1 KORINICA 11

1Ni vakamurimuri au me vaka au sa vakamurimuri Karisito.#1Kori 4.16; Fpai 3.17

Na Ubi ni Ulu ena Gauna ni Lotu

2Au sa vakacaucautaki kemuni ena vuku ni nomuni dau nanumi au tikoga, ka taura matua na i vakavuvuli au sa vakadewataka vei kemuni. 3Ia au sa vinakata mo ni kila ni sa ulu ni tamata yadua na Karisito; sa ulu ni yalewa na tagane, ka sa ulu i Karisito na Kalou. 4Na tagane yadua, sa masu se vakadewataka tiko na i tukutuku ni Kalou ena gauna ni lotu, ka sa ubi tiko na uluna, sa beci Karisito. 5Na yalewa yadua e masu se vakadewataka tiko na i tukutuku ni Kalou ena gauna ni lotu, ka sa sega ni ubia na uluna, sa beca na watina; sa sega na kedrau duidui kei koya sa tasia vakadua na uluna. 6Kevaka sa sega ni ubia na uluna e dua na yalewa, ena vinaka cake ga me kotiva na uluna. Ia me vaka ni ka vakamadua vua na yalewa me kotivi se tasi vakadua na uluna, sa dodonu kina me ubia na uluna. 7Sa sega ni dodonu vua na tagane me ubia na uluna baleta ni sa vakaraitaka o koya na i yaloyalo kei na lagilagi ni Kalou. Ia na yalewa sa vakaraitaka na lagilagi ni tagane;#Vteki 1.26,27 8ni sa sega ni buli na tagane mai vua na yalewa, ia sa buli ga na yalewa mai vua na tagane.#Vteki 2.18-23 9Sa sega talega ni buli na tagane me baleti koya na yalewa, ia sa buli ga na yalewa me baleti koya na tagane. 10Ena vukudra na agilosi, sa dodonu kina vua na yalewa me ubia na uluna me vakatakila ni sa tiko o koya ena ruku ni veiliutaki nei watina. 11Ena noda bula ena vuku ni Turaga, sa sega ni rawa ni tu vakataki koya ga na yalewa mai vua na tagane, ka sega ni rawa vakakina ni tu vakataki koya ga na tagane mai vua na yalewa. 12Me vaka ni sa buli na yalewa mai vua na tagane, sa vakakina ni sa sucu na tagane mai vua na yalewa; ia sa vu ni veika kecega oqo na Kalou.

13Ni qai lewa mada vakai kemuni: sa kilikili beka vua na yalewa me kakua ni ubia na uluna ena gauna sa masu kina vua na Kalou? 14Sa sega li ni vakatavulica na i tovo vakatamata ni sa ka vakamadua vua na tagane kevaka sa balavu sivia na drau-ni-uluna, 15ia sa ka totoka ga ki vua na yalewa. Ni sa soli vua na drauniulu balavu oqo me nona i ubi. 16Kevaka e dua sa via veiletitaka na ka oqo, ia me'u tukuna ga eke ni sa sega ni neitou i valavala ni sokalou oqo, ka vakakina o ira na veisoqosoqo lotu ni Kalou.

Na i Vakayakavi ni Turaga

(Maciu 26.26-29; Mari 14.22-25; Luke 22.14-20)

17Ena veivakasala e tarava oqo, au sa sega ni vakacaucautaki kemuni, baleta ni sa basika vakalevu cake ga na leqa ka lailai na veika vinaka mai na nomuni veisoqoni ni sokalou. 18Na kena i matai, au sa rogoca ni o ni sa dau veisei ena gauna o ni soqoni kina vakaivavakoso; ka'u sa vakabauta ni sa dina vakatikina ga na ka oqo. 19(E sega ni vakatitiqataki ni yaco dina tiko na tatawasewase ena kemuni maliwa ka me ra na laurai vakavinaka kina o ira era caka dodonu tiko.) 20Ni o ni sa soqoni vata vakaivavakoso, o ni sa sega ni kania vakaidina na i Vakayakavi ni Turaga. 21Ni gauna me ia kina na kana, o ni sa dui kania ga vakailiu na kemuni vakayakavi, ka sa yaco kina me ra viakana tu eso ka ra sa mateni eso tale. 22Sa sega li na nomuni veivale mo ni kana ka gunu kina? Se o ni sa via beca beka na i soqosoqo lotu ni Kalou ka vakamadualaki ira na dravudravua sa sega tu na kedra? Na cava o ni nanuma me'u kaya vei kemuni ena ka oqo? Me'u dokai kemuni beka kina? Sa sega sara ni vakakina!

23Ni'u a ciqoma mai vua na Turaga na i vakavuvuli ka'u sa tukuna vei kemudou: ni sa taura na madrai na Turaga ko Jisu ena bogi sa bukiveretaki kina, 24a sa vakavinavinakataka vua na Kalou, sa qai dovia, ka kaya, “Oqo na yagoqu, sa soli ena vukumudou. Dou vakayacora oqo mo dou dau vakananumi au kina.” 25A sa taura vaka talega kina na bilo ni sa oti na i vakayakavi, a sa kaya, “Na bilo oqo sai koya na veiyalayalati vou ni Kalou, sa vakataudeitaki ena noqu dra. Ena gauna kece dou gunuva kina, dou vakayacora oqo mo dou dau vakananumi au kina.”#Lako 24.8; Jere 31.31-34; Lako 24.6-8

26E kena i balebale oqo ni veigauna kece sara o ni sa kania kina na madrai oqo ka gunu mai na bilo oqo, o ni sa vakatakila tiko na mate ni Turaga me yacova na nona lesu tale mai. 27Ia o koya sa kania na madrai ni Turaga ka gunu mai na nona bilo ena i valavala sa sega ni veidokai, sai valavala ca o koya ena vuku ni yago ni Turaga kei na nona dra. 28Mo ni dui dikevi kemuni kina na tamata yadua ni bera ni o ni kania na madrai ka gunu mai na bilo o ya. 29Kevaka era sa sega ni kila na tamata na i balebale ni yago ni Turaga ena gauna era kana madrai tiko kina ka gunu mai na bilo, era sa kauta ga mai vei ira na veilewai ni cudruvi ena gauna era sa kana ka gunu tiko kina. 30Sa i koya o ya na vuna era sa malumalumu ka tauvimate kina e lewe vuqa vei kemuni, ka ra mate sara kina eso. 31Kevaka eda dikevi keda vakavinaka mada e liu, eda na sega kina ni lewai me da cudruvi mai vua na Kalou. 32Ia eda sa lewai ga ka cudruvi mai vua na Turaga, me da kakua kina ni vakarusai vata kei vuravura.

33O koya oqo, kemuni na wekaqu, ena gauna o ni sa soqoni vata kina mo ni vakayagataka na i Vakayakavi ni Turaga, ni veiwaraki mada. 34Kevaka sa viakana e dua, ia me kana ga mai vale, ka me kakua kina ni cudruvi kemuni na Kalou ena nomuni vakasoqoni vata. Ia me baleta na veika tale eso, au na qai soli vakasala kina ni'u sa lako yani.

Actualmente seleccionado:

1 KORINICA 11: FNV

Destacar

Copiar