मर्कुस 10
10
येसुइ माचा-पाचाको भर्पायको बारेहाङ स्यान्सास्यावो
(मति १९:१-१२; लुका १६:१८)
1ओहाङसयको येसु कफर्नहुम सहरसय दोमइ वाह्ति यहुदिया छेत्रको ल्याम स्याउधय यर्दन खोलाको पारिताङ आल्सास्यावा। अनि ओहाङमा नाःतो मान्तालमको हुल येसुको वरिपरि हुमाकाय, र सादाको लेखाले येसुइ ओउमयकाय स्यानराय बइसा सुरु जाह्ङ्सास्यावा।
2केहि फरिसिलम येसुकहाङ वाङाकाय र येसुकाय आङ्काउसा बोःङ्ति एत दाह्याकाय, “निकाय तोताङि, दोह निको यहुदि नेम-कानुन अनुसार गोय्चो मान्ताइ लयको माचाकाय बिह्याको भर्पाय बइसा उचित स्याउना या स्याउल या?”
3येसुइ ओउमयकाय जवाफ बइधय ह्वत्सास्यावा, “मोसाइ बिह्याको भर्पायको बारेहाङ दोह आग्या जाह्ङो मुना?”
4ओउमय त्याङाकाय, “गोय्चो मान्ताइखे भर्पाय-कागत लेखति बयाक्तिको लयको माचाकाय फेति ल्होक्सा खाइनउ त दाह्य्ति मोसाइ आग्या जाह्ङो मुना।”#बेब २४:१
5तर येसुइ ओउमयकाय तोसास्यावा, “निङको चाको मनको कारनइ जाह्ङ्धार्ना मोसाइ निङकाय ओउ आग्या लेखति बयो खेना। 6तर स्रिस्तिको सुरुहाङखे परमेस्वरइ गोय्चो र मोम्चोले जाह्ङ्सास्यावो खेना।#उत १:२७; ५:२ 7ओउतझ्यान्ते धर्मसास्त्रइ एतदाह्य्ति तोओ मुना, ‘गोय्चो मान्ताइ लयको आपा-आमाकाय फेनउ, र लयको माचाकुस ब्रक्त याक्लेना, 8र ओउनिस निसज्यो खेमात यातज्यो लेखाले स्याउनाच।’#उत २:२४ ओउतझ्यान्ते द्याह ओउनिस निसज्यो खेचल, तर यातज्यो लेखाले स्याउनाच, 9र ओउतहाइति परमेस्वरइ माचा-पाचाको रुपहाङ मिलाप जाह्ङ्सास्यावो सम्बन्धकाय सु मान्तालमइमा फेकाइतो जाह्ङ्जेलाम।”
10जब येसु लयको चेलालमकुस मात्र किमहाङ खेसास्याउतो, अनि चेलालमइ ओउ कुराको बारेहाङ फेरिले येसुकाय ह्वताकानि। 11येसुइ ओउमयकाय तोसास्यावा, “गाउखे गोय्चोइ लयको माचाकाय भर्पाय बयाक्तिको कुनय अर्को मोम्चोकुस बिह्या जाह्ङ्नउ, ओउइखे लयको ङ्हाको माचाको बिरोतहाङ बेभिचारको पाप जाह्ङ्लेनउ। 12ओउतले गाउखे मोम्चोइ लयको पाचाकाय भर्पाय बयाक्तिको कुनय अर्को गोय्चोकुस बिह्या जाह्ङ्नउ, ओउइमा ओउ बेभिचारको पाप जाह्ङ्लेनउ।”
येसुइ मयो बालाखलमकाय आसिक बइसास्यावो
(मति १९:१३-१५; लुका १८:१५-१७)
13यात दिन केहि मान्तालमइ लयको मयो बालाख चोः चोःद्याङलमकाय येसुइ लयको क्रुत झाम्ति आसिक बइसास्याउपाना त दाह्य्ति येसुकहाङ वानाकानि। ओउ च्यउति येसुको चेलालमइ ओउ मान्तालमकाय थताकानि। 14तर चेलालमइ ओउत जाह्ङो च्यउति येसु रिस वाङ्सास्यावा र चेलालमकाय थत्ति तोसास्यावा, “बालाखलमकाय ङाकहाङ वाङ्सा बइनु र ओउमयकाय रोकलाम, धइतिदाह्य्सा परमेस्वरको राज्यखे इ बालाखलम लेखाताह्ङो मान्तालमको लागिले खेना। 15दोङ्सिले ङाइ निङकाय तोनेनाङ्स, मयो बालाखइ लेखा सुखेइ परमेस्वरकाय लयको रुवाङहाङ राज्य जाह्ङ्सा अनुमति बइनिलि, ओउमयखे गलमा परमेस्वरको राज्यभित्र पोक्सा दोःलेइलि।” 16ओहाङसयको येसुइ ओउ बालाखलमकाय लयको खोसहाङ गम्सास्यावा, अनि ओउमयको तालाङहाङ क्रुत झाम्ति आसिक बइसास्यावा।
धनि मान्ता र परमेस्वरको राज्य
(मति १९:१६-३०; लुका १८:१८-३०)
17येसु यरुसलेमको यात्राहाङ ग्ल्युह्ङ्तोक बेलाहाङ यातचाक मान्ता तन्ति वाङा, र येसुको ङ्हा खुःङाक्तिको येसुकाय ह्वताथय, “अ पेओ गुरु, अजम्बरि रुवाङ दोःसाको लागि ङाइ दोह जाह्ङ्सा परनाङ?”
18येसुइ ओउकाय तोसास्यावा, “नाङइ ङाकाय धइति पेओ त तोतेनाचि? परमेस्वरबाहेक सुमा पेओ नाःलेल। 19परमेस्वरइ मोसा दुवारा बइसास्यावो आग्यालमपाय नाङइ चिःतेनउ— ‘मान्ताकाय सात्लाम, बेभिचार जाह्ङ्लाम, कुःओ काम जाह्ङ्लाम, लयइ च्यवो अथबा सायो कुराको स्याताहा गभाइ बइलाम, सुकुसमा माःओ काम जाह्ङ्लाम अनि लयको आपा-आमाकाय मान जाह्ङु।’”#प्रस २०:१२-१६; बेब ५:१६-२०
20ओउ मान्ताइ जवाफ बयाकान, “अ गुरु, इ जुदा आग्यालमपाय ङाइ मयो बालाख उमेरहाङसयले पालन जाह्ङ्धय वाङो मुनाङ।”
21येसुइ ओउकाय राप्ति योसास्यावा अनि तोसास्यावा, “नाङइ जाह्ङ्सा परओ यातज्यो कुरा अझले मुना। पाह्य र नाङकुस मुओ जुदा धन-सम्पतिलम विःनाक्तिको दोहमा नाःमालो गरिबलमकाय थेपो वेःति बयु, अनि नाङइ लाङकाहाङ धन-सम्पति दोःतेना। ओहाङसयको नाङ ङाको लोन्हे गुह्ल्ति वाङ।” 22तर जब ओउ मान्ताइ इ कुरा सायाकान, ओउ आन निरास स्याउति पाह्या, धइतिदाह्य्सा ओउ धनि खेतो र लयको धन-सम्पति अरुकाय बइसा चाहआक्ल।
23अनि येसुइ वरिपरि योआक्तिको लयको चेलालमकाय तोसास्यावा, “धनि मान्तालमकाय परमेस्वरको राज्यको मान्ता स्याउसा गच्युक दुक्तो स्याउना!” 24ओउ कुरा साइति येसुको चेलालम जोक्तो ग्याह्ङाकाय, तर येसुइ ओउमयकाय फेरि तोसास्यावा, “ङाको राप्तो बालाख चोःलम, परमेस्वरको राज्यको मान्ता स्याउसा माहा दुक्तो स्याउना! 25दोङ्सिले धनि मान्ताकाय परमेस्वरको राज्यको मान्ता स्याउसा भन्दापाय बरु उतकाय ग्यापको घाङहाङ पोक्सा सजिलो स्याउलेना।”
26येसुको चेलालम झन् माहा जोक्तोले ग्याह्ङाकाय अनि लयमय तोकायाकाय, “ओउतखेया सुइखे मुक्ति दोःसा खाइना त?”
27येसुइ ओउमयकाय योआक्तिको तोसास्यावा, “मान्तालमको लागि असम्भब स्याउयाकायमा परमेस्वरको लागिखे सम्भब स्याउलेना, धइतिदाह्य्सा परमेस्वरइ जुदा कुरा जाह्ङ्सा खाइसास्याउना।”
28अनि पत्रुसइ येसुकाय तोआथय, “योसास्याउपाना, नाङको चेला स्याउसाको लागि निइ जुदा थोक फेति नाङको लोन्हे गुह्ल्ति वाहालाङ्सु।”
29येसुइ चेलालमकाय तोसास्यावा, “दोङ्सिले ङाइ निङकाय तोनेनाङ्स, ङाको लागि र परमेस्वरको पेओ खबरको लागि लयको किम, हउचोङ-पुःचोङलम, नाःचोङलम, आपा-आमा, चोः चोःद्याङलम, र धन-सम्पति फेओलमकाय, 30परमेस्वरइ इ ल्हाउदयबाङहाङ देङे मुतोकहाङले नाःतो थोकलम बइसास्याउना। ओउमयइ नाःतो किमलम, हउचोङ-पुःचोङलम, नाःचोङलम, आमालम, चोः चोःद्याङलम, र धन-सम्पतिमा यात सय गुना नाःतोले द्याःन्ति दोःलेनय, र सतावतलममा सहसा परलेनय। अनि वाङ्साखेओ समयहाङ लाङकाहाङखे अजम्बरि रुवाङमा दोःलेनय। 31तर देङे ताह्ङो महत्वको नाःतो मान्तालमखे लोन्हे महत्व नाःमातो स्याउलेनय, र देङे महत्व नाःमालो मान्तालमखे लोन्हे ताह्ङो महत्वको स्याउलेनय।#१०:३१ कुनय-कुनय सङ्सकरनलमहाङखे, “तर नाःतो मान्तालम देङे ङ्हा स्यावोलमखे लोन्हे स्याउलेनय, र देङे लोन्हे स्यावोलमखे ङ्हा स्याउलेनय” त दाह्य्ति तोओ मुना (मति १९:३०; २०:१६; लुका १३:३०)।”
येसुइ लयको सिमयको बारेहाङ सुमम् पल्त तोसास्यावो
(मति २०:१७-१९; लुका १८:३१-३४)
32येसु र ओउको चेलालम यरुसलेम सहरताङ आल्धय खेइतो, र येसुखे लयको चेलालमसय ङ्हा ल्याम स्याःल्ति वाह्सास्यावा। येसुको चेलालम ग्याह्ङाकाय, र ओउमयको लोन्हे गुह्ल्ति वाङ्धयमुओ अरु मान्तालमखे माहा जोक्तो रयाकाय। ओहाङसयको येसुइ लयको बाह्र जना चेलालमकाय अरु मान्तालमकसय यातताङ आःलाक्तिको लयको रुवाङहाङ स्याउलाङ वाङ्साखेओ दुखको बारेहाङ एतदाह्य्ति तोसास्यावा, 33“साइनु, नि यरुसलेमताङ आल्धय मुनातहि। ओहाङ ङा मान्ताको चोःकाय कुनय यातचाकइ धोका बइति मुख्य पुजारिलम र धर्मगुरुलमको जिःङहाङ सुम्पनाताङ। अनि ओउमयइ ङाकाय सात्साको लागि गाल बइनाताङ्स, र अरु जातिको मान्तालमको क्रुतहाङ सुम्पनाताङ्स। 34ओउमयइ ङाकाय हेला जाह्ङ्ति निःनाताङ्स, घान्नाताङ्स र सात्नाताङ्स, तर सुम दिनहाङखे ङा फेरि सिओसय उह्ति च्योक्लेनाङ।”
याकुब र युहन्नाको बिन्ति
(मति २०:२०-२८)
35ओहाङसयको जब्दियाको चोःनिस याकुब र युहन्ना येसुकहाङ वाङाक्तिको येसुकाय एतदाह्य्ति तोआकाचु, “अ गुरु, निचिइ नाङकुस दोह तेनाङ्च, ओउ कुरा नाङइ निचिको लागि जाह्ङ्ति बइसास्याउपाना त दाह्यो निचिको इच्छ्या मुना।”
36येसुइ ह्वत्सास्यावा, “निङ्जिको लागि ङाइ दोह जाह्ङ्ति बयो ते निङ्जि चाहतेनाज?”
37अनि ओउनिस दाह्याकाच, “नाङ लयको महिमित राजगद्दिहाङ च्युःङ्सास्याउतोकहाङ, निचि मध्येको यातचाककाय नाङको ङोइसय र अर्कोकायखे नाङको वेःसय च्युःङ्सा बइसास्याउपाना त दाह्यो निचि चाहनाङ्च।”
38तर येसुइ ओउनिसकाय तोसास्यावा, “दोह कुरा तेधय मुतेनाज त दाह्योले निङ्जिइ चिःओ नाःतेजल। ङाइ दोःसा लागओ लेखाताह्ङो दुख, दोह निङ्जिइ सहसा खाइतेनाजु र? अथबा ङा गतहाइति सिनाङ, ओउतले दोह निङ्जिइमा सिसा खाइतेनाजु र?”#१०:३८ इकाय ग्रिक भासाहाङ, “ङाइ तुङ्सा परओ कचउरा दोह निङ्जिइ तुङ्सा खाइतेनाजु र, अथबा ङाइ लेःसा परओ बप्तिस्मा दोह निङ्जिइ लेःसा खाइतेनाजु र?” त दाह्य्ति तोओ मुना। येसुइ ओउ “कचउरा” र “बप्तिस्मा” त तोओ सब्दखे “दुख” र “सिमय” को बारेहाङ तोओ खेना।
39ओउनिस त्याङाकाच, “निचिइ ओउत जाह्ङ्सा खाइनाङ्चु।”
अनि येसुइ ओउनिसकाय तोसास्यावा, “ङाइ सहसा लागओ दुख निङ्जिइमा सहतेनाजु, अनि ङा गतहाइति सिनाङ निङ्जिमा ओउतले सितेनाज। 40तर ङाको ङोइसय र वेःसय सु च्युःङ्नय त दाह्य्ति तोसाकाय ङाकुसि अधिकार नाःल, धइतिदाह्य्सा ओउ सम्मानित थाउहाङ सु च्युःङ्नय त दाह्य्ति परमेस्वर लयइले निर्नय जाह्ङ्सास्यावो मुना।”
41जब अरु दस जना चेलालमइ इ कुरा सायाकानि, ओउमय याकुब र युहन्नाकुस रिस वाङाकाय। 42ओउतझ्यान्ते येसुइ ओउमय जुदाकायले लयकहाङ गोत्ति एतदाह्य्ति तोसास्यावा, “निङइ चिःओले मुतेनय, इ ल्हाउदयबाङको सासकलमइ लयको मान्तालमकायले लयको इच्छ्या अनुसारको सासन जाह्ङ्नानि, र हाकिमिलमइखे लयको अधिनहाङ मुओ मान्तालमकायले अधिकार जाह्ङ्नानि। 43तर निङको माझहाङखे ओउत जुगाङमा स्याउजेलाम। यदि निङमध्ये कुनयइ अगुवा स्याउसा चाहना त खेया, ओउखे अरु जुदाकोले सेवक स्याउसा परलेना। 44अनि यदि निङमध्ये कुनयइ साःरो मान्ता स्याउसा इच्छ्या जाह्ङ्नउ त खेया, ओउखे जुदासय मयो स्याउति जुदाको सेवा जाह्ङ्सा परलेना। 45धइतिदाह्य्सा ङा मान्ताको चोःमा सेवा दोःसाको लागि खेल, तर सेवा जाह्ङ्साको लागि र नाःतो मान्तालमइ छुत्कारा दोःपनय त दाह्य्ति लयको रुवाङ बइसाको लागि वाङो खेनाङ।”
येसुइ यातचाक मिक च्यउमालो बार्तिमयकाय च्यउताक्सास्यावो
(मति २०:२९-३४; लुका १८:३५-४३)
46ओहाङसयको येसु र ओउको चेलालम यरिहो सहरहाङ दाह्तिवाङाकाय। अनि येसु लयको चेलालमकुस यरिहो सहर फेति आल्धयमुतोकहाङ मान्तालमको हुलमा येसुको लोन्हे आल्धय खेइतो। यातचाक मिक च्यउमालो बार्तिमय त मय्ङ्ओ तिमयको चोः ल्यामहाङ च्युःङ्ति थेपो तेधयमुओ खेतो। 47नासरतको येसुताङ वाङ्सास्यावो मुना त दाह्यो कुरा चिःति बार्तिमय एतदाह्य्ति हिह्सा फाःङाकान, “अ येसु, नाङ राजा दाउदको सन्तान, ङाकाय योःन्सास्याउपाना।”
48नाःतो मान्तालमइ ओउकाय “ङइमात मुअ” त दाह्य्ति थत्ति तोआथय।
तर ओउखे “अ राजा दाउदको सन्तान, ङाकाय योःन्सास्याउपाना” त दाह्य्ति झन् ताह्ङ्तो हिह्सा फाःङाकान।
49जब येसुइ ओउको हाउनय साइसास्यावा, अनि न्यासाक्तिको तोसास्यावा, “ओउ मिक च्यउमालो मान्ताकाय ङाकताङ गोत्नु।”
अनि ओउमयइ ओउ मिक च्यउमालो मान्ताकाय एतदाह्य्ति गोताकानि, “साहस जाह्ङु, र चिङ्ति वाङ, धइतिदाह्य्सा येसुइ नाङकाय गोत्सास्यावो मुना।” 50ओहाङसयको ओउइ लयको क्रमनाय ताति वायाक्तिको क्र्यानोक्त चिङा, र येसुकताङ वाङा।
51येसुइ ओउकाय ह्वत्सास्यावा, “नाङको लागि ङाइ दोह जाह्ङ्ति बयो नाङ चाहतेना?”
ओउ त्याङा, “अ गुरु, ङाइ फेरि मिक च्यउसा दोःपाङ।”
52अनि येसुइ तोसास्यावा, “नाङ पाह्य, धइतिदाह्य्सा नाङको बिस्वासइले नाङकाय स्याक्ताको मुना।” ओउच्युक खेरले ओउइ मिक च्यवाकान अनि येसुको लोन्हे गुह्ल्ति वाह्सा फाःङाकान।
Actualmente seleccionado:
मर्कुस 10: CHEP
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.
