Хэрэгүүд 2

Арюун Һүлдын буулга

1Тэдэнэр булта нэгэ газарта Табидахи үдэрэй һайндэртэ сугларба. 2Гэнтэ шанга һалхинай бууһандал мэтэ ехэ шууяан тэнгэриһээ дуулдаад, элшэнэрэй байһан гэрые дүүргэбэ. 3Галай дүлэн мэтэ юумэнэй соробхилхые булта харабад. Тэдэ дүлэнүүд хубааралдан, хүн бүхэнэй дээрэ тогтошобо. 4Тиихэдэнь булта Арюун Һүлдөөр дүүрэн, Һүлдын хүсөөр элдэб хэлэнүүд дээрэ дуугаралдаба.

5Тэрэ үедэ Иерусалимда дэлхэйн элдэб оронуудһаа Бурханда шүтэдэг еврейнүүд ерээд байгаа. 6Тэдэ булта шууяа дуулаад, олоороо сугларжа, нютагайнгаа хэлэн дээрэ элшэнэрэй дуугархые дуулахадаа, сошолдобод.

7– Энэ дуугаржа байһан хүнүүд булта Галилейнхид бэшэ аал? – гэжэ тэдэ гайхалдан бэе бэеһээ һурабад. – 8Тиихэдээ манай түрэл нютагай аялга дээрэ дуугархыень бидэ яагаад дууланабибди? Бидэнэй дунда 9Парфиин, Мидиин, Элаамай, Месопотамиин, Иудейн, Каппадокиин, Понтын, Асиин, 10Фригиин, Памфилиин, Египедэй болон Хэрээн хотын хажуудахи Ливиин оршон тойронхи нютагуудһаа, Римһээ уг гарбалтай 11еврейнүүд болон бусад арадай дундаһаа еврейнүүдэй шажанда оруулагдаһан зон, криидүүд болон араабууд бии. Тиигээд Бурханай агууехэ хэрэгүүд тухай нютагаймнай хэлэнүүд дээрэ тэдэ хүнүүдэй дуугархые дууланабди!

12Гайхалаа баран:

– Энэ юун болоноб? – гэжэ ором дүрэмыень оложо ядаһан тэдэнэр бэе бэеһээ һуража байбад.

13Харин нүгөөдүүлынь тэдэниие наада барин:

– Ай, эдэ һогтоо байна! – гэлдэбэ.

14Тиигээд Пётр нүгөө арбан нэгэн элшэнэртэйгээ хамта бодожо, сугларааша зондо хандан, шангаар айладхаба:

– Иудейнүүд, аа! Иерусалимынхид, аа! Хэлэһыемни шагнагты даа. 15Эдэ хүнүүдые һогтуу гэжэ дэмы һананат. Мүнөө үглөөнэй юһэн лэ саг боложо байна. 16Эндэ боложо байһан бүхы юумэн тухай Ёһээл лүндэншэн уридшалан иигэжэ айладаа һэн:

17«Иимэл юумэн һүүлшын үдэрнүүдтэ болохо

гэжэ Бурхан хэлэнэ:

Би Өөрын Һүлдөөрөө хүн бүхэниие нэбтэрүүлхэб,

таанадай хүбүүд басагад зүн бэлигээр мэдэдэг болохо,

залуушуултнай үзэгдэл үзэжэ захалха,

үбгэд хүгшэдтнай зүүдэ зүүдэлхэ.

18Тэдэ үдэрнүүдтэ Би богоол шэбэгшые

Һүлдөөрөө нэбтэрүүлхэб,

тиин тэдэ зүн бэлигээр мэдэдэг болохо.

19Дээдэхи огторгойдо юрэ бусын үзэгдэлнүүдые,

доодохи газар түбидэ гайхамшагта тэмдэгүүдые:

шуһа, гал дүлэ, бөөн хара утаа үзүүлхэб.

20Эзэнэй агууехэ алдарта үдэрэй

ерэхын урда тээ

наран балартаха,

һара шуһан улаан болохо.

21Эзэнэй нэрэ дуудаһан

хүн бүхэн абарагдаха».

22Израилиин зон, намайе шагнагты! Бурхан Назаредэй Иисүүсээр агууехэ хэрэгүүдые, гайхамшагта үзэгдэлнүүдые ба тэмдэгүүдые бүтээлгэн, Тэрэниие эльгээһэн тухайгаа таанадта гэршэлээ. Эдэ бүхэн танай дунда ушараа. Тиимэһээ таанад өөһэдөө энээн тухай мэдэнэт. 23Бурханай үни баталһан түсэбэй ёһоор танай гарта үгтэһэн Иисүүсые хуули эбдэгшэдэй гараар хэрээһэндэ хадажа алаат. 24Гэбэшье Бурхан Тэрэниие үхэлэй зоболонһоо аршалан амидыруулаа, үхэл Тэрэниие һабартаа барижа шадахагүй байгаа бшуу. 25Давид Тэрээн тухай иигэжэ хэлэнэ:

«Би Эзэниие үргэлжэ урдаа харанаб:

хажуудам байгаа сагта

ганхан унахагүйб.

26-27Тиимэһээ зүрхэ сэдьхэлни баяраар халяа,

хэлэ амамни дорюун болоо,

бэемни хүсэл найдалаар дүүрээ,

юундэб гэхэдэ, Та һүнэһэ һүлдыемни

үхэлэй орондо орхихогүйт,

Өөрынгөө шударгы Зарасые

шалзараажа үмхирүүлхэгүйт.

28Амидаралай зам намда заажа үгөөт,

Өөрынгөө хажууда байлгажа,

Та баяраар намайгаа дүүргэхэт».

29Аха дүүнэрни! Таанадта сэхэ хэлэһүүб: манай үбгэ эсэгэ Давид наһа бараад хүдөөлүүлээ, тэрэниие хадаглаһан агы нүхэн мүнөө болотор хэбээрээ байдаг. 30Давидай хаан шэрээдэ үри һадаһыень һуулгахаб гэжэ Бурханай үгэһэн тангаригые Давид лүндэншэ байһан дээрэһээ мэдэжэ байгаа. 31Тиимэһээ Бурханай юу хэхые мэдэжэ байгаад, Бурханай табисууртын амидырха тухай тэрэ иигэжэ хэлээ:

Бурхан һүнэһэ һүлдыень

үхэлэй орондо орхёогүй,

Тэрэнэй бэе агы нүхэндэ

шалзаржа үмхирөөгүй.

32Бурхан Иисүүсые амидыруулаа, тиин бидэ булта энэ ушарай гэршэнэр болонобди. 33Иисүүс Эсэгынгээ баруун талада дэгдүүлэн, найдуулһан Арюун Һүлдэдэнь хүртэбэ, тиигээд Тэрэ Һүлдөөрөө бидэниие нэбтэрүүлээ. Мүнөө таанад энээниие харанат, дууланат. 34-35Давид тэнгэри өөдэ дэгдээгүйшье һаа, иигэжэ дуулгаа:

«Бузар дайсадыеш хүл дорош

дэбһүүлэн табитарни

баруун гар таладам һуугаарай гэжэ

Эзэн минии Эзэндэ хэлээ».

36Тиимэ ушарһаа таанадай саазалһан Иисүүсые Бурхан Өөрөө Эзэн болон Бурханай табисуурта болгожо табяа. Израилиин бүхы зон, энээниие хадуужа абагты.

37Иимэ юумэ дуулаһан хүнүүд зүрхэеэ доһолгон:

– Аха дүүнэр аа, бидэ яаха болообибди? – гэжэ Пётрһоо, мүн бусадшье элшэнэрһээ һураба.

38– Нүгэл хэхэеэ болигты. Нүгэлыетнай Бурханай хүлисэхын тула хүн бүхэн Иисүүс Христоосой нэрэ алдараар уһаар арюудхуулаг. Тиихэдээ таанад Бурханай үршөөһэн Арюун Һүлдэдэ хүртэхэт. 39Танда, танай хүүгэдтэ болон Эзэнэй, манай Бурханай Өөртөө уряалһан, холууршье байһан хүн бүхэндэ Бурхан найдуулга үгөө, – гэжэ Пётр тэдээндэ харюусаба.

40Мүн ондоошье олон үгэнүүдээр Пётр тэдэниие һэргылэн идхаба:

– Энэ забхай ябадалтан дээрэ бууха Бурханай хэһээлтэһээ яажа бэеэ абархаяа бодогты.

41Пётрой үгэдэ этигэһэн хүнүүд уһан арюудхалгада хүртэжэ, гурбан мянга тухай хүнөөр һүзэглэгшэдэй тоо нэмэгдэбэ. 42Тэдэ зон элшэнэрэй һургаал шагнадаг, бэе бэетэйгээ һайнаар харилсадаг, хамта хоол баридаг, зальбардаг бэлэй.

Һүзэглэгшэдэй амидарал

43Элшэнэр олон гайхамшагта хэрэгүүдые болон дүлгэ тэмдэгүүдые харуулжа байгаа. Тиимэһээ хүн бүхэн ехэтэ һүрдэн бэшэрбэ. 44Һүзэглэгшэд байһан юумээрээ хоорондоо хубаалдадаг, бэе бэедээ һайнаар хандадаг һэн. 45Тэдэнэр зөөри зөөшэеэ худалдажа, хүн бүхэндэ хэрэглэхэ зэргээрнь юумэ хубаажа үгэдэг болоо. 46Тэдэнэр үдэр бүри һанал нэгэдэн Һүмэдэ сугларжа, гэр бүхэндэ хамта хоол баридаг, баяр баясхалангаар дүүрэн, сэдьхэл тэнюун хоолоо барижа, 47Бурханаа алдаршуулан, бүхы зондо һайшаагдажа байгаа. Тиихэдэ Эзэн абарагдаһан зоной тоо үдэрһөө үдэртэ олошоруулба.

Actualmente seleccionado:

Хэрэгүүд 2: BurBBL2024

Destacar

Copiar