Rooma 5

Al-salaam wa l-farha be l-Masiih

1Wa khalaas, bigiina saalihiin be sabab al-iimaan wa achaan da be Rabbina Isa al-Masiih, aniina gaaʼidiin be l-salaam maʼa Allah. 2Wa be l-Masiih bas, gidirna dakhalna fi l-niʼma di be l-iimaan al-aniina saabtiin foogha. Wa nafraho be l-acham al-indina achaan nalgo majd Allah.

3Wa ziyaada min da, nafraho kula fi l-taʼab al-yaji foogna achaan naʼarfu al-taʼab yantiina al-sabur. 4Wa l-sabur yichajjiʼ guluubna. Wa kan guluubna ligo chajaaʼa, indina acham. 5Wa l-acham da abadan ma yijiib leena al-eeb achaan Allah nazzal mahabbitah fi guluubna be l-Ruuh al-Khudduus al-hu antaah leena.

Al-suluh be l-Masiih

6Aywa, achaan fi l-yoom al-Allah gataʼah wakit aniina ma indina gudra ninajju nufuusna, al-Masiih maat fi chaan al-khaatiyiin. 7Gaasi le l-naadum yumuut fi chaan naadum aakhar hatta kan al-naadum da saalih kula. Akuun naadum yikhassid yumuut fi chaan naadum galbah abyad bilheen. 8Laakin daahu kikkeef Allah wassaf leena mahabbitah al-kabiire. Wakit aniina lissaaʼna muznibiin, al-Masiih maat fi chaanna. 9Wa kan al-Masiih sawwaana saalihiin be daffigiin dammah, akiid hu yinajjiina min khadab Allah kula. 10Wa wakit aniina lissaaʼna udwaan Allah, moot Ibnah saalahaana maʼaayah. Wa be misil da, kan indina suluh maʼaayah be moot Ibnah, akiid nanjo be hayaat Ibnah. 11Wa ziyaada min da, hassaʼ aniina gaaʼidiin nafraho be l-alaakha al-indina maʼa Allah be Rabbina Isa al-Masiih. Achaan be l-Masiih bas, aniina ligiina al-suluh.

Al-moot ja min Adam

12Wa khalaas be sabab naadum waahid, al-zanib dakhal fi l-dunya. Wa be sabab al-zanib, al-moot kula ja. Wa misil da, al-moot lihig kulla l-naas achaan kulluhum aznabo. 13Aywa, al-zanib gaaʼid fi l-dunya gubbaal Allah ma yanti al-Tawraat le Muusa. Laakin al-zanib ma yinhasib fi l-bakaan al-foogah ma fi churuut al-Tawraat. 14Wa laakin al-moot gaaʼid yamluk fi l-naas min zaman Adam lahaddi zaman Muusa. Wa l-moot gaaʼid yamluk fi l-naas kan zunuubhum ma misil khata Adam al-khaalaf amur Allah kula. Wa Adam hu masal hana l-naadum al-yaji waraayah.

Al-haya jaat be l-Masiih

15Laakin al-atiiye al-Allah antaaha bala taman di, ma misil khata hana Adam. Be sabab khata hana l-naadum al-waahid da, naas katiiriin maato. Wa rahmat Allah hi akbar min al-khata. Wa hi al-rahma al-jaat be l-naadum al-waahid Isa al-Masiih wa hi sawwat kheer katiir bilheen le naas katiiriin. 16Wa atiiyit Allah chig min natiijat al-zanib al-Adam sawwaah. Al-hisaab ja baʼad al-zanib al-waahid wa wadda kulla l-naas fi l-halaak. Laakin al-atiiye al-bala taman di jaat baʼad al-naas sawwo khata katiir wa hi sawwat al-naas saalihiin. 17Akiid al-moot ja be sabab khata hana l-naadum al-waahid da. Wa be sabab al-naadum al-waahid da bas, al-moot malak fi l-naas. Wa laakin al-naas al-ligo niʼmat Allah al-kabiire bilheen wa bigo saalihiin be l-atiiye al-bala taman, humman yamulku fi l-haya al-abadiiye be l-naadum al-waahid Isa al-Masiih.

18Wa be sabab khata hana naadum waahid, kulla l-naas yahlako. Wa laakin be sabab al-amal al-saalih al-naadum aakhar sawwaah, kulla l-naas yagdaro yabgo saalihiin wa yalgo al-haya al-abadiiye. 19Wa naadum waahid isi Allah wa sawwa naas katiiriin muznibiin. Wa misil da battaan, naadum waahid taaʼ Allah wa sawwa naas katiiriin saalihiin.

20Wa churuut al-Tawraat jo achaan gudrat al-khata anchaafat be ziyaada. Laakin fi l-bakaan al-kitir foogah al-zanib, rahmat Allah kula kitrat be ziyaada. 21Wa be da, misil al-moot malak fi l-naas be sabab al-zanib, misil da rahmat Allah kula tamluk fi l-naas wa tisawwiihum saalihiin wa tiwaddiihum fi l-haya al-abadiiye be Isa al-Masiih Rabbina.

Actualmente seleccionado:

Rooma 5: ADT19

Destacar

Copiar