Aʼmaal al-Rusul 3

Al-maʼduur al-ligi al-aafe

1Wa yoom waahid, Butrus wa Yuuhanna maachiin fi beet Allah achaan yisallu sala hana l-saaʼa talaata. 2Wa naadum waahid gaaʼid jamb baab hana beet Allah al-usmah al-baab al-Jamiil. Wa min wildooh, hu maʼduur. Wa kulla yoom akhwaanah yiwadduuh wa yukhuttuuh hinaak achaan yihajjir wa yalga sadakha min al-naas al-yindasso fi beet Allah. 3Wa wakit hu chaaf Butrus wa Yuuhanna jaayiin yadkhulu, hu saʼal minhum sadakha.

4Wa wagafo wa chaafooh adiil wa Butrus gaal leyah : «Hammirna adiil !» 5Wa hu chaafaahum wa fi fikrah, humman yidooru yantuuh sadakha. 6Wa Butrus gaal : «Ma indi fudda wa ma indi dahab laakin nantiik al-cheyy al-indi. Be usum Isa al-Masiih al-min al-Naasira, nuguul leek gumm wa ruukh !»

7Wa Butrus karabah min iidah al-zeene wa saaʼadah le yugumm. Wa tawwaali ke, hu ligi gudra wa rijileenah alfartago wa bigo saabtiin. 8Wa natta foog wa gamma yuruukh wa dakhal maʼaahum fi beet Allah. Wa gaaʼid yuruukh wa yinattit wa yachkur Allah.

9Wa kulla l-naas hinaak chaafooh raayikh wa yachkur Allah. 10Wa irfo da bas al-maʼduur al-yihajjir kulla yoom fi l-baab al-Jamiil hana beet Allah. Wa alʼajjabo marra waahid wa khaafo min al-cheyy al-bigi. 11Wa Butrus wa Yuuhanna jo fi bakaan waahid fi fadaayit beet Allah al-usmah raakuubat Suleymaan wa l-raajil gaaʼid yamsukhum wa naas katiiriin lammo fooghum wa alʼajjabo marra waahid.

Butrus hajja le l-naas fi beet Allah

12Butrus chaaf kulla l-naas al-laammiin wa hajja leehum wa gaal : «Ya Bani Israaʼiil, maalku ajjabtu fi l-cheyy da ? Wa maalku tihammuruuna ? Fi fikirku, al-raajil da gamma raakh be gudritna aniina ? Walla achaan aniina saalihiin ziyaada walla ? 13Allah Rabb juduudna Ibraahiim wa Ishaakh wa Yaakhuub rafaʼ abdah Isa wa khattaah fi majdah. Wa da bas al-naadum al-intu sallamtuuh le l-moot. Giddaam Bilaatus nakartuuh wakit hu dawwar yatilgah. 14Intu abeetu ma dawwartu al-naadum al-saalih wa khudduus. Wa talabtu min al-waali yatlig leeku kattaal al-dimam fi badalah. 15Wa khalaas, kataltu al-naadum al-yantiiku al-haya. Wa laakin Allah baʼasah min ust al-maytiin wa aniina chuhuud le buʼaasah. 16Wa be sabab iimaanna be usum Isa, al-raajil al-tichiifuuh wa l-taʼarfuuh da ligi gudra. Wa fi chaan al-iimaan be usum Isa bas, hu ligi al-aafe marra waahid wa kulluku chiftuuh be uyuunku.

17«Ya akhwaani, ana naʼarif intu wa kubaaraatku abeetu al-Masiih achaan ma iriftuuh. 18Min zamaan, Allah kallam be waasitat kulla l-anbiya wa gaal kadar al-Masiih yatʼab wa khalaas da bas al-cheyy al-bigi. 19Wa hassaʼ tuubu wa gabbulu le Allah achaan hu yamha zunuubku ! 20Wa Allah yantiiku salaam fi guluubku wa yirassil leeku marra taaniye Isa al-hu azalah leeku gubbaal wa hu al-Masiih. 21Waajib yagood fi l-sama lahaddi yoom al-foogah Allah yijaddid kulla cheyy. Wa da misil hu gaalah min zamaan be waasitat al-anbiya al-saalihiin al-rassalaahum. 22Wa l-nabi Muusa gaal : <Allah Ilaahku yigawwim leeku min akhwaanku nabi misli ana. Asmaʼo kalaamah wa sawwu kulla cheyy al-yuguulah leeku.>#3:22 Al-kalaam da talgooh fi Tasniya 18:15. 23<Wa ayyi naadum al-ma yasmaʼ kalaamah, waajib yafsuluuh min chaʼab Allah wa yahlak.>#3:23 Al-kalaam da talgooh fi Laawiyiin 23:29.

24«Be misil da, kulla l-anbiya hajjo be wakitna da, min al-nabi Samuwiil wa kulla l-anbiya al-jo waraayah. 25Wa intu iyaal al-anbiya dool wa ahal al-muʼaahada al-Rabbuku Allah sawwaaha maʼa juduudku wakit hu gaal le Ibraahiim : <Be zurriiytak bas nibaarik kulla l-umam fi kulla l-ard.>#3:25 Al-kalaam da talgooh fi Takwiin 12:3. 26Wa Allah rassal abdah Isa leeku intu awwal, gubbaal al-umam al-aakhariin, achaan yibaarikku wa yigabbil ayyi waahid min al-derib al-fasil.»

Actualmente seleccionado:

Aʼmaal al-Rusul 3: ADT19

Destacar

Copiar