Gén 16
16
Agar lhäy'e lhäs Ismael
1-3Sarai häpe atsinha tä newache leles chik ihihlä lech'efwa Abram. Mat iche lakawo'tsinha tä Egipto lhele tä lhey Agar. Tä tajyäme p'ante diez nekchämis tä lhamel ihi honhat tä Canaán, Sarai tahuyej Abram wet yok:
–Tetshan, Lhawuk hiw'enhit'a n'oho oles. Is chik lemäyej okawo'tsinha Agar, elat oisej lham wet oles ihichela.
Abram iwoye t'at lech'efwa lhämet, wet Sarai hiw'enho lakawo'tsinha yämthilek hätet iwoyek lech'efwa. 4Wet Abram imäyej p'ante Agar, tä paj hich'otshan. Matkat tä lhaiw'en tä hich'otshan, iwo tesa tä nemhit iwo haya Sarai. 5Tä mälhyejtso, Sarai tahuyej Abram wet yok:
–¡Am tä letamen n'oyej tä Agar yenn'o w'et m'ayeka! Olhamnaj tä ow'en amho yämthilek hätet iwoyek hach'efwa t'at. Athana iwohla lhäsa wet yenek häpkhila elh tä matche tä tafway n'o'pe. ¡Is chik Lhawuk ifwel elh tä matche tä lemenhat täjtso, am wok olham!
6Abram nichulho wet yok:
–Am t'at tä lehanej. Akawo'tsinha ihi t'at akweyey. Woyeje m'ak tä lehuminchek lewoyeje.
Tä mälhyejtso, Sarai iwo tesa tä nemhit t'amajej m'ak tä iwoyeje Agar. Tä lepese Agar yikch'oye. 7Mat Lhawuk laka ángel ihoye tä ihi ts'anis tä iwhäye ts'ifwik tä ihi lhip n'äyij tä tataye Shur. 8Wet tay'ätshane tä yok:
–Agar, Sarai kawo'tsinha, ¿chi letälhi, wet chi lehohi?
Agar nichulho wet yok:
–Olethanlä owuk tsinha Sarai.
9Ángel yok:
–Äple awuk tsinha wet achajo tä alhen häpeya lakawo t'at.
10Häte ángel äp yok:
–Oyämla wujpey ales tä nehit katsik ihanhiyejak iwo t'ufwahtesa. 11Athana lech'otshan, lewohla äsa, wet lhenla lheya Ismael, tsi Lhawuk ilät ame tä alhakli ihi.#16.11 Häp n'olhey Ismael yok, Dios iläte. 12Äs häpkhila hin'o tä hätet iwoye yel'ataj tä tayhlhele, wuj tä fwitsaj. Tatayhlahlä nilhokej wichi wet nilhokej wichi tatayhlahlä, wet lham yenlat letayhfwasa lepuhfwas.
13Tä Agar iläte Lhawuk lhämet, wet letichunhayaj yok, “Dios hiw'enn'o, mat äp kamaj oläy t'at.” Wet häp tä yen lheya “Dios tä tatelhoy ihi.” 14Häte ts'ifwik tä lham iwhäye p'ante õyen lheya “Elh tä iläy tä hiw'enn'o laka ts'ifwik.” Ihi t'at hupuy tä Kadés tumej lhip elh wet Bered tumej lhip elh.
15-16Agar iwo p'ante lhäsahlä Abram tä Abram hiw'en p'ante ochenta y seis nekchämis. Wet Abram yen lheya Ismael.
Actualmente seleccionado:
Gén 16: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
