Gén 34
34
Sikem hip'ajtitchä Jacob lhäse tä lhey Dina wet imäyej
1Häp Dina, Jacob lhäse tä ihihlä Lea, yik tä isikaye atsinha lhutshay tä ihi hupuy. 2Wet hin'o mamse tä lhey Sikem, tä lajcha Hamor häpe Hiv lhayis kaniyat, lham itsoklhi Dina wet imäyej wet iwoyeje m'ak tä ni'isa. 3Mat tä wuj tä ihumin lhutsha, häte t'uhläk atsinha itiyej lehumnhayaj. 4Wet häp tä Sikem tahuyej lajcha wet yok:
–Hoye lhutsha, is chik iwoye t'at tä ot'uhläk oyen ch'efwaya.
5Jacob ihanch'oye tä Sikem iwoyeje m'ak tä ni'isa lhäse. Mat tä newache katsi leles, iyej t'at leläy w'asetas tä hit'ekyenwethä, häp tä tamenej tä newache lhämet, inihich'oye chik nämhen lhamel.
6Wet Sikem lajcha Hamor ihoye Jacob yämthilek yämhoplhi. 7Wet nech'e nämhen Jacob leles, wet tä lhamel iläte m'ak wit'äyna, lhäy'e lhip tä lhamel lewäk ihi. Tsi tä Sikem itsoklhi Jacob lhäse wet imäyej, häpe n'oläkwyhanyaj tä lhäy'e lhip tä ni'isa tä õ'tiyej Dios laka wichi Israel lhayis wet lakeyhit'a tä õ'woynejetso. 8Mat Hamor tahuyej lhamel wet yok:
–Olhäs Sikem wuj tä ihumin amel hach'inhä. Woye tä owoye, is chik lewahnej t'at häpkhilek iyej. 9Wet ahäpkhihena wichi tä olhamel oiyhäj t'at, wet olhamel oihiyejawethä aka'tsinhay, wet amel lhehiyejawethä olhamel oka'tsinhay. 10Yej lhekch'oye olhamel. Wet nehit katsik n'äyhiyeja amhohen m'ak at chik häpek let'uhläk lhenlhi tä lhehi oka honhat, yämthilek lelun'atpe wet lechäj aka honhates wet lhen haw'etesa.
11Wet Sikem häte tahuyej Dina lajcha lhäy'e lechilalis wet yok:
–Olhaip'altsen amehen, is chik lewoyaye t'at. Ow'enla amhohen m'ak at chik häpe chik let'alhej n'oye. 12Onowayhiyet'ak häpe m'ak chik wuj, wok inu'pe laha tä t'uhawetej, wet oyämla wuj m'ak chik oyen awayhtesa. Mat ch'anlhaye lhutsha yämthilek oiyej.
13Matkat Jacob leles yen lätyaja tä Sikem itiyej leläkwyhanyaj lhamel lech'inhä Dina. Wet lhamel iwoyeje lhämet tä t'akanyaj t'at häp Sikem lhäy'e lajcha wet yok:
14–Olhamel okalhihit'ak ow'enho och'inhä hin'o tä n'olhijtsek newayej t'isan. Tsi häpe m'ak tä lhäy'e lhip tä ni'isa alhoho chik owoye täjtso. 15Tajlhamat chik lewoye m'ak tä one'tek lewoye, wet häpkhilek olhamel owohiyela m'ak tä let'alhej n'oyehen. Is chik amel ahätet iwoye olhamel, wok oyok, is chik nilhokej hin'ol tä ihi hupuy iti lhamejen n'otetnek tä õyiset lho t'äj lhip. 16Wet chik amel lewoyaye täjtso, häpkhilek lhewejwethä olhamel oka'tsinhay wet olhamel oihiyejawethä amel aka'tsinhay. Wet oihlat amejen wet häpkhilek n'ahäpe wichi tä weihalhahchä. 17Mat chik amel kawoyaye täjtso, olhamel oyikhihena wet ochäjla och'inhä.
18Tä Hamor lhäy'e lhäs Sikem iläte Jacob leles lhämtesna, ihuminche t'at. 19Wet mamse Sikem yofwajkwet iwoyej lhame n'olhijtsek, tsi matche tä ihumin Jacob lhäse. Wet tä wichi tä häpehen Hamor iyhäj wuj tä yen hin'oya häp Sikem, 20lham lhäy'e lajcha lhamel ihoye hupuy lepe, häp lhip tä wichi lhaihuthiwek yämthilek itetshan m'ayhay. Wet tahuyej wichi wet yok:
21–Häp Jacob lhäy'e leles n'amel lhakalay'is t'at. Is chik in'amejen wet nehit katsik n'äyejo chik ilunpe lhaka honhat. Tsi lew'et iche t'at lhamel. Wet n'amel y'enla lhach'efwasa laka'tsinhay wet lhamel yenla lech'efwasa lhaka'tsinhay. 22Mat oyok, chik y'at'uhläk n'ahäpe wichi chik weihalhahchä yämthilek lhamel in'amejen, is chik nilhokej hin'ol iti lhamejen n'otetnek tä õyiset lho t'äj lhip, mälhyej lhamel lakey. 23Wet nilhokej m'ak tä lewuk lhamel, lhäy'e leläy, n'alewuhuy t'at. Mat is chik y'äm kalelhäj tä y'awoye t'at, wet lhamel ihlat n'amejen.
24Tä wichi iläte Hamor lhäy'e lhäs Sikem lhämet, lhamel ihuminche wet yok:
–Is t'at.
Wet nilhokej hin'ol iwoyej lhamehen n'olhijtsek.
Jacob leles yen lahaya n'oläkwyhanyaj tä õ'tiyej lech'inhä Dina
25Tä tajyäme p'ante tres ifwalas tä hin'oltso kamaj lhailäthen tä õyisthen t'äj lhipey, Simeón lhäy'e Leví, häp Jacob leles tä lhamel lech'inhä Dina, lhamel yikhen tä ihoye hupuy wet ichäj lefwajnhates. Tä nichäte, newache hin'ok tatayhlä lhamel tsi kamaj äytes lhipey tä õyisthen. Wet Jacob lelestso ilänhen nilhokej hin'ol tä ihi hupuy. 26Häte ilän Hamor lhäy'e lhäs Sikem, wet ichäj lech'inhä Dina tä ihi Sikem lew'et wet yikhen. 27Wet nech'e nämhen iyhäj Jacob leles, wet itonphä nilhokej m'ak tä ihi hupuy tä yen lahaya n'oläkwyhanyaj tä õ'tiyej lech'inhä. 28Ichäj tson'atas, kayla lhayis, w'asetas, asnolis, lhäy'e m'ak at chik häpe tä ihi hupuy lhäy'e tä i'alhoye. 29Lhamel tachuma m'ayhay tä ichechufwi wichi lew'etes, wet ichäj atsinhay lhäy'e nä'tshas wet yen kwenkaya.
30Wet Jacob tahuyej Simeón lhäy'e Leví wet yok:
–Matche tä amel lewo otesahlä wichi. Athana wichi tä ihi honhatna, Canaán lhayis lhäy'e Ferez lhayis, n'äyihila n'oho. Lhaihutlawek wet inuhla n'oye, wet tä nintäkwa hin'ol tä in'oyej, ilänlan'o lhäy'e nilhokej ow'et lheley.
31Mat lhamel nichulho lajcha Jacob wet yok:
–¿Hä is t'at tä õ'tech'aynej atsinha tä kain'oyaj länek olhamel och'inhä?
Actualmente seleccionado:
Gén 34: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
