मत्ती 19
19
बिहा और तलाक के बारे मै ईसु की सिक्छा
(मरकुस 10:1–12)
1जे बात कैनै के बाद ईसु गलील सै लौहटकै यहूदिया के इलाके मै यरदन नद्दी के पार चलो गओ। 2एक बड़ी भीड़ बहाँ बाके पीछे हो लई, और उसनै बे बहाँ ठीक करे।
3उसकै परखनै के ताँई कुछ फरीसी उसके धौंरे पौंचे और बोले, “का जौ ठीक है कै कोई अपनी बईयर कै किसी बी कारन सै तलाक दे सकै है?”
4जबाब देते भए ईसु नै कैई, “का तुमनै पबित्तर सास्तर मै जौ ना पढ़ो कै, दुनिया कै बनानै बारे नै सुरू मैई, बे नर और नारी करकै बनाए हे? 5और कैई ही, ‘इस कारन आदमी अपने अईया-अब्बा कै छोड़कै अपनी बईयर के संग रैहगो, और बे दौनौ एक तन हो जांगे।’ 6इस तरै बे दो ना है, पर एक तन हैं, इसताँई जो परमेसर नै जोड़ो है बाकै कोई आदमी अगल ना करै।” 7#मत्ती 5:31उनौनै ईसु सै कैई, “फिर मूसा नै जौ आगियाँ काए ठैराई है कै कोई आदमी अपनी बईयर कै तियाग पत्तर लिखकै छोड़ दे?”
8ईसु नै उनसै कैई, “मूसा नै तुमरे मन की कठोरता के कारन तुमकै अपनी बईयर कै छोड़ दैनै की छूट दई, पर सुरू मै ऐंसो ना हो। 9#मत्ती 5:32; 1 कुर 7:10,11और मैं तुमसै कैरओ हौं, गलत काम के अलाबा किसी और कारन सै जो अपनी बईयर कै तलाक देवै है, और किसी दूसरी बईयर सै बिहा करै है, तौ बौ गलत काम करै है।”
10चेलौ नै ईसु सै कैई, “अगर लोग-बईयर को रिस्ता ऐंसो है, तौ बिहा कन्नो ठीक ना है।”
11ईसु नै उनसै कैई, “सब जौ बात ना समजंगे, सिरप बेई समजैं हैं जिनकै जौ बरदान मिलो है। 12कैसेकै कुछ लोग अपनी अईया के गरब सैई नामर्द पैदा भए हैं, कुछ आदमिऔ नै नामर्द बना दए हैं, और कुछ लोग ऐंसे बी हैं, जिनौनै सुरग के राज के ताँई बिहा ना कन्नै की कसम खाई है, जो समज सकै है बौ समज ले।”
बालकौ कै ईसु को आसीरबाद
(मरकुस 10:13–16; लूका 18:15–17)
13फिर लोग कुछ बालकौ कै ईसु के धौंरे लाए कै बौ उनके ऊपर हात रक्कै उनकै आसीरबाद दे और उनके ताँई पिराथना करै, पर उसके चेलौ नै बे डाँटे।
14पर ईसु नै कैई, “बालकौ कै मेरे धौंरे आन दो, उनकै मनैह मत करौ, कैसेकै सुरग को राज ऐंसोई को है।” 15और बौ उनके ऊपर हात रक्कै, बहाँ सै चलो गओ।
ईसु सै एक सेट आदमी को सबाल
(मरकुस 10:17–31; लूका 18:18–30)
16एक आदमी ईसु के धौंरे आकै पूँछल लगो, “गुरू, हमेसा की जिन्दगी पानै के ताँई मैं कौन सो भलो काम करौं?”
17ईसु नै उस्सै कैई, “तू मैंसै भलाई के बारे मै काए पूँछै है? भलो तौ एकई है, पर अगर तू जिन्दगी मै परबेस कन्नो चाँहै है तौ, आगियाँऔ कै मान कर।”
18उसनै ईसु सै पूँछी, “कौन सी आगियाँऔ कै?”
ईसु नै कैई, “कतल ना कर, किसी दूसरी बईयर सै गलत काम मत कर, चोरी ना कर, झूँटी गभाई ना दे। 19अपने अईया-अब्बा को आदर कर, और अपने पड़ोसी सै अपने जैसो पियार रख।”
20उस जमान नै ईसु सै कैई, “इन सब बातौं कै तौ मैंनै पालन करो है, अब मैं मै का बात की कमी है?”
21ईसु नै उस्सै कैई, “अगर तू सिद्द होनो चाँहै है, तौ जा, अपनो सब कुछ बेचकै गरीबौ मै बाँट दे, और तेकै सुरग मै धन मिलैगो, और आकै मेरे पीछे हो ले।”
22पर बौ नौजमान जौ बात सुनकै उदास होकै चलो गओ, कैसेकै बौ भौत सेट हो। 23तब ईसु नै अपने चेलौ सै कैई, “मैं तुमसै सच कैरओ हौं, सेटौं को सुरग के राज मै परबेस कन्नो मुसकल होगो। 24मैं जौ बी कैरओ हौं, कै सूंई के छेद सै ऊँट को लिकन्नो जादा आसान है, पर सेटौं को परमेसर के राज मै परबेस कन्नो मुसकल है।” 25जौ सुनकै, चेलौ नै भौत हैरान होकै कैई, “फिर किसकी मुक्ति हो सकै है?”
26ईसु नै उनकी ओर देखकै कैई, “आदमिऔ सै तौ जौ ना हो सकै है, पर परमेसर सै सब कुछ हो सकै है।”
27तब पतरस नै ईसु सै कैई कै, “देख, हम तौ सब कुछ छोड़कै तेरे पीछे हो लए हैं। तौ हमकै का मिलैगो?”
28 #
मत्ती 25:31;
लूका 22:30
ईसु नै अपने चेलौ सै कैई, “मैं तुमसै सच कैरओ हौं, कै नए युग मै जब आदमी को लौंड़ा अपनी महिमा के सिंगासन मै बैठैगो, तौ तुम बी जो मेरे पीछे हो लए हौ, बारैह सिंगासनौ मै बैठकै ईसराइल के बारैह गोतौं को नियाय करौगे। 29और जिसनै मेरे ताँई घर, भईयौ या बहनौ, अईया या अब्बा, बाल-बच्चे या खेत छोड़ दए हैं, बौ सौ गुना पागो और हमेसा की जिन्दगी को हकदार होगो। 30#मत्ती 20:16; लूका 13:30पर भौत से लोग, जो अग्गे हैं, पिच्छे हो जांगे और जो पिच्छे हैं, अग्गे हो जांगे।”
Actualmente seleccionado:
मत्ती 19: TKB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
New Life Compute Institute [NLCI] - CC BY-NC-ND 4.0
