Hch 13

Kitaqlaak laj Sawlo rochb'een laj Bernabé

1Sa' li Iklees li wank Antiokía wankeb' propeet ut aj tzoloneleb': laj Bernabé, laj Simehón, aj Niger nayeemank re, laj Lucio aj Sirene, laj Manahén li kik'iiresiik rik'in laj Herodes li awab'ej, ut laj Sawlo. 2Sa' jun li kutan, naq yookeb' chi k'anjelak chiru li Qaawa' ut chi ayuunik, kixye li Santil Musiq'ej: “K'ehomaqeb' cho'q we laj Bernabé ut laj Sawlo re te'xb'aanu li k'anjel xinb'oqeb' wi'”.

3Toja' naq ke'ok wi' chik chi ayuunik ut chi tijok; chirix a'an ke'xk'e li ruq'eb' sa' xb'eeneb' ut ke'xchaq'rab'iheb'.

Ke'wulak aran Chipre

4Laj Bernabé ut laj Sawlo, taqlanb'ileb' xb'aan li Santil Musiq'ej, ke'kub'eek Selewsia ut aran koheb' chiru ha' toj Chipre. 5Naq ke'wulak Salamina, ke'xtikib' xpuktesinkil li Raatin li Yos sa'atqeb' li xch'utleb'aal kab'l eb' laj Judiiy, ut laj Jwan yo chi xtenq'ankileb'.#13,5 Li xb'een xb'een naxb'aanu laj Pablo a'an a'in: xpuktesinkil li Chaab'il Esilal reheb' laj Judiiy (cf. Hch 13,14.46; 14,1; 16,13; 17,2.10.17; 18,4.19; 19,8; 28,17.23). Toj timil chik, naq kixk'e reetal naq ink'a' nak'ulub'aak xb'aaneb' a'an, ki'ok chi xpuktesinkil resil li Jesus reheb' li maawa'eb' aj Judiiy (cf. 13,46; 18,6; 28,28). Laj Jwan a'an laj Markos (cf. Hch 12,12.25).

6Naq ak xe'xb'eeni chixjunil li ch'och' a'an sutsu xb'aan li ha', ke'wulak toj Pafos; aran ke'xtaw jun aj tuul aj Judiiy, aj Bar-Jesus xk'ab'a'. A'an jun propeet aj b'alaq' 7ut ramiiw laj Sergio Pawlo, a'an jun li winq wank xna'leb' ut ruuchil li awab'ej. A'in kixtaqla xb'oqb'aleb' laj Bernabé ut laj Sawlo xb'aan naq naxrahi rab'inkil li Raatin li Yos. 8Ab'anan laj Elimas laj tuul (a'an naraj naxye li xk'ab'a') yo chi xch'a'ajkinkileb', yalyo xq'e chi k'anjelak re naq laj Sergio Pawlo ink'a' taa'ok chi paab'ank. 9Toja' naq laj Sawlo, aj Pablo ajwi' xk'ab'a', nujenaq chi Santil Musiq'ej, kixka'ya 10ut kixye re:

—Ralalat laj tza, nujenaqat rik'in chixjunil li b'alaq'il na'leb' ut maa'usilal, xik' nakawil chixjunil li tiikilal! Jo'q'e taakanab' xpo'b'al li xtiikil b'e li Qaawa'? 11Anaqwan il, li ruq' li Qaawa' wank sa' aab'een. Tatmutz'o'q ut ink'a' chik taawil ru li saq'e chiru jarub'aq kutan.

Tikto kiq'oqyino'k ut ki'aak'ab'o'k xsa' li ru: tixsuti rib' chi xsik'b'al ani taach'ilonq re chi ruq'. 12Naq laj Sergio Pawlo kiril li kik'ulmank, kixpaab', sachso xch'ool rik'in li xk'utum li Qaawa'.

Ke'wulak aran Antiokía re Pisidia

13Laj Pablo ut eb' li rochb'een ke'elk Pafos ut ke'wulak Perge, sa' xteepal Panfilia. Aran laj Jwan kixkanab'eb' ut kisutq'iik Jerusalén, 14ut eb' a'an ke'elk Perge ut ke'wulak Antiokía, sa' xteepal Pisidia. Sa' li sábado ke'ok sa' li ch'utleb'aal kab'l ut ke'k'ojlaak. 15Ut naq kiraqe'k xyaab'asinkil xsa' li Chaq'rab' ut eb' li Propeet, eb' li xb'eenil li ch'utleb'aal kab'l ke'xtaqla xyeeb'al reheb':

—Ex qas qiitz'in, wi wank eeraatin re xwaklesinkil xch'ooleb' li tenamit, yehomaq.

16Toja' naq kixaqliik laj Pablo, kixtaqsi li ruq' ut kixye:

—Ex aj Israel ut chejunilex li nekexiwa ru li Yos, ab'ihomaq. 17Li xYos li tenamit Israel kixsik'eb' ru li qana' qayuwa', kixnimob'resi li tenamit naq wankeb' chaq sa' xch'och'eb' laj Ejiipt chi ab'lil, ut rik'in xnimal xwankil kirisiheb' chaq. 18Ut chiru tana ka'k'aal chihab' kixkuy rilb'aleb' sa' li chaqich'och'. 19Moqon chik kixsach wuqub' chi tenamit sa' xch'och'eb' laj Kanahán ut kixk'e chi reechani#13,18-19 Nm 14,34; Dt 1,31; 7,1. li xna'ajeb' 20chiru tana lajeeb' roxk'aal xkab' o'q'ob' (450) chihab'.

“Chirix chik a'an kixk'eheb' aj raqol aatin toj reetal kol'elq li propeet Samuel. 21Toja' naq ke'xtz'aama x'awab'ejeb', ut li Yos kixk'e laj Saúl reheb', a' li ralal laj Sis, jun li winq xkomoneb' xteepal laj Benjamín; ut a'an ki'awab'ejink chiru ka'k'aal chihab'. 22Ab'anan moqon li Yos kirisi laj Saúl ut kixxaqab' laj David cho'q x'awab'ejeb', ut kixye chirix: «Xintaw laj David, ralal laj Jesé, jun li winq chaab'il jo' naraj linch'ool; a'an tixb'aanu chixjunil li nawaj».#13,22 Sal 89,21; 1 S 13,13-14; Is 44,28. 23Sa' xyanqeb' li ralal xk'ajol laj David li Yos kixwaklesi jun aj Kolonel cho'q reheb' laj Israel, a' li Jesus, jo' chanru yeechi'inb'il chaq xb'aan. 24Rub'elaj li xk'ulunik a'an, kik'ulunk laj Jwan chi xch'olob'ankil chiru chixjunil li tenamit Israel naq tento te'xyot' xch'ool te'xjal xk'a'uxl ut te'xk'ul li kub'iha'. 25Ak raqe'kaq re li xk'anjel, laj Jwan kixye: «Maawa'in laa'in li nekek'oxla. Ilomaq, chalk re chiwix li moko ink'ulub' ta xhitb'al xk'aamal li xxaab'».

26“Ex was wiitz'in, ex ralal xk'ajol li yo'lajenaqeb' rik'in laj Abrahán jo'wi' laa'ex li nekexiwa ru li Yos, qik'in laa'o taqlanb'il chaq li Aatin a'in aj k'ehol kolb'a ib'. 27Eb' laj Jerusalén ut li xb'eenileb' ink'a' ke'xtaw ru ani li Jesus, ut, naq ke'xraq aatin sa' xb'een, kitz'aqlok ru xb'aaneb' li xtz'iib'ahom eb' li Propeet li nayaab'asimank rajlal sábado. 28Us ta maak'a' ke'xtaw chirix li Jesus xk'ulub' wi' li kamk, ab'anan ke'xtz'aama chiru laj Pilaat naq chikamsiiq. 29Ut naq kitz'aqlok ru xb'aaneb' chixjunil li tz'iib'anb'il chirix, ke'xkub'si chaq chiru li che' ut ke'xk'e sa' jun xmuqleb'aal kamenaq. 30Ab'an li Jesus kiwaklesiik chi yo'yo sa' xyanqeb' li kamenaq xb'aan li Yos 31ut chiru naab'al kutan kixk'ut rib' chiruheb' li ke'ochb'eenink chaq re naq ki'elk chaq Galilea ut kitaqe'k Jerusalén. Ut anaqwan a'aneb' chik laj yehol re li yaal chirix li Jesus chiruheb' li tenamit.

32“Laa'o ajwi' naqaye li Chaab'il Esilal a'in eere: Li k'aru kiyeechi'iik chaq reheb' li qana' qayuwa' 33kitz'aqlok ru xb'aan li Yos sa' qayanq laa'o li ralal xk'ajol. Xb'aan naq li Yos kixwaklesi chi yo'yo li Jesus, jo' chanru tz'iib'anb'il sa' xkab' li Saalm: «Laa'at li Walal; anaqwan xatinyoob'tesi».#13,33 Sal 2,7. 34Li Yos kixwaklesi chi yo'yo li Jesus re naq maajaruj chik taakamq. A'an ak yeeb'il chaq chi jo'ka'in: «Tink'e eere li k'a'aq re ru sant, a' li tz'aqal yaal, yeechi'inb'il chaq re laj David».#13,34 Is 55,3. 35Jo'kan naq naxye ajwi' sa' jalan chik raqal: «Ink'a' taak'e chi q'aak laj santil k'anjel chawu».#13,35 Sal 16,10. 36Chek'e reetal, laj David chiru li xyu'am kik'anjelak jo' chanru li xnimal rajom li Yos, ab'an moqon kikamk, koxjunaji rib' rik'in li xna' xyuwa' ut kiq'aak li xch'och'el xsululel. 37A'ut li jun li kiwaklesiik chi yo'yo xb'aan li Yos, a'an ink'a' kiq'aak. 38Chenawaq b'i', ex was wiitz'in, naq sa' xk'ab'a' li Jesus nayeemank eere resilal li kuyuk sachok maak. Ut li tiikob'resink ch'oolej li ink'a' xetaw sa' xk'ab'a' xChaq'rab' laj Moisés 39natawmank chik sa' xk'ab'a' li Jesus xb'aaneb' chixjunil li neke'paab'ank re. 40Chek'ehaq b'i' reetal, michalk sa' eeb'een li xyehomeb' li propeet:

41«K'ehomaq reetal laa'ex li nekextz'eqtaanank;

chisachq eena'leb' ut chexmuqunq,

xb'aan naq chiru leeyu'am tinb'aanu jun xnimal ru b'aanuhom,

ut a'an ink'a' raj teepaab', us ta taaseeraq'iiq eere»”.#13,41 Hab 1,5.

42Naq laj Pablo ut laj Bernabé ke'elk sa' li ch'utleb'aal kab'l, wan ke'tz'aamank chiruheb' naq sa' li sábado jun chik te'aatinaq wi' chik chirix chixjunil a'in. 43Ut naq ak kiraqe'k li ch'utam, naab'aleb' laj Judiiy ut xkomoneb' li neke'xxiwa ru li Yos ke'xtaaqe laj Pablo ut laj Bernabé. Eb' a'in toj ke'seeraq'ik rik'ineb', yookeb' chi xq'unb'esinkileb' chi wank junelik sa' rusilal li Yos.

44Sa' li sábado jun chik ke'ch'utlaak kach'in chik maa chixjunil li tenamit chi rab'inkil Raatin li Yos. 45Ab'an, naq ke'ril li k'iila tenamit, eb' laj Judiiy k'ajo' naq kikaqo'k xch'ooleb'; ke'ok chi xwech'inkil rix ut chi xmajewankil jo'nimal naxye laj Pablo. 46Toja' naq laj Pablo ut laj Bernabé chi kaweb' xch'ool ke'xye:

—Tento naq eere laa'ex xb'enwa xyeemank li Raatin li Yos. Ab'anan, rik'in naq neketz'eqtaana a'an ut nekereek'a eerib' naq moko eek'ulub' ta li junelik yu'am, ab'ihomaq: tooxik rik'ineb' li junch'ol chik. 47Xb'aan naq jo'kan kooxtaqla wi' chaq li Qaawa' naq kixye:

«Xatinxaqab' cho'q xkutaneb' li tenamit

re naq tatkanaaq cho'q kolb'a ib'

toj sa' xmaril li ruuchich'och'».#13,47 Is 42,6; 49,6. Eb' li apóstol neke'xtiq xk'anjel li Jesus, a'an li xsaqenk li ruuchich'och'.

48Naq eb' li maawa'eb' aj Judiiy ke'rab'i a'in, ke'saho'k sa' xch'ool ut ke'ok chi xnimankil xwankil li Raatin li Qaawa'. Ut chixjunileb' li ak xaqab'anb'ileb' chi xtawb'al li junelik yu'am ke'ok chi paab'ank, 49yo chi pukank li Raatin li Yos sa' chixjunil li na'ajej a'an. 50Ab'anan eb' laj Judiiy ke'xtakchi'i li xninqaleb' ru ixq li neke'loq'onink ru li Yos, jo' ajwi' li xb'eenileb' li tenamit; ke'xyoob' jun raaxiik' chirixeb' laj Pablo ut laj Bernabé ut ke'risiheb' sa' li xna'ajeb'. 51Eb' a'in ke'xchiq'chiq'i li pojtz' chi roqeb' re xch'olob'ankil li xmaakeb'#13,51 Mt 14,14; Lk 10,11. ut koheb' Ikonio. 52Ut eb' laj paab'anel ke'kanaak chi nujenaqeb' rik'in Santil Musiq'ej, k'ajo' xsahilaleb' sa' xch'ool.

Actualmente seleccionado:

Hch 13: QQC

Destacar

Copiar