Éx 18
18
Jetro isikaye Moisés
1Jetro, sacerdote tä ihi Madián tä häpe Moisés lakachäti, lham ihanch'oye nilhokej m'ak tä Dios iwoyeje Moisés lhäy'e wichi tä Israel lhayis tä lham itonphä lhamel tä ihi Egipto. 2-3Tä mälhyejtso, Jetro yik tä ihoye Moisés wet ichäj lhamche lhäse tä lhey Séfora, häp Moisés lech'efwa, lhäy'e leles täkwfwas. Atsinhatso, tä Moisés inukwe p'ante len'äyij tä yäple Egipto, ihi lechowej n'äyij ne'tep'antek Séfora yäple lajcha. Wet lhäs elh lhey Gersón, tsi Moisés yok:
–Tä oihi honhat tä ka'oka honhata, ohäpe t'at hin'o tä w'enha lhamej.#18.2 Häp n'olhey Gersón yiwitej n'olhämet p'ante yok, Hin'o tä w'enha lhamej.
4Wet elh lhey Eliezer, tsi Moisés yok:
–Ojcha laka Dios iho n'oye wet tach'ot n'oye, wet ifwayhat n'oyej Egipto kaniyat.#18.4 Häp n'olhey Eliezer yok, Dios tach'ot n'oye.
5Moisés iwo p'ante kasthawetahi ts'anis, iwhäye Dios laka chenaj. Wet häp tä Jetro, lhäy'e Moisés lech'efwa, lhäy'e leles, lhamel ihoye. 6Tä lhamel nichäte p'ante, wet Jetro yok:
–Olham tä ohäpe akachäti Jetro oho ame. Nek n'okwe hach'efwa lhäy'e ales.
7Wet Moisés ihoye lakachäti wet t'upeyhchä tä ihi tä tatache, wet hits'u lech'alo. Tä ileyej tä n'okwi lhamejen, lhamel tiyäjchufwi Moisés lewukwe tä tsänt'äj. 8Wet Moisés ifwenho lakachäti nilhokej m'ak tä Lhawuk iwoyeje Egipto kaniyat lhäy'e laka wichi, wet tach'ote Israel lhayis. Häte ifwenho tä ichepej tä atha len'äyij tä lhamel inukwe ts'anis, mat Lhawuk ifwayhthen lhamel. 9Tä Jetro iläte, matche tä akäjejlhi Lhawuk lep'altsenyaj tä wuj tä itiyej Israel lhayis tä ifwayhtej Egipto lheley. 10-11Wet yok:
–¡Lewujyaj ihi Awuk Dios tä ifwayhat amejen Egipto lheley lhäy'e laka niyat tä lhamel lhaiwujyenhen wet ayen kwenkaya! Athana nech'e ow'en tä matche tä takhajay Awuk, inu'pe nilhokej dios lhayis iyhäj.
12Wet Jetro ilän itshäwet wet iwunho tä yen t'awayhata Lhawuk, wet hip'ajtej t'awayhtes iyhäj. Wet Aarón lhäy'e nilhokej Israel lhayis tä thänhäy, lhamel ihoye Moisés lakachäti Jetro yämthilek tachufwiyej tä t'ekhen tä ihi tä Dios tatache.
Moisés t'ähi hin'ol yämthilek häpehen n'okalelhthayajwos
(Deut 1.9-18)
13Tä ifwala elh Moisés tatayphä yämthilek itetshan wet ikalelhthen m'akpej tä elh iwoye. Wet Israel lhayis iyej t'at tä takasthen, tälhe tä nech'e fwala pajtha honatsiyej. 14Tä lakachäti hiw'en m'ak tä Moisés iwoye, lham tahuyej wet yok:
–¿Atsi m'ak tä lewoye, tä tajlhamat am tä letetshan m'ak tä iyej wichi wet newache iyhäj tä tach'ot ame, wet imälhewek ifwala tä lhamel takasthen t'at?
15Moisés nichulho lakachäti wet yok:
–Wichi iho n'oye häp tä t'uhläk ihanej m'ak tä is alhoho tä Dios ne'tek iwoye. 16Chik iche m'ak chik häpe tä nhanayej iwoyneje, häp tä iho n'oye yämthilek oyäm kalelhäj elh tä letes ihi. Wet ochufwenej lhamel häp Dios lhämtes lhäy'e lechufwenyajay.
17Tä lakachäti iläte, wet yok:
–Wuj tä is hach'otyaj tä letiyej wichi. Mat akey tä lewoye achumetna, häp tä isit'a, 18tsi let'el wet wichi y'enhen tä lhamel iho ame. Inu atape achumet wet atefwaj'atni, lekalhihit'ak lewoye nilhokej. 19Tetshan olhämet, ofwel amho m'ak tä t'uhawetej chik lewoye, wet is chik Dios tach'ot ame. Am is chik lefwenho Dios m'ak tä wichi iwatlä, wet fwenho lham häp m'ak tä wichi lewit'äyhyajay. 20Chufwenejen lhamel häp Dios lhämtes lhäy'e lechufwenyajay, wet fwenho lhamel m'ak tä is chik iwoye yämthilek inukwe len'äyij tä is alhoho.
21“Mat ähi hin'ol tä lehusey ihi, häp lhamel tä lew'en tä wuj tä ihumin Dios wet iwoye m'ak tä matche, häp hin'ol tä nit'uyakwe lakaha tä nit'uhawetayej. Iyhäj w'enho len'ohyaj yämthilek ichuttej milpej wichi, iyhäj w'enhatej cienpej, wet iyhäj w'enhatej cincuentapej, wet iyhäj w'enhatej diezpej yämthilek ichuttej. 22Lhamelna is chik itetshanpej wichi wet iwopej lakalelhthayajayej. Chik iche elh lewit'äyhyaj tä wuj, is chik lhamel ihän ame yämthilek letetshan. Mat häp lewit'äyhyaj chik niwuja, is chik lhamel t'at tä itetshan, häpkhilek nemhit choyhat achumet, tsi lhamel tach'otla ame. 23Chik lewoye täjtso, wet chik häpe m'ak tä Dios ne'tek lewoye, letumlahlä wet wichi akäslawethä. Elhpej chik yäpnho lew'et akäjlhi t'at.”
24Moisés tach'ahuye t'at lakachäti lhämet wet iwoye nilhokej m'ak tä lakachäti ifwenho. 25Wet t'ähi hin'ol tä lehusey ihi tä iyej Israel lhayis wet hiw'enho len'ohyaj lhamel. Iyhäj hiw'enho len'ohyaj yämthilek ichuttej milpej wichi, iyhäj hiw'enhatej cienpej, wet iyhäj hiw'enhatej cincuentapej, wet iyhäj hiw'enhatej diezpej yämthilek ichuttej. 26Wet lhamel t'at tä itetshanpej wichi lewit'äyhyajay. Mat chik iche lewit'äyhyaj tä wuj wet atha, häp tä lhamel ihäne Moisés wet itetshan. Mat häp lewit'äyhyaj tä niwuja lhamel t'at tä itetshan.
27Tä tajyäme täjtso, Moisés iwo tsilhekayej lakachäti wet yäple laka honhat.
Actualmente seleccionado:
Éx 18: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
