Éx 28

Sacerdotes lew'uyis

(Éx 39.1)

1Wet Lhawuk tahuyej Moisés wet yok:

–Tshupiye häp achila Aarón tä iyej häp Israel lhayis, lhäy'e häp leles Nadab, Abihú, Eleazar, lhäy'e Itamar, yämthilek häpehen oka sacerdotes. 2Enlhila achila Aarón lew'uyis tä n'ot'amajchetes, häpkhilek lewujyaj ihi lhäy'e lesilatyaj. 3Fwenhola häp hin'ol tä ow'enho lehanyaj wet ihanej iwoyneje m'ak at chik häpe, is chik lhamel yenlhi Aarón lew'uyis tä t'uhawetej tä häpe oka sacerdote tä ot'amajchet.

4“Häp tähesna lew'uyis chik õyenhilhila: Let'okwep'ot, lhäy'e m'ak tä lhey efod, wet lew'uy, lhäy'e lakay'uche tä lhäy ihi, lhäy'e lhetekp'ot, lhäy'e lakawak. Õyenhihoplhila lew'uyis tä n'ot'amajchetesna häp achila Aarón lhäy'e leles, häpkhilek häpehen oka sacerdotes. 5Wet häp hin'ol tä yenlhi is chik tachuma oro, lhäy'e wesaj tä y'it lhäy'e tä ifwak'an wet äp ichät, lhäy'e lino tä õ'pätsin.

Efod

(Éx 39.2-7)

6“Is chik hin'oltso yenlhi m'ak tä õyen lheya efod. Is chik häpe oro, lhäy'e wesaj tä y'it lhäy'e tä ifwak'an wet äp ichät, wet häpe lino tä õ'pätsin wet õ'wo lhäya, 7lhäy'e täkwfwas t'akay tä ihiche lepesey. 8Wet häp lakawak tä õ'nayhtejpe efod, is chik lhip t'at wet äp oro. Wet is chik häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin.

9“Wet chumela tuntey täkwfwas tä cornalina, hätet iwoye anek lhawo, wet tihila tä lelesayen lheyis häp Israel leles, 10tälhe elh tä ichun p'ante pajtha nichäte elh tä lepes. Lesayena seis lheyis tä i'pe tunte elh wet seis lheyis iyhäj tä i'pe tunte elh. 11Wet elh tä yenlhi häp n'olheyis tä i'pe tuntey, is chik häpe t'at hin'o tä lechumet tä yenwethä n'olhamsilis, wet is chik itech'aynej sellos. Wet chik wak'alhen, is chik itiche'pe lew'etes tä oro, 12wet iti'pe häp efod t'akay häpkhilek tek õhp'ethatlä häp Israel leles. Tä mälhyejtso, chik Aarón ihopej n'oye, häp lhamel lheyis ihla'pe lefwapol häpkhilek oyenpej tichunhayaja lhamel. 13Wet lew'etes häp tunteytso is chik oro t'at. 14Häte enlhila täkwfwas cadenas tä oro wet pätsinchehena, tech'ayneja niyhäy, wet untejichela tunteyw'etes.

N'ot'okwep'ot

(Éx 39.8-21)

15“Häte is chik õyenlhi Sacerdote tä Lhamya let'okwep'ot, lhäy'e m'ayhay tä õyen n'okalelhthayajchala tä ihi. Tech'ayneja häp efod, wok oyok, häp n'oyik tä õ'wo lhäya. Wet is chik oro t'at, wet äp häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin. 16Wet is chik tach'opway, wet veintidós centímetros tä pitaj, wet tä tsajo w'awulhi tä pitaj. 17Wet häp tä leti'pe häp tuntey tä isis, tihila cuatro tä lefwilhkatchehchä. Wet fila tä ichun tihi rubí, lhäy'e tunte tä ika'tu tä lhey crisólito, lhäy'e tunte tä w'atshan tä lhey esmeralda. 18Wet fila elh tihila tunte elh tä anek lhawo, lhäy'e tunte tä ifwak'an tä lhey zafiro, lhäy'e elh tä lhey jade. 19Wet fila elh tihila tunte tä ichät tä lhey jacinto, lhäy'e elh tä lhey ágata, lhäy'e elh tä ifwak'an tä lhey amatista. 20Wet fila tä lepes tihila tunte tä ika'tu tä lhey topacio, lhäy'e elh tä cornalina, hätet iwoye anek lhawo, lhäy'e elh tä w'atshan tä lhey jaspe. Tunteyna is chik iche'pe lew'etes tä oro, 21wet is chik iche doce, tsi doce lheyis häp Israel leles. Tunte weihalhapej õ'lesayen, tet iwoyek sello t'at, tä häpe lheyis häp Israel lhayis tä tälhehen letetsel tä ihi doce.

22“Häte enlhila cadenas tä oro wet tila'pe n'ot'okwep'ot. Mat is chik õ'pätsinchehen, tech'ayneja niyhäy. 23Wet enlhila täkwfwas argollas tä oro, wet tihila elh häp n'ot'okwep'ot lepes wet elh tihila lepes elh. 24Wet argollastso is chik letihiche häp cadenas, 25wet cadenas lepesey häp tä letiche'pe häp tuntey lew'etes, wet äytejena häp efod t'akay tä ihi tä tatache. 26Enlhila täkwfwas iyhäj argollas tä oro, wet tihichela n'ot'okwep'ot letselhäs tä tumchä tä tumejlä efod. 27Wet äp enlhila täkwfwas iyhäj tä oro, wet tichela'pe efod t'akay lhipey tä tumchä tä ihi tä tatache. Tilawhäye n'otsekkay, tumtejahlä kawak tä efod t'ak. 28Wet äyteja t'ak tä y'it häp argollas tä ihi n'ot'okwep'ot lhäy'e iyhäj tä ihi efod, häpkhilek n'ot'okwep'ot tumphä wet kawak tä efod t'ak tumchä, mat hap'akwek. 29Häpkhilek Aarón chik ihochufwi ow'et lhip tä Ot'amajchet, yäythila lhamej n'ot'okwep'ot tä n'okalelhthayajchal ihi, wet Israel leles lheyis ihla'pe let'okwe yämthilek oyenpej tichunhayaja lhamel. 30Tihila n'ot'okwep'ot häp n'okalelhthayajchal, häp m'ak tä õyen lheya Urim lhäy'e Tumim. Wet is chik Aarón iti'pe let'okwe chik lham iho n'oye, yämthilek ihanej m'ak tä olham ot'uhläk Israel lhayis iwoye.

N'ow'uy tä efod i'pe

(Éx 39.22-26)

31“Häte enlhila n'ow'uy tä y'it häpkhilek efod i'pe. 32Is chik n'ow'o len'äyij ihi lechowej, wet õ'tsekejchehen lhipey häp n'oyik häpkhilek nikw'esache. 33Enlhila wesaj lhipey tä letolnhathen tä lhen lhäya, y'it, ifwak'an, ichät, wet lelhahatche khäläj tä oro wet letichehen lhipey. 34Wok oyok, wesaj lhipey tä õ'tolnhatwethä is chik õ'tipejwhäye khäläj tä oro, nilhokche lhip. 35Wet is chik Aarón taw'uyhipej chik iwoye sacerdote lechumet. Chik iho n'oye tä oichufwi ow'et lhip tä Ot'amajchet, wet pitsajlä khäläj tä tumlä. Wok chik inuphä, pitsajlä khäläj tä tumlä tä nek. Häpkhilek newache lewit'äyhyaj wet y'il.

Oro lhip tä õyäytej Aarón lhetekp'ot

(Éx 39.30-31)

36“Häte enlhila oro lhip tä isänhän, wet tila'pe n'olesaynek tä letech'aynej sello, häp n'olhämtes tä yok, Lhawuk T'amajchet. 37Wet ena t'aka niyäkw tä y'it wet äyteja Aarón lhetekp'ot lhip tä i'pe letacho. 38Wet chik itpe letacho, lhamlak Israel lhayis isej chik iche m'ak at chik häpek wetayej tä lhamel yachaj n'oye m'ayhay tä yen t'amajcheta n'oyej. Wet häpkhilek tamenej chik otchumlä m'ayhaytso.

Häp sacerdotes lew'uyis iyhäj

(Éx 39.27-29)

39“Enlhila Aarón lakay'uche tä lino tä talesayhi, wet lhetekp'ot häte lino, wet häp lakawak is chik talesache. 40Wet enhoplhila Aarón leles häp lakay'uchelis, lhäy'e lakawakay, lhäy'e lhetekp'otes, häpkhilek lewujyaj ihi lhäy'e lesilatyajay häp lhamel. 41Häp tähestso tä lew'uyyenhi häp achila Aarón lhäy'e leles. Wet tsäyla'pe aceite häp lhethey tä letetnek tä lew'enho len'ohyaj häp lhamel wet lhen häpeya oka sacerdotes tä ot'amajchetes. 42Enlhila lhamel lakoset tumyejis tä lino, häpkhilek hip'o'pe lesulak wet hip'o'pe lhechey. 43Wet iwohiyet'ak Aarón lhäy'e leles nit'äsachehen chik ihoye owukwe tä carpa wok ihowhäye altar tä iwoye sacerdote lechumet tä ihi ow'et lhip tä Ot'amajchet. Chik mälhyejtso tä t'amaj lhamejen, häpkhilek lajit letesa wet n'ilahen. Häp täjtso olhämet, wet is chik Aarón lhäy'e leles iti lhamejen pajla'tha nichäte lepes lheley.”

Actualmente seleccionado:

Éx 28: WCHB

Destacar

Copiar