1 KORINICA 4

O Ira na i Talai i Karisito

1Sa dodonu sara mo ni okati keitou me nona dauveiqaravi na Karisito, ka sa lesi me keitou dauniyau ni veika vuni ni Kalou. 2Sa kilikili kei ira na dauniyau me ra vakadinadinataki ni ra sa tamata yalodina vei ira na nodra turaga. 3Ia vei au, e sega soti ni ka bibi na noqu vakalewai mai vei kemuni se mai na dua na vakalelewa vakatamata; ka'u sa sega mada ga ni dau vakalewai au vakai au. 4Au sa sega ni kila e dua na ka me'u lewai au kina; ia ka'u sa sega ni vakadonui au kina. Sa i koya ga na Turaga sa lewai au. 5O koya oqo mo ni kakua kina ni vakalewa e dua na tamata ni se bera na kena gauna. Me tu vakawawa ga na i otioti ni veilewai me yacova na nona lako mai na Turaga. Ena vakaraitaka mai o koya na veika sa vunitaki tu ena butobuto, ka vakatakila mai na i naki ni lomadra na tamata. Ia sa na qai solia na Kalou ki na tamata yadua na veivakacaucautaki sa veiganiti kaya.

6Kemuni na wekaqu, au sa vagolea na veika oqo vei keirau kei Apolosa, me kena i vakaraitaki vei kemuni. Au vinakata mo ni vulica mai na ka e baleti keirau na i balebale ni kena dau kainaki tu mo ni “muria na kena lawa dodonu” ka kakua ni vakadokadoka e dua, ka qai beci koya na kena i karua. 7O cei sa vakayacori iko mo uasivi cake mai vei ira na kena vo? Se cava sa tu vei iko ka a sega ni soli vei iko? Ia kevaka a soli vei iko, a cava ga o qai la'ki dokadoka voli kina me vaka a sega ni soli vei iko?

8E vakaevei, e sa tu kece li oqori vei kemuni na veika e ganita na nomuni bula? O ni sa vutuniyau li? O ni sa daunilewa beka vaka na tui, ka dina ga ni sa segai oi keitou? Au diva mada ga mo ni sa tui dina sara, me rawa ni keitou okati talega vakatui vata kei kemuni. 9Ni sa vaka me kena i rairai vei au ni sa lesi keitou na i apositolo na Kalou me keitou i murimuri ni ka ena veika kece sara, me vakataki ira sa lewai me ra vakamatei ena matana levu me ra sarava tu o vuravura, kei ira na agilosi, vata kei ira na tamata. 10Keitou sa lialia ena vuku i Karisito, ia o ni sa vuku ena nomuni tu vata kei Karisito! Keitou sa malumalumu, ia o ni sa kaukauwa! Keitou sa beci, ia o ni sa dokai! 11Me yacova mai na gauna oqo, keitou sa viakana ka viagunu; keitou sa vakaisulu vakaca; keitou sa mokulaki; keitou sa veitosoyaki voli ga ni sa sega na neitou i tikotiko tudei; 12keitou sa vakaocai keitou sara ena cakacaka vakaukauwa. Ni keitou rukaki se kaseti, keitou sa veivakalougatataki ga; ni keitou vakacacani, keitou sa vosota ga;#Caka 18.3 13ni keitou vosavakacacataki, keitou sa sauma ga ena vosa vinaka. Keitou sa vaka na benu ni vuravura oqo, na duka veluvelu ni ka kecega, me yacova mai na gauna oqo!

14Au sa sega ni vola yani na veika oqo me'u vakamadualaki kemuni kina, ia me'u vakasalataki kemuni ga me vaka na luvequ lomani. 15Ia kevaka era mani lewe 10,000 na nomuni dauveituberi ena nomuni bula Vakarisito, sa duabulu ga na tamamuni. Ni'u sa yaco me'u tamamuni oi au ena vuku i Karisito ena noqu kauta yani vei kemuni na i Tukutuku Vinaka. 16O koya oqo au sa vakamasuti kemuni kina mo ni vakadamurimuri au.#1Kori 11.1; Fpai 3.17 17Ena vuku ni ka oqo ka'u sa talai Timoci yani kina, o koya na luvequ lomani sa yalodina ena veika me baleta na Turaga. Sa na tukuna talega vei kemuni o koya na noqu i vakarau ni bula vou ni keirau sa tu vata kei Karisito, me vaka au sa dau vakatavuvulitaka vei ira na veisoqosoqo lotu ena veivanua kece sara.

18Era sa yaco tiko eso vei kemuni me ra viavialevu baleta ni o ni sa nanuma ni'u sa na sega ni lako yani vei kemuni. 19Kevaka sa lewa vakakina na Turaga, au sa na lako yani vei kemuni ena dua na gauna lekaleka ga oqo; ka me'u na dikeva vakataki au se na kaukauwa cava e tiko vei ira na tamata viavialevu oqori, ka sega walega ni veika era sa tukuna tiko. 20Ni sa sega ni ka vakavosa na matanitu ni Kalou, ia sa ka ga ni kaukauwa. 21A cava e vinaka vei kemuni? Me'u kauta yani vei kemuni na kuita, se me'u lako yani ena loloma kei na yalomalua?

Actualmente seleccionado:

1 KORINICA 4: FNV

Destacar

Copiar