mai na neitou cata na vale yago vakavuravura, ia keitou vinakata na kena vakalomalagi; me tiloma kina na ka sa mate rawa, na bula. 5Na kalou ga sai koya sa vakarautaki keitou ki na ka oqo ka sa solia vei keitou na Yalona me kena i vakadinadina ni veika ena solia mai e muri.

Keitou sa Yaloqaqa Tikoga

6Sa i koya oqo keitou sa yaloqaqa tikoga kina, ni keitou kila ni gauna kecega keitou vakaitikotiko tiko kina ena yago oqo, keitou sa yawa tiko mai na i tikotiko ni Turaga. 7Ia keitou sa bula tikoga ena vakabauta ka sega ena vuku ni neitou sa raica sara na ka. 8Keitou sa doudou, ka vinakata cake me keitou sa tawase kei na yago oqo ka tiko vata kei na Turaga. 9Keitou tiko e ke, se keitou tiko mai kea, sa neitou i naki me keitou vinaka vua na Turaga. 10#Roma 14.10Ni da na rairai kece ena mata ni tikotiko ni veilewai i Karisito; me na dui taura na tamata yadua na kena i sau, me vaka na ka sa cakava ki na yagona, se vinaka se ca.

Na Veiwekani kei na Kalou ena Vuku i Karisito

11Keitou sa kila tu, na cava na rerevaka na Kalou, sai koya keitou sa vakamasuti ira kina na tamata. Ia sa kilai keitou vinaka sara tu na Kalou, ka'u nuitaka ni o ni sa kilai keitou vinaka talega. 12Keitou sa sega ni tukuni keitou tale yani vei kemuni, ia keitou solia ga yani vei kemuni mo ni lewa vaka i kemuni na ka mo ni sakitaki keitou kina. Me bau so kina na ka o ni kaya vei ira era dau sakitaka ga na i rairai ni tamata e sau ka sega na yalo e loma. 13Kevaka keitou sa lialia sa vakakina ena vukuna ga na Kalou, ia kevaka sa sega ni lialia, sa vakakina ena vukumuni. 14Ni sa lewai keitou na loloma i Karisito; keitou sa kila deivaki ni a sa mate oti e dua na tamata ena vuku ni tamata kecega, o koya oqo sa vakaivotavota kece kina na tamata ena nona mate. 15Sa mate o koya ena vuku ni tamata kecega, me ra kakua kina ni bula ga ena vukudra o ira era sa bula tiko, ia me ra bula ga ena vuku i koya sa mate ka vakaturi cake tale ena vukudra.

16Ia me tekivu oqo ka lako yani, keitou sa na sega tale ni qai doka e dua na tamata ena vuku ni ka vakayago. E dina ga ni dua na gauna keitou dokai Karisito ena i tovo ni rai vakayago, ia oqo sa sega ni qai vakakina. 17O koya vakayadua sa semati vei Karisito sa qai buli vou; sa takali na veika makawa; raica, sa basika e dua na bula vou. 18Sa cakava na ka kece oqo na Kalou, o koya sa veisautaki keitou mai na nona meca ka me keitou sa nona i tokani voleka ena vuku i Karisito, ka sa solia vei keitou na i tavi me keitou vakaveiwekanitaki ira na vo ni tamata kei koya, me ra sa nona i tokani voleka talega. 19Na neitou i tukutuku o ya ni sa vakayacori ira na tamata kece sara na Kalou me ra wekana ka nona i tokani voleka ena vuku i Karisito. Sa sega ni maroroya na i tukutuku ni nodra i valavala ca na Kalou, ka sa solia vei keitou na cakacaka ni kena vunautaki na i tukutuku ni veivinakati.

20O keitou oqo sa matataki Karisito, ka sa vakamamasu tiko na Kalou ena gusu i keitou. Keitou sa vakamasuti kemuni kina ena vuku i Karisito, mo ni veivinakati kei na Kalou. 21Ena vukuda ga sa vakayacora kina na Kalou me valavala ca o koya sa sega na nona i valavala ca, me da yaco rawa kina oi keda me da nona tamata yalododonu na Kalou.

Actualmente seleccionado:

2 KORINICA 5: FNV

Destacar

Copiar