Luk 24

Yesu mislikiɗ ti wuzla mumucahay

(Yo pura Mat 28.1-10; Mark 16.1-8; Zaŋ 20.1-10)

1Dimas cẽht ngi miprik prik na, ngwasay a ram nga mi zivi ti mal ati urdihey, taŋ miɗiyaka taŋ tuwaŋ. 2A ra lumaka ɗugur i migidigila le kileŋ avu mi ngi zivi. 3Taŋ micam na, a lumaka vagay ngi Buy Yesu ta. 4A ga taŋ welele teˀ. Keɗ na, mizli cuw a bigaka taŋ vu, zana minjazlazl njazlazl ɓaˀ ɓaˀ avu vu. 5Ngwasay tuwa a zluwunam haɗa, midibiɗ jik jik a ruwuy. Mizli tuwa a ɓaka taŋ: «Mbur misi ti siifa ma na, ki ram ti sipakaŋ a wuzla mizli mumucahay mbri maka? 6N'anta aka ta, a slikiɗ le. Wulkaka ɓi naŋ muɓukum di zleˀe ti naŋ misi a Galile na. 7A ɓi zleˀe na: ‹Anja sey a vulaka Mangal ngi mbur asi haŋ ngi mizli migi mungrahay, anja a dirakaŋ avu dum, yo ɓa angi hin mimakir naŋ na, a sa slikiɗi.›» 8Dar a wulkaka mingiɓi ngi Yesu so. 9A mam ti mi zivi, ara slufaka ɓi nah gar da mizli ngi si Yesu mukuruˀ ngaŋ kaˀhaya waɗ da mizli mekelemey gar. 10Ngwasay vuna, i ti Mariya ngi Magdala, Zan ati Mariya, mumuŋ ngi Zak. Cil taŋ mekelemey ara slufaka ɓi nah da misliney aya. 11Misliney a tiɓaka ɓi ngi ngwasay na ta, taŋ a waka kaɓa a ɓam di i ɓi ngi gilaway. 12Amma Piyer a slikiɗ, a kil ngra mi zivi, a guɓ guɓ nga huroˀo. Keɗ keɗ na, gwat anta, sey gabagahay sek tewle. Dar a mi a muŋ, gwat migi hana, a zumaŋ hirnga le.

A jiviɗ ngi Emawus

(Yo pura Mark 16.12-13)

13Dambala tapasa vuna si na, mizli cuw a wuzla mizli ngi si Yesuhoy a ra ram ng'ar walahay mekelem ada, mazilaka Emawus. A gi kilometir kuruˀ ngaŋ kaˀa avu Zeruzaleme. 14A ra kiɗaka slir ngi gwat migi hana gar ar wala taŋ. 15Yo ti taŋ mira ɓam, taŋ mira kiɗaka slir naŋ na, Yesu vuna a sa luuma taŋ, a ram bumoˀ. 16Tˀada puraka ngbaŋ, amma gwat a tika taŋ le, ɓa a sinakaŋ ta. 17Yesu a ɓa taŋ: «Kum maram bal na, ti kiɗa slir ngi mike?» Dar a cicam dedeŋ, ara ndurɓom hiri. 18Mbur pal a wuzla taŋ mazilaka Kleyopas a mbiɗaŋ di: «Mbur mulak a Zeruzalem micina gwatay migam ar hin hanayna ta na, i ka pal ɗiki.» 19A ɓa taŋ: «I gwat mihey migam ska?» A mbiɗakaŋ di: «Gwat migi avu Yesu mbur Nazarete! Naŋ i mijiviɗ migidaŋ ngi gi slra ati ngi ɓi ɓi a mbuŋ Buymisemuŋ waɗ a mbuŋ mizli gar. 20Masay madiɗa ndrahay ati mizli mucawwa ndrahay a vulakaŋ ɓa a gakaŋ kiita ngi mucu, yo a dirakaŋ avu dum mizliraŋ. Amma wãˀ naŋ vuna ma na, zle ti gwat tayna migam na, hana i hin mimakir naŋ si. 21Ndr'i waka zleˀe na, kaɓa i mbur masa laha Israyeley. 22Ngwas mekelemey a wuzla ndra, a slufam ndra ɓi muzuma ndra hirnga le ma, asi nga dana, cẽht ngi miprik prik na, a ram nga mizivi, 23ko a lumaka vagay ngi Yesu ta. A moko, a ɓam ndra na, a puram modro ngi Buymisemuŋhoy le, a ɓaka taŋ, Yesu, naŋ da ti siifa. 24Cil ndra mekelemey kwana, a ram le nga mizivi aya, yo gwat taŋ mulumaka gar na, taŋ kasl kasl ka ngi ngwasay miɓaka ɓi naŋ tuwa, amma a puraka Yesu vuna ta.» 25Dar Yesu tuwa a ɓa taŋ: «Kayya, kum mizli manja lesley, ɓi mijiviɗey miɓaka gar na, mevel kumo tiɓa zayãˀ zayãˀ haɗi. 26A ɓam na: Anja sey Mesi a si bonoy seˀ le, ɓa a sa ci angi dudok naŋ takwa?» 27Dar a biga taŋ wala ngi Ɓimutoho miɓi vur naŋ gar. A zlo di avu ɗerewol ngi Moyis, hã bal bal ti ɗerewol ngi mijiviɗeye gar.

28Ti taŋ mindilam gweˀ avu walahay, taŋ maram nga ra tuwa na, Yesu a gi kaɓa a cuh kileŋ nga mbuŋ ava. 29Amma a tikakaŋ, a ɓakaŋ: «Cifi ati ndra, asi pas anta mata, yo hiikuɗ ara ji si.» Joˀ a ci ngi haya, a cifam bumoˀ. 30Ti naŋ micifi ɓa a zumam ati taŋ na, a zuɓa ɗaf, a ɗuwul mi anga, a ngila, dar a vula taŋ di. 31Ar nah so na, hiri taŋ a wun, a sinakaŋ le muduba. Joˀ a susuyum a mihiri taŋ susuyum. 32Dar a ɓam ar wala taŋ: «Ti naŋ maɓa ndra, yo naŋ mabiga ndra wala ngi Ɓimutoho a jiviɗ na, ɓi nah a ga ndra vekeɗ vekeɗ a mevele ta mbrike?»

33A slikiɗam a haŋhaŋ si, a mam nga Zeruzaleme a muŋ. A ra lumaka mukuruˀ ngaŋ kaˀhaya, a kusom le ati cil taŋhaya. 34Joˀ a ɓaka taŋ: «Buy Yesu tuwa a slikiɗ le ti wuzla mumucahaya gisiŋ gisiŋ! Yo a biga vu le da Simoŋ.» 35Joˀ taŋ ya kwana, a slufaka taŋ gwat migi avu taŋ a jiviɗ waɗ taŋ misinaka Yesu hirak ti naŋ mangila ɗaf na.

Yesu mibiga vu da mizli ngi seˀehey

(Yo pura Mat 28.16-20; Mark 16.14-18; Zaŋ 20.19-23; Slra 1.6-8)

36Ti taŋ maɓam kanah na, Yesu a bo deŋ a wuzla taŋ, a ɓa taŋ: «Ndiram zuy zuy!» 37Didak a muɗa taŋ le, yo a zluwunam haɗi teˀe, asi a waka kaɓa a puram di i musuɗuk ngi mbur mumuca. 38Amma Yesu a ɓa taŋ: «Lesl kumo welele vur mike, yo ki wulkam cuw cuw vur mike? 39Puraka haŋ ati sar ɗuwoyo: i ya gisiŋ! Tutumikiy, puraka! Musuɗuk ngi mbur mumuca, naŋ anta ti meficek ati tesl ka ya misi ti naŋ na ta.» 40Naŋ miɓa mingiɓi hana na, a biga taŋ haŋ ati saraya. 41Taŋ mamumulom haɗi tuwa na, a tiɓakaŋ gu taruŋ. Yo ɓi nah mazuma taŋ hirnga na, Yesu a ɓa taŋ: «Gwat ngi zum ada avu kum aka kwa?» 42A vulakaŋ kilif mufuko ɓuluˀu. 43A tiɓa, a zuma a mihiri taŋ. 44Dar a ɓa taŋ: «Puraka, ti ya misi zleˀe ati kumo, yi ɓukum na: ‹Anja ɓi mutohoko ar ya gar ar ɓimuɗuva ngi Moyis ati ngi mijiviɗey waɗ ar ɗerewol Dimis na, sey a gi muduba.›» 45Joˀ a wuna taŋ lesl ɓa a slaka wala ngi Ɓimutoho muduba so. 46Waɗ a ɓa taŋ: «Naŋ kaɓa mutohoko miɓi: ‹Anja sey Mesi a si bonoy seˀ le, yo a sa slikiɗ ti wuzla mumucahay ar hin mimakir naŋ na. 47Waɗ ma na, ɓi ngi mbiɗi mevel ati ɓi ngi puya mungra na, anja sey a tilam di mi avu sukwi ngi mizli gar, a ɗuvaka virzi naŋ a Zeruzalem. 48Kumo, migi sedewo ngi gwat tayna gar. 49Yo i sa slinukum ti gwat Baha miɓa ɗaˀ le da zleˀe tuwa. Amma kumo so na, cifam angi walahaya, hã tapas gidaŋ ngi muŋ misa po sar le ar kum.»

Yesu mucuh nga muŋ

(Yo pura Mark 16.19-20; Slra 1.9-11)

50Dar Yesu aru ti taŋ, kini ngir ti Betani. A zuɓa haŋ, a ɗuwula taŋ mi a diga. 51Yo ti naŋ maɗuwula taŋ mi tuwa na, a guh avu taŋ, a cuh nga muŋ. 52Taŋ kwana, a dirba taŋ midilkam a mbuŋ naŋ na, a mam nga Zeruzalem a muŋ, bal ti mumul haɗi. 53Yo t'ada ndrehhe ar hay ngi Bumbulvuŋ, ara hunumaka Buymisemuŋ.

Actualmente seleccionado:

Luk 24: BEGDC

Destacar

Copiar