1 KORINICA 16
16
Na i Solisoli me Baleti Ira na i Tokani Vakayalo
1Ia ena vuku ni vakatataro me baleta na i solisoli me kumuni me baleti ira na tamata ni Kalou mai Jutia, mo ni muria ga na veika ka'u sa tukuna vei ira na i soqosoqo lotu mai Kalatia me ra vakayacora.#Roma 15.25,26 2Ena i matai ni siga ni macawa kece sara, na tamata yadua me biuta vakatikitiki eso na i lavo, ka me veiganiti oqo kei na ka o ni sa dui rawata, me kakua tale kina ni caka e dua na kumuni i lavo ni'u sa lako yani. 3Ni'u sa na yaco yani, au na solia vei iratou o ni sa digitaka na i vola ni veivakilaitaki, ka talai iratou yani ki Jerusalemi me ratou kauta na nomuni i solisoli. 4Kevaka e yaga talega me'u lako, e ratou na qai lako vata kei au.
Na i Naki i Paula
5Au na qai la'ki sikovi kemuni yani ni sa oti na noqu talevi Masitonia, ni'u na lako curumi Masitonia.#Caka 19.21 6Au na la'ki tiko vakalekaleka yani vei kemuni, ka rairai tiko donumaka talega na vula i liliwa, ka mo ni qai vukea na tomani ni noqu i lakolako ki na vanua au sa lako kina ni oti o ya. 7Ni'u sa sega ni via raici kemuni walega ka lako sara yani ena noqu lako tiko oqo. Au nuitaka me'u na la'ki tiko mada vakalekaleka kei kemuni ke sa loma ni Turaga.
8Au na tiko ga eke e Efeso me yacova na siga ni Penitiko,#Vsoro 23.15-21; Vrua 16.9-11 #Caka 19.8-10 9ni sa tadola tu oqo vei au e dua na katuba rabailevu ni cakacaka yaga, ia sa lewe levu sara na kena meca.
10Kevaka sa lako yani o Timoci, ni ciqomi koya ka raica me kakua ni rerevaka e dua na ka vei kemuni, baleta ni sa veiqaravi talega o koya vua na Turaga me vakataki au.#1Kori 4.17 11Me kakua ni dua na tamata me beci koya, ia mo ni vukei koya ga me tomana na nona i lakolako ena vakacegu, me rawa kina vua me lesu tale mai vei au; ni'u sa namaki koya tiko kei iratou na veiwekani.
12Ena vuku i Apolosa na wekada, au sa vakauqeti koya vakalevu me la'ki sikovi kemuni yani kei iratou na nona i tokani vakayalo, ia e se sega ni vakadeitaka na lomana me veisiko yani ena gauna oqo. Ena qai lako yani ena gauna sa donu kina vua.
Na Kena i Tinitini
13Ni tu vakarau ena ka kecega, ni tudei ena nomuni vakabauta, ni tamata yaloqaqa, ni vakaukauwa tiko. 14Ni vakayacora na nomuni cakacaka kecega ena loloma.
15O ni sa kila na lewe ni matavuvale i Sitifana; sai iratou na i sevu ni lotu Vakarisito mai Akaia ka ratou soli iratou ki na nodra qaravi na tamata ni Kalou. Au sa vakamamasu kina, kemuni na veiwekani,#1Kori 1.16 16mo ni vakadadamuria na i vakarau ni nodra veiliutaki na mataqali tamata vakaoqo, vata kei ira era cakacaka ka veiqaravi vata kaya.
17Au sa marautaka dina na nodratou lako mai o Sitifana, kei Forituneto, vata kei Akaiko; eratou sa kemuni i sosomi me vaka ni o ni sa sega ni tiko 18ka ratou sa vakayaloqaqataki au vakalevu, me vaka ga na nodratou dau vakayaloqaqataki kemuni. O iratou na tamata vakaoqo me ratou na vakacaucautaki.
19Era sa loloma yani vei kemuni o ira na veisoqosoqo lotu mai Esia. Erau sa loloma vakalevu yani o Akuila kei Virisila, kei ira na lewe ni soqosoqo lotu era sa dau soqoni vata ena nodrau vale.#Caka 18.2 20Era sa loloma kece yani vei kemuni na veiwekani.
Ni veikidavaki vakai kemuni ena i regu savasava.
21Oi au o Paula, ka'u sa vola na i tukutuku ni loloma oqo ena ligaqu vakai au ga. 22Kevaka e dua sa sega ni lomana na Turaga — me cudruvi o koya oqo!
Maranaca — Neimami Turaga, ni lako mai!
23Me tiko kei kemuni na lolomasavu ni Turaga ko Jisu.
24Me tiko kei kemuni kece sara na noqu loloma ena vuku i Karisito Jisu.
Actualmente seleccionado:
1 KORINICA 16: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
