1 CESALONAIKA 4

Na Bula e Vinakata na Karisito

1Keitou a sa vakaraitaka vei kemuni na veiwekani na i tovo ni bula sa vinaka vua na Kalou; sa dina o ni sa vakayacora tiko, ia keitou kerea ka vakamasuti kemuni mo ni vakayacora vakavinaka cake sara. 2Me vaka ni o ni sa kila tu na veivakaro keitou a vakarota vei kemuni ena vuku ni Turaga ko Jisu, 3ka ni vinakata na Kalou mo ni savasava vakayalo; ka mo ni kakua ni dau veibutakoci. 4Na tagane yadua me kila na sala savasava ka dokai me taura kina na yalewa me watina. 5Me kakua ena garogaro ca me vakataki ira na tawa lotu, era sega ni kila na Kalou. 6Ena vuku ni ka oqo me kakua ni dua na tagane me caka cala kina se via la'ki siova na ka e nona na wekana, ni sa dau veivakatotogitaki na Turaga ena veika oqo. Keitou a sa tukuna oti na ka oqo ka vakaroti kemuni kina vakabibi e liu. 7Ni sa sega ni kacivi keda na Kalou me da vakayacora na i valavala dukadukali eso, ia me da yalosavasava ga. 8Ia o koya sa cata oqo sa sega ni cata walega na lewa ni tamata, ia sa cata ga na Kalou, o koya sa solia vei kemuni na nona Yalo Tabu.

9Ena vuku ni veilomani vakaveitacini, sa sega ni yaga me dua e vola tale yani oqo vei kemuni. O ni sa vakavulici kece mai vua na Kalou ena ka oqo mo ni dauveilomani. 10Sa dina sara ni o ni sa daulomani ira na veiwekani kece mai Masitonia raraba. Ia keitou sa vakamasuti kemuni na veiwekani mo ni vakayacora vakalevu cake sara. 11Me nomuni i naki dei mo ni tiko vinaka kei ira na tani, mo ni dui qarava ga na ka e nomuni yadua ka cakacaka ena ligamuni mo ni rawata kina na nomuni bula me vaka keitou a vakarota vei kemuni. 12Ena sala oqo, era na vakarokorokotaki kemuni kina na tawa lotu, ka o ni na sega talega ni vakararavi kina vua e dua tale na tamata me baleta na veika mo ni bula kina.

Na Lesu Tale Mai ni Turaga

13Kemuni na veiwekani, keitou sa sega ni vinakata mo ni sega tu ni kila na veika e baleti ira era sa mate, ka mo ni kakua kina ni rarawa, me vakataki ira sa sega na nodra i nuinui. 14Ia me vaka ni da sa vakabauta ni sa mate ko Jisu ka sa tucake tale mai na mate, ena vaka talega kina o ira era sa mate ka ra sa tu vata kei Karisito ena nodra vakabauta; na Kalou ena kauti ira vata mai kei Jisu.

15 # 1Kori 15.51,52 Keitou sa tukuna vei kemuni na ka oqo me vaka na vosa ni Turaga, o ya ni da na sega ni liu vei ira era sa mate oi keda eda se bula tiko ena gauna sa lako tale mai kina na Turaga. 16Ni na rogovaki taumada na domo ni kaila, a domo i koya na agilosi turaga, kei na domo ni davui ni Kalou, ena qai lako sobu mai lomalagi na Turaga. O ira era sa mate oti ka ra sa vakabauti Karisito era na tucake taumada; 17emuri oi keda eda bula donumaka na gauna o ya, ka vakasoqoni vata yani kei ira ena veio me da sota kei na Turaga ena maliwa lala. Eda na qai tiko vata vakakina kei na Turaga ka sega ni mudu. 18O koya oqo mo ni qai ia na veivakayaloqaqataki vakai kemuni ena veivosa oqo.

Actualmente seleccionado:

1 CESALONAIKA 4: FNV

Destacar

Copiar