1 KORINICA 6

Na Nodra Dau Veilewaitaki Ira na Wekadra Era Lotu o Ira Mai Korinica

1Kevaka e dua vei kemuni sa veileti kei na wekana lotu Vakarisito, a cava na vuna o ni qai kauta kina na leqa o ya me lewai mai vua na turaganilewa tawa-lotu, ka sega ni kauta ga vei ira na tamata ni Kalou me ra walia? 2O ni sa sega beka ni kila ni ra na lewai vuravura o ira na tamata ni Kalou? Ia kevaka o ni na lewai vuravura vakaoqo, sa sega beka ni rawa vei kemuni mo ni vakataulewataka na veika lalai walega? 3O ni sa sega beka ni kila ni da na lewai ira na agilosi? Ena qai levu cake sara vakaidina ena veika ni bula oqo! 4Kevaka ena basika cake mai eso na ka vakaoqo, o ni na kauti ira beka yani me walia na nodra leqa o ira na tamata era sa sega ni vakaitutu ena loma ni lotu? 5Sa vakamadua dina! E dodonu me na tiko e dua na tamata yalomatua ena kemuni maliwa me vakatulewa ena nodrau veiba na veiwekani lotu Vakarisito. 6Ia oqo, sa rau veikau ga vakataki rau na veiwekani lotu Vakarisito ki na mataveilewai me qai la'ki vakataulewataka na nodrau kisi ni veilewai o ira na turaganilewa tawa-lotu!

7Na kena sa la'ki biu vakalawa ki na mataveilewai na nomuni kisi ni veileti vakai kemuni sa vakaraitaka na nomuni malumalumu ni o ni sa vakadrukai. Ena sega beka ni vinaka cake mo ni vakacalai? Ena sega beka ni vinaka cake mo ni butakoci? 8Oi kemuni ga sa ia tiko na veivakacalai vakai kemuni kei na veibutakoci vakai kemuni, vei ira sara mada ga na wekamuni vakayalo! 9O ni sa kila vakaidina ni ra na sega ni taukena na matanitu ni Kalou o ira era i vakarau tawadodonu. Ni kakua sara ni vakacalai ena ka oqo! Era na sega ni rawata na matanitu ni Kalou o ira na daudara, se dauqarava na matakau, se dauveibutakoci, se veidauci vakatagane, se veidauci vakayalewa, 10se daubutako, se daukocokoco, se daumateni, se dauveivakasewasewani, se o ira na daukovekove. 11Eso vei kemuni era a vaka tu o ya e liu. Ia o ni sa qai vakasavasavataki mai na nomuni i valavala ca; o ni sa cabori me nona na Kalou; o ni sa vakadonui ena yaca ni noda Turaga ko Jisu Karisito kei na Yalo ni noda Kalou.

Me vakalagilagi na Kalou ena Yagomuni

12Sa kaya vakaoqo e dua, “Sa tara vei au na ka kecega.” Sa dina sara; ia sa sega ga ni ra yaga kece vei kemuni. Au rawa ni kaya ni sa tara vei au me'u vakayacora na ka kecega, ia au sa sega ga ni vakatara me vakabobulataki au e dua na ka.#1Kori 10.23 13E dua tale ena kaya, “Sa ka ni kete na kakana, ka sa ka ni kakana na kete.” Sa dina sara; ia ena vakarusai rau ruarua oqo na Kalou. Me kakua ni vakayagataki na yago me ia kina na cakacaka vakasisila ni veidauci, ia me veiqaravi ga vua na Turaga, ni sa vakarautaka o koya na yago. 14Sa i koya na Kalou sa vakatura cake na Turaga mai na mate, ka na vakaturi keda cake talega o koya ena nona kaukauwa.

15O ni sega beka ni kila ni sa veitiki ni yago i Karisito na yagomuni? Me'u na kauta li na tiki ni yago i Karisito ka cakava me ra veitiki ni yago ni yalewa dautagane? E sega ni rawa! 16O ni sega beka ni kila ni tagane ka sa la'ki semati koya vua na yalewa dautagane sa duabau vata kaya vakayago? Ni sa volai tu ena i Vola Tabu, “E rau sa na duabau ga.”#Vteki 2.24 17Ia o koya sa semati koya vua na Turaga sa duabau vata kaya vakayalo.

18Tarovi kemuni mai na veidauci! Na i valavala ca kece sa cakava na tamata sa sega ni vakaitavi kina na yagona; ia o koya sa ia na veidauci sa vakadukadukalitaka na yagona vakai koya ena cala oqo. 19O ni sa sega beka ni kila ni sa vale ni Yalo Tabu na yagomuni, na Yalo Tabu ka sa tiko e lomamuni, o koya ka sa solia vei kemuni na Kalou? O ni sa sega kina ni nomuni vakai kemuni, ia sa nona ga na Kalou;#1Kori 3.16; 2Kori 6.16 20ni sa voli kemuni oti o koya ena dua na i sau. O koya oqo mo ni qai vakarokorokotaka kina na Kalou ena yagomuni.

Actualmente seleccionado:

1 KORINICA 6: FNV

Destacar

Copiar