Mateo 4

Da' napiinaguec so' Jesús

(Marcos 1.12-13; Lucas 4.1-13)

1Joca'li ỹim dójo', qana'chi so' Espíritu Santo ỹauéguee'ga so' Jesús so' totelégue 'aléua, da' qaidi so' qadó'o paiỹac ỹapiỹen jeso'me.

2Qana'chi jeso'me sa 'te da' dequé'e, ỹivídaxatetreegue saua' cuarenta noloqo'te qataxa saua' cuarenta pi'ỹáxadi. Joca'li ỹinoxodéegue jesaa'me noloqo'te, qana'chi 'uo da' loqouáxa. 3Qana'chi jeso' qadó'o ỹic'áta so' Jesús da' ỹapiỹen. Qana'chi 'enapego', 'enaaco':

—Da' ỹátaqta 'eesa 'am lec'óxot ñi' qan'étoqo't, 'ónaxaic qomle da' 'auen taỹá'a pan jénjo' qa'pi.

4Qana'chi so' Jesús 'enaaco':

—Naua' nidii's l'aqtaqa ñi' qan'étoqo't 'eet'oi: “Sa 'te da' na'chagáta jaga' pan da' ỹ'añaqtet ga' siỹaxaua, nataq'en ỹima na' l'aqtacpi ñi' qan'étoqo't.”

5Qana'chi so' qadó'o ỹauéga jeso'me so' noic Jerusalén 'me huá'a da' qoỹi'ỹoxoden ñi' Dios. Qana'chi ỹavíisee'mec so' lóvi' so' tamnaxaqui. 6Qana'chi 'enapéga, 'enaaco':

—Qomle ỹátaqta 'eesa da' 'am lec'óxot ñi' qan'étoqo't, 'aunóteegue qomle. Qá'a di' l'aqtac ñi' qan'étoqo't 'me nedétañi 'eet'oi:

Ñi' qan'étoqo't namaq qomle ga' lamaxasec piỹem lé'ec, qaidi 'am netelá'a.

Qana'chi 'am ỹachitalóo'te qomle naua' loua' jega'me,

qaidi sa 'te da' toxoteguet naua' 'adichil na' qa'pi.

7Qana'chi so' Jesús 'enaaco':

—Nataq'en jidi' nedétañi l'aqtac ñi' qan'étoqo't 'eet'oi: “Sa 'te qomle da' 'auapiỹen ñi' 'adasoxola' Dios.”

8Qataxa v'iỹílaxalégue so' qadó'o da' ỹauéga so' Jesús jeso' soqoỹoqóchisee'mec qasoxonaxa. Qana'chi ỹaloxonalo 'ena'uaque naua' 'ale'u 'me huetalóo'te jen' 'aléua qataxa ỹima da' l'amaqchic jen'me. 9Qana'chi 'enaaco':

—Jaỹim 'am sanem ỹima jénjo', da' 'auañoxot da' 'ausóidiñi naua' 'adiliictel da' jaỹim 'avi'ỹoxoden.

10Qana'chi so' Jesús 'enapego', 'enaaco':

—'Am paiỹac Satanás, jaỹim 'ocá'ai, qá'a di' nedétañi l'aqtac ñi' qan'étoqo't 'eet'oi: 'Avi'ỹoxoden ñi' qadasoxola' Dios, qataxa na'chiñíta 'au'onataxanot.

11Qana'chi jeso'me qadó'o, jeso'me cá'ai so' Jesús, qana'chi janac so' namaxasecpi piỹem lé'ecpi da' qolecochiỹa jeso'me.

So' Jesús joca'li ỹímta d'onataxan huét'a di' Galilea

(Marcos 1.14-15; Lucas 4.14-15)

12So' Jesús joca'li dip'iỹíỹa so' Juan da' qoỹanétaaue jaga' cointáxanaxaqui, qana'chi jeso'me ỹic'áta di' 'aléua Galilea. 13Qaláxasa sa 'te da' ná'ña di' Nazaret. Na'chidáta da' ỹic'áta da' ná'ña di' noic Capernaum. Jidi'me net'ot na' loxogue jaso' peróna lat'édai 'me néta'uo so' loxogue di' 'aléua Zabulón qataxa di' Neftalí. 14Naq'áita dójo', qaidi ỹipaquíchiỹi jidi'me ỹidíñi jocalia'cho' so' Dios l'aqtáxanaxanec lenaxat Isaías, 'enaaco':

15'Am 'aléua 'me 'am lalémaxaset na' lec'oqtepi so' Zabulón qataxa so' Neftalí,

qataxa 'am naq'aic 'me 'anolquetelégue jaso' peróna 'me 'ap'aiỹi da' c'atena liiséguem di' ñáchi Jordán.

'Am Galilea 'me 'am netalégue jen'me sa judío lé'ec.

16Jen'me siỹaxadipi 'me huétaaue jen' n'álaxa, qaláxasa jen'me ỹilá'a jaso' sega'me coỹadáxanaqte lat'édai.

Jen'me huétaaue na' ỹátaqta sa lec'óxotolec lepaqal da' neleuaxa,

qaláxasa jen'me ỹicoỹadelégue jaso' sega'me coỹadáxanaqte.

17Huá'a, qana'chi so' Jesús 'ecot da' l'aqtaxanaxac, 'enaaco':

—'Auaxañiidéegue qomle naua' 'adoicódii', qá'a ma'le sa qaỹáaque da' l'onataxanaxac ñi' Dios 'me net'ague di' piỹem da' ỹilo'ogue da' ỹimata'a'téna.

So' Jesús niỹaxa'ñalo saua' cuatro ỹ'ácoxoiqa

(Marcos 1.16-20; Lucas 5.1-11)

18'Uo so' nolo' so' Jesús quet'ot so' loxogue jaso' peróna lat'édai 'me huá'ña di' Galilea. Qana'chi ỹila'alo saua' dos naqáỹa'. So' 'oonolec dos naua' lenaqa'te Simón Pedro. So' laqáỹa lenaxat Andrés. Jesaa'me ỹi'uaxáatrapiiñi so' le'uáanaxanaxa't, qá'a ỹ'ácoxoiqa. 19Qana'chi so' Jesús 'enapegalo', 'enaaco':

—Jaỹim 'oquiỹiỹi, qaidi 'ami sanema da' 'anmichiỹáaque na' siỹaxadipi, 'aviñíit'em da' 'adiỹ'ácoxoquii.

20Qana'chi jesaa'me qaỹa ga' ỹiita, qana'chi n'ónaxachichidiñi so' le'uáanaxanaxa't da' quetegue jeso'me.

21Joca'li ma'le qaỹat'aỹilo, qana'chi so' Jesús ỹitaxa ỹila'alo saua' dos naqáỹa', Jacobo qataxa so' Juan. Jesaa'me mai'chi lec'óqo'te so' Zebedeo, nétranỹi jaso' licota, huet'asopa so' let'a', n'etétrac so' le'uáanaxanaxa't. Qana'chi so' Jesús niỹaxa'ñalo jesaa'me. 22Huá'a, qana'chi jesaa'me n'ónaxatrañi jaso' lilicota' qataxa so' let'a', qana'chi quetegue jeso'me.

So' Jesús ỹapaxaguéetac so' sa lec'óxotolec siỹaxadipi

(Lucas 6.17-19)

23Qana'chi so' Jesús coleetapeelégue ỹima di' Galilea da' dapaxaguenataxáatapooue jen' lemáxaqui na' judiopi di' 'aléua, ỹ'axátetac da' 'ónaxaic qadipí'ic 'me ỹ'axat ñi' qan'étoqo't da' ỹilo'ogue ỹimata'a'téna, qataxa natadéetac ỹima jen' ỹodapecachi leleuaxa so' siỹaxadipi. 24Cha ỹivíd'a ỹima di' 'aléua Siria da' n'aqtaguec so' Jesús. Qana'chi qondá'a jeso'me jen'me ỹachoxodéetac na' ỹodapecachi leleuaxa, qataxa jen'me 'uo na' lé'ec nataqtáqaic, qataxa na' copicháxaicpi, qataxa na' sa d'añiiỹi. Qana'chi ỹima nataden so' Jesús. 25Qana'chi ỹátaqta sa lec'óxotolec na' siỹaxadipi 'equegue jeso'me, jen'me chiỹaqá'ña di' Galilea qataxa diaua' diez noiqa 'me qoỹimatá'ac Decápolis, qataxa di' Jerusalén, qataxa di' 'aléua Judea, qataxa na' p'aiỹi da' c'atena liiséguem di' ñáchi Jordán.

Actualmente seleccionado:

Mateo 4: PLGNT93

Destacar

Copiar