Kenese 5
5
O Gafa ma Tausaga o Tupuga, e āfua mai ‘iā Atamu e o‘o ‘iā Noa
(1 No 1.1-4)
1O le tusi lenei i le gafa o Atamu. O le aso na faia ai e le Atua le tagata na ia faia o ia ‘ua fa‘atusa i le Atua.#Kene 1.27-28 2Na ia faia i lā‘ua, o le tane ma le fafine, na ia fa‘amanuia fo‘i ‘iā te i lā‘ua ma na fa‘aigoaina ai o la igoa o “Atamu,” i le aso na faia ai i lā‘ua.#Mata 19.4; Mare 10.6 3Na ola Atamu i tausaga e tasi le selau ma le tolugafulu, ‘ona fānaua lea e ia o lona atali‘i e foliga ‘iā te ia ma fa‘atusa i ai ma ‘ua fa‘aigoaina e ia lona igoa o Setu. 4O aso lava o Atamu talu ‘ina fānauina e ia o Setu e valu selau o ona tausaga ma ‘ua fānaua ai e ia o atali‘i ma afafine. 5O aso uma fo‘i na ola ai Atamu, e iva selau ma le tolu gafulu, o ona tausaga ia; ‘ona oti ai lea.
6Na ola Setu i tausaga e tasi le selau ma le lima, ‘ona fānaua lea e ia o Enosa 7o le olaga fo‘i o Setu talu ‘ina fānauina e ia o Enosa, o tausaga e valu selau ma le fitu ia, ma ‘ua fānaua, ai e ia o atali‘i ma afafine 8o aso uma fo‘i o Setu e iva selau ma le sefulu ma le lua, o ona tausaga ia; ‘ona oti ai lea.
9Na ola Enosa i tausaga e ivagafulu, ‘ona fānaua lea e ia o Kainano. 10O le olaga fo‘i o Enosa talu ‘ina fānauina e ia o Kainano, o tausaga ia e valu selau ma le sefulu ma tausaga e lima ma ‘ua fānaua ai e ia o atali‘i ma afafine. 11O aso uma fo‘i o Enosa e iva selau ma le lima, o ona tausaga ia; ‘ona oti ai lea.
12Na ola Kainano i tausaga e fitugafulu, ‘ona fānaua lea e ia o Maalaelu. 13O le olaga fo‘i o Kainano talu ‘ina fānauina e ia o Maalaelu o tausaga ia e valu selau ma le fagafulu ma ‘ua fānaua ai e ia o atali‘i ma afafine. 14O aso uma fo‘i o Kainano e iva selau ma le sefulu, o ona tausaga ia; ‘ona oti ai lea.
15Na ola Maalaelu i tausaga e onogafulu ma le lima, ‘ona fānaua ai lea e ia o Iareto. 16O le olaga fo‘i o Maalaelu talu ‘ina fānauina e ia o Iareto, o tausaga ia e valu selau ma le tolugafulu ma ‘ua fānaua ai e ia o atali‘i ma afafine. 17O aso uma fo‘i o Maalaelu e valu selau ma le ivagafulu ma le lima, o ona tausaga ia; ‘ona oti ai lea.
18Na ola Iareto i tausaga e tasi le selau ma le onogafulu ma tausaga e lua, ‘ona fānaua ai lea e ia o Enoka. 19O le olaga fo‘i o Iareto talu ‘ina fānauina e ia o Enoka, o tausaga e valu selau ia ma ‘ua fānaua ai e ia o atali‘i ma afafine. 20O aso uma fo‘i o Iareto e iva selau ma le onogafulu ma le lua o ona tausaga ia, ‘ona oti ai lea.
21Na ola Enoka i tausaga e onogafulu ma le lima, ‘ona fānaua ai lea e ia o Metusela. 22Na la feoa‘i fo‘i o Enoka ma le Atua talu ‘ina fānauina e ia o Metusela, i tausaga e tolu selau ma ‘ua fānaua ai e ia o atali‘i ma afafine. 23O aso uma fo‘i o Enoka e tolu selau ma le onogafulu ma le lima, o ona tausaga ia. 24Na la feoa‘i fo‘i o Enoka ma le Atua, ‘ua lē iloa fo‘i e ia, auā na ‘avea o ia e le Atua.#Epe 11.5; Iuta 14
25Na ola Metusela i tausaga e selau ma le valugafulu ma tausaga e fitu, ‘ona fānaua ai lea e ia o Lameko. 26O le olaga fo‘i o Metusela talu ‘ina fānauina e ia o Lameko, o tausaga ia e fitu selau ma le valugafulu ma tausaga e lua ma ‘ua fānaua ai e ia o atali‘i ma afafine. 27O aso uma fo‘i o Metusela e iva selau ma le onogafulu ma le iva, o ona tausaga ia; ‘ona oti ai lea.
28Na ola Lameko i tausaga e selau ma le valugafulu ma tausaga e lua, ‘ona fānaua ai lea e ia lona atali‘i, 29ma ‘ua fa‘aigoaina e ia lona igoa o Noa,#5.29 Noa: mai le gagana Eperu; “‘ua mapu.” o lo‘o fa‘apea, “E fa‘amafanafanaina i tatou e ia i la tatou galuega ma le tigā o tatou lima, ‘ona o le lau‘ele‘ele ‘ua malaia i le ALI‘I.” 30O le olaga fo‘i o Lameko talu ‘ina fānauina e ia o Noa, o tausaga ia e lima selau ma le ivagafulu ma tausaga e lima ma ‘ua fānaua ai e ia o atali‘i ma afafine. 31O aso uma fo‘i o Lameko e fitu selau ma le fitugafulu ma le fitu, o ona tausaga ia, ‘ona oti ai lea.
32‘Ua lima selau tausaga o Noa, ‘ona fānaua ai lea e Noa o Semu ma Hamo ma Iafeta.
Actualmente seleccionado:
Kenese 5: RSCB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Revised Samoan Catholic Bible © Bible Society of the South Pacific, 2010.
