Лука 20

(Мт 21:23-27; Мк 11:27-33)

1Нэгэтэ Һүмэ соо зондо һургаалаа номножо, Һайн Мэдээсэл айладхажа байхадань, түрүү санаартан, Хуули заадаг багшанар, ахамадууд ерэжэ:

2– Хэлэгты даа, Та иимэ юумэ хэхэ ямар эрхэтэйбта? Иимэ эрхэ засаг Танда хэн үгөөб? – гэжэ Иисүүсһээ һураба.

3– Бишье таанадһаа нэгэ юумэ һурахамни. Хэлэжэ үгэгты даа, 4Уһаар арюудхаха эрхэ Иоаннда Бурхан үгөө гү, али хүнүүд гү? – гэжэ Иисүүс урдаһаань асууба. 5Тэдэнэр хоорондоо зүбшэжэ оробо:

– Зай, юун гэжэ хэлэхэбибди? Хэрбээ Бурханһаа тиимэ эрхэ үгтөө гэбэлнай, тиигэбэл яахадаа Иоаннда этигэдэггүй байгаабта гэхэл. 6Хүнүүд үгөө гээ һаамнай, Иоанные лүндэншэ гэжэ этигэдэг бүхы энэ арад маниие шулуугаар шэдэжэ алаха.

7Тиигээд лэ тэдэнэр:

– Уһаар арюудхаха эрхэ Иоаннда хэнэй үгэһые бидэ мэдэнэгүйбди, – гэжэ харюусаба. 8Тиихэдэнь Иисүүс:

– Эдэ юумэнүүдые хэхэ эрхэ Намда хэнэй үгэһые Би баһа хэлэхэгүйб! – гэжэ тэдэндэ хэлэбэ.

Үзэмэй сэсэрлиг хүлһэлһэн үзэмшэд тухай һургаалта үгэ

9Тиигээд Иисүүс иимэ һургаалта үгэ арад зондо хөөрэбэ:

– Нэгэ хүн үзэмэй сэсэрлиг таряад, тойруулжа хүреэлбэ, тиигээд тэрэнээ үзэмшэдтэ хүлһэлөөд, удаан хугасаагаар аянда мордобо. 10Жэмэсэй эдеэшэхэ багта үзэмэй ургасаһаа өөрынь хуби абажа ерэхээр тэрэ хүн үзэмшэдтэ барлагаа эльгээбэ. Теэд үзэмшэд барлагыень зада сохёод, һөөргэнь хооһоор бусааба. 11Сэсэрлигэй эзэн хоёрдохи барлагаа үзэмшэдтэ эльгээбэ. Теэд тэдэнь барлагыень баһа сохижо, баһажа доромжолжо байгаад, юушье үгэнгүй табяа һэн. 12Эзэн гурбадахи барлагаа үзэмшэдтэ эльгээбэ, үзэмшэд тэрэнииень шулга нюлга сохёод, һөөргэнь намнажархиба. 13Үзэмэй сэсэрлигэй эзэн бодолгото болоод: «Яаха болоо гээшэбиб? Хайрата хүбүүгээ эльгээхэ юм байна. Хүбүүемни тэдэ хүндэлхэ бэзэ», – гэжэ шиидэбэ. 14Теэд үзэмшэд хүбүүень хараад, өөһэд хоорондоо зүбшэжэ оробо. «Энэ хүбүүн эсэгынгээ эд зөөри залгамжалха. Энээниие алая, тиигэбэл бүхы зөөринь манай болохо», – гэлсэбэ. 15Тиигээд тэдэнэр хүбүүень үзэмэй сэсэрлигһээ гаргажа алажархиба. Тиихэдэнь үзэмэй сэсэрлигэй эзэн тэдэ үзэмшэдые яаха болоноб? 16Эзэн ерээд, тэдэ үзэмшэдые алаха, тиигээд ондоо үзэмшэдтэ сэсэрлигээ даалгаха.

Хэлэхыень шагнаһан хүнүүд:

– Үгы даа, тиимэ юумэн болохогүй! – гэлдэбэ. 17Иисүүс тэндэ байгшадые хараад, иигэбэ:

– Нангин Бэшэг соо: «Хэрэггүй гэжэ барилгашадай голожо хаяһан шулууниинь гэрэй гол шухала тулга шулууниинь болоо» гэһэн үгэнүүд ямар удхатайб? 18Тэрэ шулууе мүргэжэ унаһан хүн хаха бута унаха, тэрэ шулуун хүнэй дээрэ унаа һаа, тэрэниие низа дараха.

Алба татабари тухай асуудал

19Хуули заадаг багшанар ба ахамад санаартан Иисүүс маниие хадхажа, энэ һургаалта үгэ хөөрэбэ гэжэ ойлгоод, тэрэ дороо Тэрэниие барижа абаха гэһэн аад, улад зонһоо айба. 20Иисүүсэй хойноһоо тагнуул табижа, үнэн сэдьхэлтэд мэтээр бэеэ харуулжа, Иисүүсые үгэ алдуулан гэнэдхээжэ баряад, Римэй захирагшын эрхэ засагта Тэрэниие тушааха зорилготойгоор өөһэдынгөө хэдэн хүнүүдые тэдэ эльгээбэ. 21Тэдэнь билдагуушалан:

– Багша аа! Та бодото үнэниие хэлэдэгта, нюур харадаггүйт, Бурханай бодото замаар ябахые һургадагта гэжэ бидэ мэдэнэбди. 22Бидэ Римэй хаанда алба татабари түлэхэ ёһотой гүбди, али үгы гү? – гэжэ асуубад.

23Иисүүс тэдэнэй муу мэхые мэдээд:

24– Намда динари мүнгэ харуулагты, тэрээн дээрэ хэнэй дүрэ зураатай, хэнэй нэрэ бэшээтэй байнаб? – гэжэ һураба.

– Римэй хаанай, – гэжэ тэдэнь харюусаба.

25– Тиигээ һаа, хаанай юумые хаандань, Бурханай юумые Бурханда үгэгты, – гэжэ Иисүүс хэлэбэ. 26Арад зоной урда буруу юумэ хэлүүлэн барижа ядан, тэдэ тагнуулшад аниргүй болобо, үшөө асуудалдань тиимэ сэсэн, хурса харюу үгэхэдэнь, ехээр гайхалдаба.

Үхөөд, амидырха тухай асуудал

27Хүнүүд үхөөд амидырдаггүй гэжэ тоолодог саддукейнэрэй зариманиинь Иисүүстэ ерэжэ, иигэжэ хэлэбэ:

28– Багша аа, үхибүүгүй ахынгаа наһанһаа нүгшэхэдэ, тэрэнэй дүүнь бэлбэһэн эхэнэртэйнь һууха ёһотой, тиигээд тэдэнһээ гараһан үхибүүн нүгшэһэн ахынь үхибүүн гэжэ тоологдохо зэргэтэй гэжэ Моисей манда бэшэһэн байдаг. 29Зай, долоон аха дүүнэр байгаа гэе. Тэдэнэй ахань һамга абаад, үхибүүтэй болонгүй үхэшэбэ ха. 30Хоёрдохинь ахынгаа һамгатай һуугаад, үхибүүтэй болонгүй морилбо. 31Гурбадахи дүүнь, мүн бэшэ дүүнэрынь һубарин тэрэ һамгыень абаад, баһа үхибүүтэй болонгүй, үхэшэбэд. 32Һүүлэй һүүлдэ тэдэнэй һамганииньшье наһа бараа. 33Теэд Бурханай үхэһэн хүнүүдые амидыруулхада, тэрэ эхэнэр долоон аха дүүнэртэй һууһан хадаа, хэнэйнь һамган болохоб?

34Иисүүс тэдээндэ хэлэбэ:

– Энэ оршон үеын зон һамга абана, хадамда гарана. 35Харин Бурханай амидыруулгада хүртэхэ заяатайшуул һамгашье абахагүй, хадамдашье гарахагүй. 36Тэдэнэр Бурханай Эльгээмэлнүүдтэл адли болоод, хэзээшье үхэхэгүй мүнхэ байха, юундэб гэбэл, тэдэнэр үхөөд амидырха бшуу. 37Тиин Моисейшье шатажа байһан һөөг модон тухай туужа соогоо үхэһэн хүнүүдэй амидырха тухай батална. Ушарынь юуб гэбэл, Моисей Эзэниие Абраһаамай Бурхан, Исаагай Бурхан, мүн Яковай Бурхан гэжэ нэрлэнэ ха юм. 38Бурхан болбол үхэһэн хүнүүдэй бэшэ, харин амиды хүнүүдэй Бурхан мүн. Тэрээндэ бүгэдөөрөө амиды юм.

39Иисүүсэй иигэжэ хэлэхэдэ, Хуули заадаг зарим багшанар:

– Багша аа, Та ехэ һайнаар хэлэжэ үгэбэт! – гэлдэбэ. 40Тиин саашань юумэ һурахаяа хэншье зүрхэлбэгүй.

Бурханай табисуурта тухай асуудал

41Иисүүс тэдэндэ хэлэбэ:

– Бурханай табисууртые Давид хаанай үри һадаһан гэжэ юундэ хэлсэдэг гээшэб? 42-43Давид хаан өөрөө Магтаал дуунуудайнгаа ном соо:

«Бузар дайсадыеш

хүл дорош дэбһүүлэн табитарни,

баруун таладам һуугаарай гэжэ

Эзэн минии Эзэндэ хэлээ» – гэжэ бэшэнэ.

44Зай, Давид хаан Бурханай табисууртые Эзэмни гэжэ нэрлэбэл, юундэ Тэрэ Давидай үри болохоб? – гэжэ Иисүүс асууба.

Иисүүс Хуули заадаг багшанарһаа һэргылнэ

45Бүхы зоной шагнажа байхадань, Иисүүс шабинартаа захиба:

46– Хуули заадаг багшанарһаа бэеэ һэргылжэ ябаарайгты! Тэдэнэр ута суба үмдөөд ябаха, олон зоной дунда мэндэшэлүүлхэ дуратай, мүргэлэй гэртэ урдуур һууха, түрэ найрташье эгээн хүндэтэй һуури эзэлхэ дуратай байдаг. 47Тэдэнэр бэлбэһэн эхэнэрнүүдэй зөөри һэшхэлгүйгөөр үбэртэлдэг, олоной нюдэн дээрэ удаан мүргөөшэ болодог. Тиимэрхүү зон хатуу хэһээлтэдэ хүртэхэ даа.

Actualmente seleccionado:

Лука 20: BurBBL2024

Destacar

Copiar