Aʼmaal al-Rusul 14

Fi Iguuniya

1Wa nafs al-cheyy bigi fi Iguuniya. Buulus wa Barnaaba dakhalo fi beet al-sala hana l-Yahuud wa gammo yihajju be gudra lahaddi naas katiiriin aamano be Isa min al-Yahuud wa min al-Yuunaaniyiin. 2Wa laakin al-Yahuud al-abo ma yiʼaamunu harracho al-naas al-ma Yahuud wa khayyaro fikirhum achaan yazʼalo min al-muʼminiin. 3Wa Buulus wa Barnaaba ma khaafo minhum wa tawwalo hinaak wa kallamo be l-Rabb Isa le naas al-hille be kalaam waadih. Wa l-Rabb antaahum alaamaat wa ajaayib achaan yisabbit bichaarat rahmatah giddaam al-naas. 4Wa naas al-hille alfaarago, al-waahidiin lammo maʼa l-Yahuud wa l-waahidiin maʼa l-rusul.

5Wa l-Yahuud astafago maʼa l-naas al-ma Yahuud wa kubaaraathum, wa kulluhum chaalo niiye achaan yiʼazzubu al-rusul wa yarjumuuhum. 6Wa wakit Buulus wa Barnaaba simʼo al-khabar da, jaro fi balad Likooniya fi hillaal Listara wa Darba wa hawaaleehum. 7Wa hinaak kula, gammo ballakho le l-naas be l-bichaara.

Fi Listara wa Darba

8Wa fi hillit Listara fi naadum maʼduur. Hu mukarsah min wildooh wa yoom waahid kula, ma raakh. 9Wa hu gaaʼid yasmaʼ kalaam Buulus adiil wa Buulus chaafah wa irif al-maʼduur indah iimaan achaan yalga al-aafe. 10Wa Buulus naadaah be hiss chadiid wa gaal : «Gumm foog be rijileenak.» Wa l-raajil natta foog wa gamma yuruukh.

11Wa l-naas al-laammiin chaafo al-cheyy al-Buulus sawwaah wa aato be lukhkhithum al-likooniiye wa gaalo : «Al-ilaahaat chaalo suurat al-naas wa nazalo fi usutna !» 12Wa gaalo Barnaaba hu Ziyuus malik al-ilaahaat wa Buulus hu Harmiis khachum al-kalaam hana l-ilaahaat achaan hu bas al-gaaʼid yikallim. 13Wa raajil al-diin hana l-sanam Ziyuus jaab tiiraan wa nuwwaar muladdamiin fi khachum baab beet al-sanam hana Ziyuus. Wa beet al-sanam da gaaʼid fi dakhuul al-hille. Hu wa kulla l-naas dawwaro yigaddumu dahiiye le l-rusul.

14Wa wakit al-rusul Barnaaba wa Buulus simʼo be l-kalaam da, humman ziʼilo zaʼal chadiid wa charrato khulgaanhum wa jaro fi ust al-naas. 15Wa gaalo : «Ya l-naas, maalku tisawwu cheyy misil da ? Aniina naas misilku bas ! Wa jiina niballukhu leeku al-bichaara achaan tikhallu al-kalaam al-baatil da wa titaabuʼu kalaam Allah al-Hayy. Hu bas khalag al-samaawaat wa l-ard wa l-buhuur wa kulla cheyy al-fiihum. 16Fi l-zaman al-faat, Allah khalla kulla l-gabaayil yiʼiichu misil humman yidooru. 17Wa laakin fi l-wakit da kula, Allah anta chahaada achaan yaʼarfuuh hu mawjuud. Hu sawwa leeku al-kheer wa razakhaaku be almi min al-sama wa khalla fi l-khariif wa chabbaʼaaku be akil wa antaaku farah fi guluubku.» 18Wa be kalaamhum da kula, ma gidro yadharo al-naas yisawwu leehum dahiiye.

19Wa baʼad da, Yahuud waahidiin jo min Antaakiya wa Iguuniya wa harracho al-naas. Wa rajamo Buulus achaan yaktuluuh. Wa khalaas, karrooh wa zagalooh barra min al-hille. Wa fi fikirhum, hu maat khalaas. 20Wa laakin wakit al-talaamiiz jo wa hawwagooh, hu gamma wa gabbal maʼaahum fi l-hille. Wa ambaakir, Buulus macha maʼa Barnaaba le hillit Darba.

Al-rusul gabbalo fi deribhum

21Wa ballakho al-bichaara le naas al-hille wa katiiriin minhum bigo talaamiizhum. Wa baʼad da, gabbalo fi Listara wa min Listara macho fi Iguuniya wa gabbalo battaan fi Antaakiya Bisiidiya. 22Wa fi kulla l-hillaal dool, chajjaʼo al-talaamiiz wa wassoohum achaan yagoodu saabtiin fi l-iimaan. Wa gaalo leehum : «Akiid, taʼab katiir yaji foogna kullina fi l-derib al-yiwaddiina fi mamlakat Allah.» 23Wa fi ayyi bakaan, azalo naas min jamaaʼat al-muʼminiin achaan yabgo leehum kubaaraat. Wa saamo wa saʼalo Allah leehum wa ammanoohum le l-Rabb Isa al-humman kulluhum aamano beyah. Wa khalaas macho.

24Wa baʼad chaggo balad Bisiidiya, jo fi balad Bamfiiliya. 25Wa ballakho al-bichaara le naas hillit Barga wa macho giddaam le hillit Attaaliiya. 26Wa hinaak rikbo fi safiina wa chaggo al-bahar achaan yigabbulu fi hillit Antaakiya fi Suuriya. Wa fi l-hille di, awwal saʼalo leehum Allah achaan yahfadhum be rahmatah wakit humman maachiin yisawwu al-khidme al-hassaʼ kammalooha. 27Wa wakit wislo khalaas, naado kulla jamaaʼat al-muʼminiin yilimmu. Wa ooroohum be kulla cheyy al-Allah sawwaah beehum wa kikkeef Allah fatah derib al-iimaan le l-naas al-ma Yahuud. 28Wa gaʼado wakit tawiil maʼa l-talaamiiz.

Actualmente seleccionado:

Aʼmaal al-Rusul 14: ADT19

Destacar

Copiar