መተ 8
8
ዮ ሃ ዎ
1ሽን ፆሳይ ኖሄ፥ እያራ ማርካብያ ግዶን ደእያ ዶአ ኡባነ መሄ ኡባ ቆፕድ ሳአ ቦላ ጫርኮ ጫርክስን ሄ ሃይ ዎ ዎ ብስ። 2ቃስ ቢታ ግዶን ደእያ ጪሙዋ ፑልቶይነ ሳሎን ደእያ ሃ ማስኮተት ጎርደትዶሶና፤ እራይካ ሳሎን ተቀትስ። 3ያንን፥ ሃይ ፄታነ እሻታሙ ጋላስ ጋካናዉ ዎ ዎ ብስ። 4ሃይ ዎን ላፑን አጌናን፥ ታማነ ላፑን ጋላሳን ማርካበይ አራራተ ዙማታ ቦላ ኡትስ። 5ሃይ ታማን አጌና ጋካናዉ ዎ ዎ ብስ። ታማን አጌናስ ኮይሮ ጋላስ ዙማታ ፄራት በንትዶሶና።
6ኦይታሙ ጋላሳፐ ጉየ፥ ኖሄይ ባ ኬፅዳ ማርካብያ ማስኮትያ 7ዶይድ እስ ቁሮ ካረ የድን ቁሮይ ሃይ ቢታ ቦላፈ መላና ጋካናስ፥ ያነ ሃነ ፕራሸ ጋምእስ። 8ቃስ ኖሄይ ሃይ ቢታ ቦላፈ ዎ ዉርዳኮ በአናዉ እስ ሆለ ካረ የድስ። 9ሽን ሄ ሆልያ ሃይ ቢታ ኡባ ቦላ ሀእካ ደእያ ግሾ፥ ሸምፕያ በሲ ደማቡኩ። ሄሳ ግሾ ስማዳ፥ ማርካብያኮ ይን፥ ኖሄይ ባ ኩሽያ የድድ፥ ባኮ ማርካብያ ግዶ ኤክስ።
10ሄሳፈ ጉየ፥ ላፑን ጋላስ ጋምእድ፥ ሆልዉ ዛሪድ የድስ። 11ሄ ሆልያ ሳእ ኦማርስያ ዎደ እያኮ ስማዳ ያሸ ሻማሆ አጫፐ ዱዳ እርፃ ሀይ ባ ዶናን ሳፃ ኤካዳ ያሱ። ያትን፥ ሃይ ቢታ ቦላፈ ዎዳይሳ ኖሄይ ኤርስ። 12ቃስ ኖሄይ ሀራ ላፑን ጋላስ ጋምእድ፥ ሄ ሆልዉ ዛሪድ የድስ። ሽን ሄ ሆልያ እያኮ ስማዳ ያቡኩ።
13ኖሄይ ኡሱፑን ፄታነ እስ ላይ ደእን፥ ኮይሮ አጌናን ኮይሮ ጋላስ፥ ሃይ ቢታ ቦላፈ ፅዝእስ። ኖሄይ ማርካብያ ካማ ቃር ፄልድ፥ ቢታይ ፅዝእዳይሳ በእስ። 14ናምአን አጌናን ላታማነ ላፑን ጋላሳን፥ ቢታይ ኩመ መልስ።
15ፆሳይ ሄ ዎደ ኖሄ ሀይሳዳ ያግድ ኪትስ፤ 16“ኔኒ፥ ነ ማችዉ፥ ነ አደ ናይታነ ነ ናይታ ማቸታ ኤካዳ ማርካብያ ግዶፈ ከያ። 17ኤንቲ የለትድ፥ ዳራና መላ ደኦይ ደእያ መተ ኡባፈ ኔራ ደኤይሳታ ካፎታ፥ መሄታ፥ ዶአታነ ቢታራ ጎሸትያ ኡባ ኔራ ከሳ” ያግስ። 18ያትን ኖሄይ ባ አደ ናይታራ፥ ባ ማቸራነ ባ ናይታ ማቸታራ ማርካብያ ግዶፈ ከይስ። 19ያንን፥ መሄይነ ዶአይ፥ ሳአራ ጎሸትያ መተይ፥ ካፎይነ ሳአ ቦላ ዎፅ ቃፅያባ ኡባይ ባ ቆሙዋን ቆሙዋን ማርካብያ ግዶፈ ከይዶሶና።
20ሄሳፈ ጉየ፥ ኖሄይ ጎዳስ ያርሾ በሲ ግምብድ ቱና ግዶና መሄነ ዶአ ኡባፈ፥ ቱና ግዶና ካፎ ኡባፈ ኤክድ፥ ጊግስዳ በሳን ያርሾ ኦድ ፁግስ። 21ያትን፥ ጎዳይ ሄ ያርሹዋ ፔኑዋ ስንግድ፥ ባ ዎዛናን ሀይሳዳ ያግስ፤ “ናአተፈ ዶምድ አስ ዎዛናን ቆፕያባ ኡባይ ኢታ ግድኮካ ታኒ አሳ ቆሆ ግሾ ጋዳ ናምአን ሀ ሳኣ ባድከ። ቃስ ታኒ ሀእ ኦዳይሳዳ ደኦይ ደእያ መተ ኡባ ናምአን ይስከ። 22ሀ ቢታይ ደእዳ ዎደ ኡባን፥ ዘርያ ዎደይነ ጫክያ ዎደይ፥ ሜጎይነ ሆምበይ፥ ቦነይነ ባልጎይ፥ ጋላስነ ቃም ኡባ ዎደ ዳና” ያግስ።
Actualmente seleccionado:
መተ 8: GFBEVF
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
The Word for the World International and The Word for the World Ethiopia
