Mateo 7

Sa 'te da' qonimit ga' lasouaxaset ga' naqáỹa

(Lucas 6.37-38, 41-42)

1Sa 'te qomle da' 'auauóỹi ga' lasouaxaset ga' 'adaqaỹai, qaidi ñi' Dios sa 'te da' ỹa'uo ga' 'adasouaxasíchii. 2Qá'a jiñi'me da' 'ami nimi't, qaa'le ỹipagaqchíichiỹi da' 'aviñíit'ec ga' 'adaqaỹai, qataxa ỹipagaqchíichiỹi ga' 'ami 'aualoqtenaxañíỹa da' 'analoqchiñii ga' lasoxoc ga' 'adaqaỹai. 3Qataxa ¿tóoqo'chi 'auañoxot da' 'auc'atéetac ga' 'auaqapi lesochi 'me huétaỹi jana' l'aite ga' 'adaqáỹa, qaa'le sa 'te 'aulo'o' jega'me 'epaq let'ádaic 'me huétaỹi jana' mai'chi 'ad'aite? 4Qá'a da' 'uootaxa huétaỹi jana' 'ad'aite ga' 'epaq let'ádaic, qalqaiga ¿tóoqo'chi da' 'auenapéga ga' 'adaqáỹa da' 'onétojo': “Ỹa jaỹim 'auaséet'em qomle da' ñaqat di' 'auaqapi lesochi 'me huétaỹi jana' 'ad'aite?” 5Qalqaiga ¡'am 'me 'auenapeela't da' 'am 'eesa! 'Au'áuaxañi qomle da' 'anaqat di' 'epaq let'ádaic 'me huétaỹi jana' 'ad'aite, tetoqo' ỹátaqta 'anauáachiiñi. Qana'chi 'auañoxot da' 'anaqat ga' 'auaqapi lesochi 'me huétaỹi jana' l'aite ga' 'adaqáỹa.

6Sa 'te qomle da' 'auañimii na' pioxodipi ga'me neuoxoset 'me sa qoỹisetaxat. Píiỹa, jen'me qomle 'ami dasolóo'te, qana'chi 'ami ỹicolaxata'pe. Qataxa 'ena't qomle da' 'auasaqaiỹot jaga' coochi lat'édai jaga' 'an'etaqchii. Píiỹa qomle, qana'chi pétapiỹi.

Qoỹiỹáxanaaque, qonmitáaque qataxa qoỹitóuoxouo ga' som

(Lucas 11.9-13; 6.31)

7'Aviỹáxañii, tetoqo' ñi' Dios 'ami ỹanema ga'me 'aviỹáxañiỹaaque; 'aumítaxañii, tetoqo' 'auanachíiỹa jega'me 'anmichíitaaque; qataxa 'autóuoqoi'uo ga' som, tetoqo' 'ami qoỹ'ouátee'ta. 8Qá'a jega'me diỹáxan, qaa'le ỹaconguet ga' ỹiỹáxanaaque; qataxa jega'me dimitaxan, qaa'le nata ga' nimitáaque; qataxa ga' ỹitóuoxouo ga' som, qaa'le qoỹ'ouateguet.

9¿Jái'chogamaxa 'oonolec da' 'oñíita ỹañoxot da' ỹanem ga' qa' ga' lec'óxot, da' 'uootaxa ỹiỹáxanaaque jaga' pan? 10¿'uootaxa ỹiỹáxanaaque ga' níỹaq, qaa'le ỹanem ga' nanaic? 11Da' 'ami matemané'e 'ami qalhuaxaiqa, qalqaiga 'auaỹáchiñii da' 'auañimii ga' 'ónaxaic jega'me 'ac'óxochii. ¡Taalia'chi toqo' da' sa ỹágueegue jiñi'me 'adet'ai 'me net'ague da' piỹem da' ỹañoxot da' ỹanem ga' 'ónaxaic jega'me ỹiỹaxanot jiñi'me!

12Chan'eesa 'ami jega'me 'ónaxaic 'me sétaaque da' 'ami ỹ'eteque na' siỹaxadipi, na'chiga qomle 'av'íchiic ỹima jen'me. Qá'a na'chida jeda'me damaxasoxolégue jen'me laqátaxacpi so' Moisés qataxa naua' lidii's so' l'aqtáxanaxanecpi ñi' qan'étoqo't.

Ñi' som 'me sa lecaỹi

(Lucas 13.24)

13'Aunoxoñiỹo'uet qomle ñi' som 'me sa lecaỹi. Qá'a ñi' som qataxa so' naq'aic 'me ỹilót'a ga' neleuaqa', jeso'me ỹátaqta leca'ague, qataxa qaỹa ga' laqalaic. Ỹátaqta sa lec'óxotolec jen'me quet'ague jeso'me. 14Qaláxasa jiñi'me som qataxa so' naq'aic 'me taỹá'a da' nec'alaxa, qaa'le ỹátaqta sa lecaỹi qataxa 'uo da' laqalaic. Ỹátaqta sa léca jen'me ỹauana.

Jaga' 'epaq mai'chi qoỹaateton jaga' jala

(Lucas 6.43-44)

15'Avichiỹa'aguet qomle jena'me qovínaxanaxaicpi 'me 'enapeela't da' l'aqtáxanaxanecpi ñi' Dios. Jena'me 'ami nec'átalo, qana'chi ỹátaqta ỹadénaxat da' lasoxoc jana' n'aanaxate, qaláxasa na' p'áuo 'ená'am da' lasoxoc na' síiỹac 'me di'quiỹaac. 16Qaláxasa 'ami 'auaatetoñii jen'me, ỹasouaxat jen' ỹí'etpi. Qá'a da' qonaqat jan' jala jana' uvas, qaláxasa sa 'te da' qoỹachiỹoxotaỹi jaga' 'epaq 'uo jana' le. Qataxa da' qonaqat jana' higo jala, qaa'le sa 'te da' qoỹachiỹoxotaỹi jaga' couquic ỹaataxadai. 17Qana'chi ỹima jan'me 'epaq 'me nó'in, jan'me ỹátaqta nó'in da' jaláỹaxac. Qataxa jan'me 'epaq 'me sa nó'in, jan'me sa nó'in da' jaláỹaxac. 18Qá'a jaga' nó'in 'epaq da' nesetréegue gaua' jala, qaa'le sa 'te da' sa nó'in. Qataxa jaga' sa nó'in 'epaq da' nesetéegue jaga' jala, qaa'le sa ỹañoxot da' nó'in. 19Qataxa ỹima jan'me 'epaq 'me sa nó'in da' jaláỹaxac, jan'me qomle qoỹiquesoxo'ñot, qana'chi qoỹasaxánỹi ga' dóle'. 20Chan'eesa 'ami 'auañoxochii da' mai'chi 'auaatetoñii jena'me qovínaxanaxaicpi, ỹasouaxat jen'me ỹí'etpi.

Sa 'te da' 'ami saateto'n

(Lucas 13.25-27)

21Na' siỹaxadipi 'me jaỹim ỹiỹáxatapega, 'eet'oi: “'Am ỹisaliaxanec,” jen'me sa 'te da' ỹima da' ỹinoxoneuó'o jega'me ỹa nata't l'onataxanaxac ñi' Dios 'me net'ague da' piỹem. Na'chigáta jega'me ỹí'et ga' 'éetapeec ñi' ỹit'a. 22Qomle ỹivíta jega'me nolo', qaa'le sa lec'óxotolec qomle na' jaỹim 'enapéga, 'eet'oi: “'Am ỹisaliaxanec, qo'mi s'onataxanaqátapega naale da' 'adenaxat da' s'aqtaxanaqátac, qataxa da' s'odáqaiỹi jen' né'ecpi nataqtáqaicpi, qataxa da' s'étaq na' n'anecpi 'me ỹí'et da' qoỹ'aalá'ac.” 23Qaláxasa jaỹim senapéga qomle, seet'oi: “Sa 'te da' 'ami saateto'n. Jaỹim 'oquí'ỹai qomle, 'ami 'me 'av'íchiitac na' sa nó'inpi.”

Saua' dos l'oxonaxala'te ga' 'emec

(Lucas 6.47-49; Marcos 1.22)

24Chan'eesa jega'me ỹátaqta jaỹim naquiáxatapega qataxa ỹí'et jeda'me séetapeec, qana'chi jega'me 'ená'am ga' siỹaxaua 'me ỹátaqta ỹátenaxanaxaic 'me ỹ'oxoolégue qa'en ga' qa' da' n'oxoséguem ga' l'emec. 25Cha ỹivíd'a da' janac na' huétep, qataxa da' ỹ'aatot qa'en so' ñáchi, qataxa da' janac na' laỹat let'ádaic, qaláxasa sa 'te da' ỹañoxot da' noláxachiñi jeso'me 'emec, qá'a ỹátaqta ỹ'oxootelégue qoỹin so' qa'. 26Jega'me jaỹim naquiáxatapega, qaa'le sa 'te da' ỹí'et dójo' séetapeec, qaláxasa jega'me 'ená'am ga' siỹaxaua 'me qaỹa 'te ỹaỹátenaac, da' ỹ'oxoolégue qa'en ga' pogaxanaxa da' n'oxoséguem ga' l'emec. 27Cha ỹivíd'a da' janac na' huétep, qataxa da' ỹ'aatot qa'en so' ñáchi, qataxa da' janac na' laỹat let'ádaic, qana'chi ỹañoxot da' noláxachiñi. ¡Qana'chi ỹátaqta doláchiỹi!

28So' Jesús joca'li ỹimat da' l'aqtaxanaxac, qana'chi jeso'me siỹaxadipi ỹátaqta ỹ'aalátapeec, ỹasouaxat naua' lapaxaguenataxanaxaco. 29Qá'a jeso'me da' dapaxaguenataxáatac, qaa'le qoỹilá'a da' huet'ot da' l'añaxac ñi' qan'étoqo't. Sa 'te da' 'ená'am jen'me dapaxaguenataxáatapeec jen' laqátaxacpi so' Moisés.

Actualmente seleccionado:

Mateo 7: PLGNT93

Destacar

Copiar