Hch 9

Laj Sawlo kib'oqe'k xb'aan li Yos

(Hch 22,5-16; 26,9-18; Gal 1,12-17)

1Laj Sawlo toj yo ajwi' chi xk'oxlankil xxib'esinkil eb' li xtzolom li Qaawa' ut xkamsinkileb', kiwulak rik'in li xyuwa'il aj tij 2ut kixtz'aama xhu cho'q reheb' li ch'utleb'aal kab'l wankeb' Damaask, re naq, wi tixtaweb' winq malaj ixq li neke'taaqenk re li B'e,#9,2 Li B'e a'an li xb'ehil li Jesus (cf. Hch 18,25.26; 19,9.23; 22,4; 24,14.22). taak'ehe'q xwankil chi xk'amb'aleb' chaq chi b'ak'b'o Jerusalén. 3Ab'anan, naq yo chi xik, ak nach' wank rik'in Damaask, sa' junpaat kisute'k xb'aan jun li saqenk kichalk chaq sa' choxa. 4T'anaamil sa' ch'och', kirab'i jun xyaab' kuxej yo chi xyeeb'al: “At Saúl, at Saúl,#9,4 Aj Saúl: jo'ka'in nayeemank laj Sawlo sa' aatinob'aal arameo (cf. Hch 26,14). k'a'ut naq xik' yookat chi wilb'al?”.

5Kichaq'ok a'an: “Anihat, at Qaawa'?”, chan. Ut a'an kixye: “Laa'in li Jesus li xik' yookat chi wilb'al.#9,5 Chixjunil li nab'aanumank reheb' li xtzolom li Jesus, re li Qaawa' Jesus naq nab'aanumank (cf. Mt 10,40; 25,40). 6Waklin, okan sa' li tenamit ut taayeemanq aawe k'aru taab'aanu”.

7Eb' li winq li yookeb' chi xik rochb'een ke'xaqliik chi sachsookeb' xch'ool, xb'aan naq ke'rab'i li xyaab' kuxej, ab'anan maa'ani ke'ril ru. 8Toja' naq kiwakliik laj Sawlo chiru ch'och', ut naq kixte raj li ru, ink'a' chik na'ilok. Ke'xch'ilo chi ruq' ut ke'roksi Damaask; 9ut aran kixnumsi oxib' kutan chi ink'a' na'ilok, ink'a' nawa'ak chi moko na'uk'ak.

10Sa' li tenamit Damaask wank jun aj paab'anel, aj Ananías xk'ab'a', ut li Qaawa' kixye re sa' moy u: “Ananías!”. Kichaq'ok a'an: “We'kin, at Qaawa'”, chan.

11Ut li Qaawa' kixye re: “Waklin, ayu sa' li Tiikil B'e neke'xye re, ut sik' sa' rochoch laj Judas jun li winq Tarso xtenamit, aj Sawlo xk'ab'a'. Toxaataw chi tijok. 12A'an xril sa' moy u jun li winq aj Ananías xk'ab'a', kol'elq ut xk'e li ruq' sa' xb'een re naq taa'iloq wi' chik”.

13Naq kirab'i a'in, laj Ananías kixye: “At Qaawa', naab'aleb' wab'ihom chi aatinak chirix li winq a'an: ninnaw naq makach'in li rahilal ak xb'aanu reheb' laasantil paab'anel#9,13 A'an li xb'een sut naq eb' li xtzolom li Jesus (Hch 6,1; 9,19) neke'xk'ab'a'in eb' li sant, eb' laj santil paab'anel, xb'aan naq sik'b'ileb' ru xb'aan li Yos, q'axtesinb'ileb' sa' ruq', santob'resinb'ileb' xb'aan li Santil Musiq'ej (Hch 9,32.41; 26,10). aran Jerusalén. 14Ninnaw ajwi' naq wank arin, rik'in xwankil k'eeb'il re xb'aaneb' li xb'eenil aj tij chi xchapb'aleb' chixjunil li neke'patz'ok laak'ab'a'”.

15Ut li Qaawa' kixye re: “Ayu, xb'aan naq a'an sik'b'il ru inb'aan cho'q aj k'anjel re tixk'am resil link'ab'a' rik'ineb' li maak'a'eb' xpaab'aal, rik'ineb' li awab'ej ut eb' li ralal xk'ajol laj Israel. 16Ut laa'in tink'ut chiru jo'ch'inal jo'nimal tento tixkuy sa' ink'ab'a'”.

17Koho laj Ananías, kox'okaq sa' li kab'l b'arwi' wank laj Sawlo, kixk'e li ruq' sa' xb'een ut kixye re:

—Saúl, at wiitz'in, li Qaawa' xinxtaqla chaq aawik'in, a' li Jesus li xk'ut rib' chawu sa' li b'e xatchalk wi'. Xinxtaqla chaq, re naq tat iloq wi' chik ut tatnujaq rik'in Santil Musiq'ej.

18Tikto ki'elk sa' rix ru li chanchan rix kar, ut ki'ilok wi' chik; kiwakliik ut kikub'siik xha'. 19Kitzekank ut kikawuuk.

Laj Sawlo ki'aatinak aran Damaask

Ink'a' k'iila kutan kikanaak laj Sawlo rik'ineb' laj paab'anel aj Damaask. 20Ut chi junpaat ki'ok chi xpuktesinkil resil li Jesus sa'eb' li ch'utleb'aal kab'l: naxye naq a'an li Ralal li Yos. 21Sachsookeb' xch'ool chixjunil li neke'ab'ink re, ut neke'xye:

—Ma maawa' tab'i' a'in li narahob'tesink reheb' aran Jerusalén li neke'patz'ok re li k'ab'a'ej a'in? Ma ink'a' tab'i' xchalk arin re xk'amb'aleb' chi b'ak'b'o rik'ineb' li xb'eenil aj tij?

22Ut laj Sawlo q'axal chik yo chi kawuuk xch'ool ut naxsach xch'ooleb' laj Judiiy li wankeb' Damaask rik'in xch'olob'ankil chiruheb' naq li Jesus a'an li Kriist.

23Ak k'iila kutankaq chik xnumik a'an naq eb' laj Judiiy ke'xk'uub' sa' komonil xkamsinkil. 24Ab'anan laj Sawlo kixnaw li xk'a'uxeb'. K'aak'alenb'ileb' li rokeb'aal li tenamit chi q'eq ut chi kutan re xkamsinkil laj Sawlo. 25Ab'anan, sa' jun li q'oqyink, eb' li xtzolom ke'xchap ut ke'xkub'si junpak'al li tz'ak sa' jun nimla chakach.

Laj Sawlo kiwulak Jerusalén

26Naq kiwulak Jerusalén, kixyal ok sa' xyanqeb' laj paab'anel, ab'anan chixjunileb' neke'xxiwa ru xb'aan naq ink'a' neke'xpaab' naq a'an tz'aqal aj paab'anel chik. 27Toja' naq laj Bernabé kixk'am chirix, koxxaqab' chiruheb' li apóstol ut kixseeraq'i reheb' chanru naq li Qaawa' kixk'ut rib' chiru laj Sawlo sa' b'e ut ki'aatinak rik'in, jo' ajwi' chanru naq kixch'olob' resil li Jesus chi kaw, aran Damaask. 28Jo'kan naq laj Sawlo narochb'eeniheb', na'elk ut na'ok Jerusalén, ut na'aatinak sa' xk'ab'a' li Qaawa' chi maak'a' xxiw. 29Na'aatinak ut naxch'olob' li yaal rik'ineb' laj Judiiy, griego raatinob'aaleb'; a'ut eb' a'an neke'raj raj xkamsinkil. 30Naq ke'xnaw a'in eb' laj paab'anel, ke'xk'am Cesarea ut moqon chik ke'xtaqla toj Tarso.

31Sa'eb' li kutan a'an li Iklees wank sa' tuqtuukilal sa' chixjunil Judea, Galilea ut Samaria; yo chi kawuuk jo'wi' chi k'iik rik'in xpaab'ankil li Qaawa'. K'ajo' naq yookeb' chi tamk laj paab'anel rik'in li xk'ojob'ankil xch'ooleb' xb'aan li Santil Musiq'ej.

Li xk'irajik laj Eneas

32Naq yo chi xb'eeninkil chixjunileb' li na'ajej, laj Pedro kiwulak ajwi' rik'ineb' laj santil paab'anel li wankeb' Lida. 33Aran kixtaw jun li winq, aj Eneas xk'ab'a', sik, waqxaqib' chihab' rokik chiru ch'aat. 34Ut laj Pedro kixye re:

—At Eneas, li Jesukriist nak'irtasink aawe. Waklin ut yiib' laawarib'aal, chan.#9,34 Yiib' laawarib'aal, chu'uxk re laj Eneas, jo' reetalil naq k'irajenaq chik anaqwan.

Tikto kiwakliik laj Eneas. 35Ut naq chixjunileb' laj Lida jo'wi' eb' laj Sarón ke'ril chi wakliik, ke'xq'axtesi rib'eb' re li Qaawa'.

Laj Pedro kixwaklesi chi yo'yo jun li ixq

36Kiwank aran Jope jun li ixq aj paab'anel, xTabitá xk'ab'a' (chi jalb'il ru naraj naxye: “Ch'ina Yuk”). A'an naxb'aanu naab'al li usilal ut k'ajo' li lemoox naxk'e. 37Sa'eb' li kutan a'an kiyajerk ut kikamk. Ke'ratisi ut ke'xk'e sa' xkab' k'ojar li kab'l. 38Lida nach' wank rik'in Jope ut, naq eb' laj paab'anel ke'rab'i resil naq laj Pedro wank aran, ke'xtaqla wiib' chi winq re xb'oqb'al: “Chalqat chi junpaat qik'in”, chankeb' re.

39Tikto koho laj Pedro rochb'eeneb'. Ka'ajwi' kiwulak, ke'xk'am sa' xkab' k'ojar li kab'l ut aran chixjunileb' li xmalka'an ke'xxaqab' rib' chiru, yookeb' chi yaab'ak ut chi xk'utb'al eb' li jut-aq' ut li t'ikr xb'aanuhom lix Tabitá naq toj wank sa' xyanqeb'. 40Toja' naq laj Pedro kirisiheb' chixjunil, kixwiq'ib' rib' ut kitijok. Chirix chik a'an kixsutq'isi rib' wan wi' li kamenaq ut kixye:

—At Tabitá, waklin!

A'an kixte li ru ut, naq kiril laj Pedro, kik'ojlaak. 41Laj Pedro kixchap chi ruq' ut kixwaklesi; kixb'oqeb' laj santil paab'anel jo'wi' eb' li xmalka'an, ut yo'yo chik lix Tabitá naq kixxaqab' chiruheb'. 42A'in kinawmank sa' xsutam chixjunil Jope, ut naab'aleb' ke'paab'ank re li Qaawa'. 43Laj Pedro naab'al kutan kikanaak aran Jope sa' rochoch jun li winq, aj Simón xk'ab'a', aj chiqol tz'uum.

Actualmente seleccionado:

Hch 9: QQC

Destacar

Copiar