Aʼmaal al-Rusul 20

Safar Buulus

1Wa wakit al-barjaal kammal marra waahid, Buulus naada al-talaamiiz achaan yilimmu wa hajja leehum. Hu chajjaʼaahum wa sallamaahum wa faat le balad Magiduuniya. 2Wa hinaak wakit chagga al-balad di, hu allam naas katiiriin wa chajjaʼaahum katiir. Wa baʼad da, macha al-Yuunaan. 3Wa gaʼad hinaak muddit talaata chahar. Wa dawwar yisaafir fi balad Suuriya. Wa wakit dawwar yarkab fi l-safiina, hu simiʼ al-Yahuud alʼaamaro foogah achaan yaktuluuh fi safarah. Wa be da, khalla rakuub al-safiina achaan yigabbil fi Aasiya be derib hana Magiduuniya.

4Wa akhwaan waahidiin saafaro maʼaayah wa humman Suubaatar wileed Birrus min hillit Biriiya wa Aristaarkus wa Sukuundus min hillit Tasaluuniiki wa Khaayus min hillit Darba wa Timuutaawus. Wa Tichiikus wa Turuufiimus min balad Aasiya. 5Wa kulla l-naas dool faato achaan yarjoona fi hillit Turuwaas. 6Wa baʼad usbuuʼ hana iid al-Khubza bala Tawwaara, aniina rikibna fi l-safiina wa saafarna min madiinat Filibbi. Wa baʼad khamsa yoom, wisilna fi Turuwaas wa lammeena maʼaahum. Wa gaʼadna hinaak sabʼa yoom.

Al-ajab fi hillit Turuwaas

7Wa yoom al-ahad, wakit lammeena maʼa l-muʼminiin achaan naksuru sawa al-khubza hana acha al-Rabb, Buulus gamma fassar leena lahaddi ust al-leel achaan dawwar yisaafir be fajur. 8Wa l-beet al-lammeena foogah gasir wa aniina gaaʼidiin foogah foog. Wa fawaaniis katiiriin muwalliʼiin. 9Wa sabi waahid gaaʼid ambeenaatna usmah Aftiikhuus wa hu gaʼad tihit fi khachum al-chubbaak. Wa wakit Buulus gaaʼid yikallim mudda tawiile, al-sabi da naam marra waahid wa wagaʼ min al-gasir al-taalit. Wa wakit rafaʼooh, ligooh mayyit. 10Wa Buulus nazal min al-beet ajala wa dangar foogah wa hadanah. Wa gaal leehum : «Khalaas ma takhaafo ! Ruuhah gabbalat.»

11Wa Buulus gabbal foog fi l-gasir wa kassar al-khubza wa akal maʼaahum. Wa baʼad da, gamma yikallim battaan lahaddi l-fajur. Wa fajur gamma saafar. 12Wa l-sabi da jaabooh fi beetah hayy wa guluubhum raagdiin marra waahid.

Kalaam Buulus le l-kubaaraat

13Gubbaal Buulus ma yamchi be derib hana hillit Assuus, hu ooraana achaan namchu be l-bahar wa niwassulu giddaamah fi Assuus wa narjooh lahaddi yaji leena. Wa khalaas, aniina rikibna fi l-safiina wa macheena. 14Wa wakit Buulus ja leena fi Assuus, rakkabnaah maʼaana fi l-safiina wa macheena le hillit Mitiliini. 15Wa minha macheena giddaam wa ambaakir jiina gariib le jaziirat Khiyuus. Wa l-yoom al-taalit, jiina gariib le jaziirat Saamuus. Wa l-yoom al-raabiʼ, futna giddaam le madiinat Afasus wa wagafna fi hillit Miliitus. 16Wa ma wagafna fi Afasus achaan Buulus ma dawwar yiʼakhkhir fi balad Aasiya. Hu dawwar yamchi ajala. Wa kan mumkin, yalhag Madiinat al-Khudus gubbaal iid al-Khamsiin.

17Wa min Miliitus, Buulus rassal fi Afasus le kubaaraat jamaaʼat al-muʼminiin achaan yaju leyah. 18Wa wakit al-kubaaraat jo, Buulus kallam leehum wa gaal : «Intu taʼarfu haalti kikkeef kulla l-mudda al-gaʼadtaha maʼaaku fi balad Aasiya min awwal yoom jiit. 19Kulla yoom, ana khadamt le Rabbina misil miskiin wa dumuuʼi daffago katiir fi chaanku. Wa intu taʼarfu kikkeef al-Yahuud alʼaamaro foogi wa l-taʼab da bigi leyi gaasi. 20Wa taʼarfu wakit ana gaaʼid niʼallimku, ana ma labbadt leeku ayyi kalaam hana faayditku wa ballakht leeku nafs al-bichaara kan barra giddaam naas al-hille walla daakhal fi buyuutku. 21Wa nihazzir al-Yahuud wa l-Yuunaaniyiin be nafs al-kalaam wa nuguul kadar waajib kulluhum yutuubu le Allah wa yiʼaamunu be Rabbina Isa.

22«Wa l-yoom bas, ana musaafir wa maachi le Madiinat al-Khudus. Ruuh Allah yusuugni wa ma naʼarif al-cheyy al-yabga foogi hinaak 23illa fi ayyi hille al-namchi foogha, al-Ruuh al-Khudduus yihazzirni kadar hinaak yidissuuni fi l-sijin wa yitaʼʼubuuni katiir. 24Hayaati ma muhimme leyi. Laakin al-muhimm leyi nikammil khidmit Rabbina Isa al-hu antaaha leyi. Waajib nachhad le l-naas wa niʼooriihum be l-bichaara hana niʼmat Allah.

25«Khalaas, ana jiit gaʼadt maʼaaku wa ballakht leeku al-bichaara hana mamlakat Allah. Wa hassaʼ naʼarif min baʼad al-yoom naadum waahid minku ma bichiifni battaan. 26Asmaʼo adiil. Ana nachhad kadar intu masʼuuliin min al-cheyy al-yaji foogku. Ana bari minku ! 27Ana ballakht leeku hadaf Allah kulla ke wa ma labbadt minku cheyy waahid.

28«Fakkuru fi nufuusku wa fi kulla jamaaʼat al-muʼminiin hana Allah achaan al-Ruuh al-Khudduus khattaaku fooghum ruʼyaan. Aywa, asraho be jamaaʼat al-muʼminiin al-Allah charaahum be damm Ibnah. 29Wa ana naʼarif kadar baʼad ana macheet khalaas, naas fasliin yadkhulu fi usutku misil al-maraafʼiin yindasso fi ust al-khanam wa yaakuluuhum. 30Wa naas waahidiin minku kula yugummu yiʼallumu kalaam ma sahiih achaan yidooru yalgo minku talaamiiz yitaabuʼuuhum. 31Wa achaan da, khuttu baalku. Ma tanso kikkeef ana gaaʼid niwassi ayyi waahid minku leel wa nahaar muddit talaata sana wa ma tanso dumuuʼi fi chaanku.

32«Wa hassaʼ niʼamminku le Allah wa le kalaam niʼmatah al-kallamtuku beeha. Achaan al-kalaam da yagdar yigawwi iimaanku. Wa be l-kalaam da, talgo al-warasa al-Allah yantiiha le kulla l-naas al-khaassiin leyah. 33Abadan ana ma dawwart nichiil cheyy min ayyi waahid minku wa la fudda wa la dahab wa la khalag. 34Intu zaatku taʼarfu kadar ana khadamt be duraaʼi le niʼiich wa le niʼayyich al-naas al-maʼaayi. 35Wa ana daayman wassaftuku be l-cheyy al-sawweetah fi usutku kadar waajib nakhdumu achaan niʼaawunu al-taʼbaaniin. Wa ma waajib nanso kalaam Rabbina Isa wakit gaal : ‹Farha hana l-banti akbar min farha hana l-bichiil.›»

36Wa wakit Buulus kallam al-kalaam da, hu barak wa salla maʼaahum. 37Wa kulluhum bako wa hadano Buulus wa habbooh. 38Wa humman haznaaniin bilheen achaan hu gaal leehum battaan ma yichiifuuh. Wa khalaas addooh le l-safiina.

Actualmente seleccionado:

Aʼmaal al-Rusul 20: ADT19

Destacar

Copiar