Gén 14

Abram ifwayhat Lot

1Ifwalastso p'antetso Amrafel häpe niyat tä ihi Sinar, wet Arioc häpe niyat tä ihi Elasar, wet Quedorlaomer häpe niyat tä ihi Elam, wet Tidal häpe niyat tä ihi Goyim. 2Iche p'ante ifwala tä niyateytso lhamel tatayhlä häp niyat tä lhey Bera tä lew'et Sodoma, lhäy'e niyat Birsa tä lew'et Gomorra, lhäy'e niyat Sinab tä lew'et Adma, lhäy'e niyat Semeber tä lew'et Seboyim, lhäy'e niyat tä ihi Bela tä lhey elh Zoar. 3-4M'ak tä tamenej tä n'oka'tshayaj iche, häp tä doce nekchämis tä niyat Quedorlaomer yen lakawosa cinco niyateytso, wet tä nichäte trece nekchämis lhamel lhaikhajyenhen, t'uhläk tatayhlä Quedorlaomer. Wet häp tä lhamel ihutwek laka nifwotas wet lhaihuthiwek honhat tä lhey Sidim tä athana häpe Lewomekitaj Nosoy.

5Tä äp nichäte nekchäm elh, Quedorlaomer lhäy'e niyatey tä lhaip'ajtej, lhamel ihoye honhat tä lhey Astarot Karnaim wet inuye Refaím lhayis tä ihi wet ikalhi. Wet äp ikalhi Zuz lhayis tä ihi honhat tä lhey Ham, lhäy'e Em lhayis tä ihi Save-kiriataim, 6lhäy'e Hor lhayis tä ihi chenhas tä lhey Seír. Wet takähännhej pajtha nichäte honhat tä lhey Parán tä iwhäye ts'anis. 7Tä ileyej, tapil wet nichäte honhat tä lhey N'okalelhthayajw'et, lhey elh Kadés. Wet lhamel iwasthi nilhokej honhat tä lewuk Amalek lhayis, wet äp ikalhi Amorreo lhayis tä ihi honhat tä lhey Fwitsukw'et T'un.

8-9Wet nech'e lhamel ihoye honhat tä Sidim tä cinco niyatey iyhäj pajche ihi, lhäy'e laka nifwotas. Wet lhamel tataywek, cinco niyateytso tä lew'etes Sodoma, Gomorra, Adma, Seboyim, lhäy'e Bela, lhamel tatayhlä Quedorlaomer, Tidal, Amrafel, lhäy'e Arioc, cuatro niyateytso tä lew'etes Elam, Goyim, Sinar, lhäy'e Elasar. 10Wet nilhokej honhat tä Sidim iche wujpey chowhay tä asfalto ihiche. Wet tä niyatey tä lew'et Sodoma lhäy'e Gomorra yikhen tä fwetaj ilethanlä letayhfwas, lhamel nichätchehen chowhaytso. Wet iyhäj niyatey lhamel ilethane chenhas. 11Wet wichi tä ikalhi iyhäj, lhamel ichäj nilhokej n'olhäk lhäy'e m'ayhay tä laha ihi tä ihi Sodoma lhäy'e Gomorra, wet yikhen. 12Häte ichäj Lot, häp Abram lewakla tä lew'et Sodoma, lhäy'e nilhokej m'ak tä lewuk. 13Mat iche hin'o tä tefway, wet yik tä ifwenho Abram tä ihi honhat lhip tä hal'ätas ihi tä lewuk hin'o tä Amorreo lhayis elh tä lhey Mamre. Mamre häpe Escol lhäy'e Aner lepuhfwa, wet lhamel häpehen Abram lech'otfwas.

14Tä Abram ihanej tä wichi ichäj lewakla, lham ihutwek lakawos tä ichehen tä ihi lham lew'et tä häpe trescientos dieciocho (318) hin'ol tä takhajayhen. Wet lhamel yikhen tä ihän wichi tä ichäj Lot, pajtha nichäte hupuy tä lhey Dan. 15Tä honatsi Abram lhäy'e laka hin'ol lhamel iselkat tä inuye wichitso, wet takähännhej pajtha nichäte hupuy tä lhey Hoba tä tumej Damasco lhip tä tafwojhiye, 16wet isoyej nilhokej m'ak tä lhamel ichäj. Wet Abram ifwayhat lewakla Lot wet isakanej nilhokej m'ak tä lewuk, häte ifwayhthen atsinhay lhäy'e wichi iyhäj.

Melquisedec takäpfwayeje m'ak tä is häp Abram

17Tä Abram tapil tä ikalhi Quedorlaomer lhäy'e niyatey tä tach'ote, wet niyat tä ihi Sodoma yistejlä Abram tä ihi honhat lhip tä lhey Save, tä äp lhey elh Niyat Kahonhat. 18Häte Melquisedec tä häpe niyat tä lew'et Salem wet äp Dios tä N'owujtaj laka sacerdote, lham tachuma pan lhäy'e vino wet ihäne Abram. 19Wet takäpfwayeje lhämtesna Abram wet yok:

“Is chik Dios tä N'owujtaj takäpfway ame,

lham tä lhenek pule lhäy'e honhat.

20¡Lewujyaj ihi Dios tä naj letumfwaya

tä tach'ot ame wet lekalhi atayhfwas!”

Wet Abram hiw'enho p'ante Melquisedec lhip tä diezmo m'ak tä isakanej.#Heb 7.1-3

21Wet nech'e niyat tä lew'et Sodoma tahuyej Abram wet yok:

–W'en n'oho hin'ol tä lesakanej, wet w'enhayej m'ayhay.

22Mat Abram nichulho wet yok:

–Otiyejphä otkwey tä ot'unhatche olhämet tä oihi tä itayche Dios tä N'owujtaj tä lhenek pule lhäy'e honhat. 23Oyok, niwohit m'ak chik otchumhiyela tä alewuk, tej chik niyäkfwaj wok nisäj t'ak. Häpkhilek newache ifwala chik lhok, “Abram lakäywet tälh n'oye.” 24Tek wo m'ak chik owatlä, naya t'at m'ak tä okawos pajche tufw. Mat häp hin'ol tä iwo olhäy'eya, häp Aner, Escol lhäy'e Mamre, lhamelna häpkhilek tachuma m'ak tä w'enhayej.

Actualmente seleccionado:

Gén 14: WCHB

Destacar

Copiar