Aʼmaal al-Rusul 22

1Wa gaal : «Ya akhwaani, ya abbahaati, asmaʼo kalaami. Khalli nidaafiʼ le nafsi.» 2Wa wakit al-naas simʼo hu yihajji leehum be kalaam ibraani, sakato marra waahid.

Wa Buulus gaal : 3«Ana Yahuudi wildooni fi hillit Tarsuus fi balad Kilikiiya wa laakin rabbooni hini fi Madiinat al-Khudus. Wa bigiit tilmiiz hana sayyidna Gamaliyiil wa hu allamaani kikkeef nitaabiʼ churuut al-Tawraat hana juduudna adiil wa nitaabiʼ kalaam Allah be chidde misilku intu kulluku al-gaaʼidiin hini al-yoom. 4Wa ana azzabt naas al-yitaabuʼu derib Isa al-Masiih wa dawwart naktulhum wa rabat rujaal wa awiin wa dasseethum fi l-sijin. 5Wa kalaami da sahiih wa kan ma tisadduguuni, asʼalo kabiir rujaal al-diin wa majlas al-kubaaraat. Humman zaathum antooni jawaabaat le akhwaanhum fi madiinat Dimachkh. Wa ana macheet achaan nakrub naas hana Isa al-gaaʼidiin hinaak wa dawwart narbuthum wa nigabbil beehum fi Madiinat al-Khudus achaan yiʼaakhubuuhum hini.

6«Wa khalaas, macheet wa wakit al-saaʼa bigat gariib al-duhur, garrabt le Dimachkh. Fajʼatan, nuur chadiid daawa foogi min al-sama. 7Wa ana wagaʼt fi l-turaab wa simiʼt hiss hana naadum gaaʼid yihajji leyi wa yuguul : ‹Ya Chaawuul, ya Chaawuul, maalak titaʼʼibni ?› 8Wa ana raddeet leyah wa gult : ‹Ya l-sayyid, inta yaatu ?› Wa hu gaal : ‹Ana Isa al-min al-Naasira al-inta gaaʼid titaʼʼibah.› 9Wa l-naas al-musaafiriin maʼaayi chaafo al-nuur wa laakin ma simʼo hiss hana l-naadum al-yihajji leyi. 10Wa ana saʼaltah wa gult : ‹Ya l-Rabb, tidoor nisawwi chunu ?› Wa l-Rabb gaal : ‹Gumm wa amchi fi Dimachkh wa talga naadum waahid al-yiʼooriik kulla cheyy al-waajib tisawwiih.›

11«Wa baʼad chift al-nuur al-chadiid da, ma nagdar nichiif wa l-naas al-maʼaayi karabooni min iidi lahaddi jaabooni fi Dimachkh. 12Wa naadum waahid gaaʼid fi Dimachkh usmah Hanaaniiya. Hu gaaʼid yitaabiʼ al-Tawraat adiil wa kulla l-Yahuud fi Dimachkh yachhado leyah kadar hu naadum takhi. 13Wa hu ja leyi wa wagaf jambi wa gaal : ‹Ya akhuuna Chaawuul, chiif !› Wa tawwaali ke uyuuni anfataho wa chiftah.

14«Wa hu gaal : ‹Allah Rabb juduudna azalak achaan taʼarif muraadtah wa achaan tichiif Isa, abdah al-saalih wa tasmaʼ hissah. 15Achaan inta tabga leyah chaahid wa tihajji fi chaanah le kulla l-naas wa tiʼooriihum be kulla cheyy al-chiftah wa l-simiʼtah. 16Wa hassaʼ tarja chunu battaan ? Gumm adʼi be usum al-Rabb wa nikhattusuuk wa Allah yakhfir leek zunuubak.›

17«Wa baʼad da, gabbalt fi Madiinat al-Khudus. Yoom waahid ana gaaʼid nisalli fi beet Allah wa cheyy misil al-noom sawwaani. 18Wa chift Isa fi ruʼya wa hu hajja leyi wa gaal : ‹Gumm ajala. Amrug min Madiinat al-Khudus. Al-naas hini yaabo ma yasmaʼo chahaadtak leyi.› 19Wa gult : ‹Ya Rabbi, humman yaʼarfu ana gammeet macheet fi kulla buyuut al-sala wa karabt fi l-sijin al-naas al-muʼminiin beek wa jaladtuhum. 20Wa wakit al-naas gaaʼidiin yaktulu Istifaan al-chahad leek, ana gaaʼid maʼaahum radyaan be katlah wa ana gaaʼid nahris khulgaan al-naas al-gaaʼidiin yaktuluuh.› 21Wa laakin hu gaal leyi : ‹Amchi. Ana nirassilak baʼiid min hini. Nirassilak le l-naas al-ma Yahuud.›»

22Wa l-naas gaaʼidiin yasmaʼo kalaamah. Laakin wakit hu hajja be l-naas al-ma Yahuud, khalaas gammo aato foogah wa gaalo : «Aktuluuh le l-naadum da ! Ma tikhalluuh yiʼiich !» 23Wa gammo aato wa rafaʼo khulgaanhum foog wa hazzoohum wa chaalo turaab wa chattatooh foog fi l-hawa.

24Wa l-khaayid amaraahum le askarah achaan yijiibu Buulus daakhal fi l-gasir al-askari wa yajluduuh lahaddi yiʼooriihum maala al-naas yiʼiitu foogah. 25Wa wakit gaaʼidiin yarbutu Buulus achaan yajluduuh, askari waahid masʼuul fi 100 askari waagif jambah wa Buulus hajja leyah wa gaal : «Fi l-gaanuun, yujuuz leeku tajludu al-naadum al-indah jinsiiya roomaaniye gubbaal ma tichaaruʼuuh walla ?»

26Wakit al-masʼuul simiʼ al-kalaam da, hu macha hajja le l-khaayid wa gaal : «Inta dawwart tisawwi chunu ? Al-naadum da indah jinsiiya roomaaniye.»

27Wa l-khaayid ja le Buulus wa saʼalah wa gaal : «Sahiih inta Roomaani walla ?» Wa Buulus gaal leyah : «Aywa.» 28Wa l-khaayid gaal : «Ana kaffeet gurus katiir hatta ligiit al-jinsiiya al-roomaaniye.» Wa Buulus gaal : «Ana mawluud Roomaani.» 29Wa tawwaali ke, kulla l-asaakir al-dawwaro yajburu Buulus yihajji leehum, humman kasso minnah. Wa khalaas al-khoof karabah le l-khaayid achaan hu rabat naadum Roomaani be janaaziir.

30Wa ambaakir, al-khaayid dawwar yiʼakkid min al-cheyy al-Yahuud tahamo beyah Buulus. Wa hallah min al-janaaziir wa naada kubaaraat rujaal al-diin wa kulla naas hana majlas al-Yahuud achaan yilimmu. Wa wadda leehum Buulus wa waggafah giddaamhum.

Actualmente seleccionado:

Aʼmaal al-Rusul 22: ADT19

Destacar

Copiar