Abi Itser-Yesu 2

Ipfu Isarsatangge iba ru unum Upentiko

1Unum irhowu Upentiko iki iwe, abika adɔsa kishoo akɔng ananga unying. 2Kanying umbɔ agũ irhak iki idzeka afã ru nyaku ugba ukom, udzeka afã uba utɔkpɔ iyakɛ umbɔ aka asei. 3Mɔcɛ umbɔ anyã ubina ru nyaki ikon urha, uku ugasha ucipuwa ra atsimbɔ unying anying. 4Nu kishoo awu nggu Ipfu Isarsatangge, atsĩmbɔ irherhe idũ abikase Ipfu-Num iki idzowe umbɔ ijeea.

5Ri ivang hã ru Urusharhima abi Uyahuda abi iwei Unum aka asei umɔ adzeka ru ubɛn abĩ upfung ukpirɛ. 6Umbɔ aka agũ ubvun ugba ha, anera aka akɔng adzunumbɔ, ubinkutsu ubɛn unera agũ umbɔ arherhe idũnga. 7Umbɔ adzeidzeu akarhãrhã, na arhusa agɛ, <<Kishoo abika arherha arherha ha, asi iwembɔ aner Ugarhirhi? 8Awu use utsu ubɛn unera ru umɛn agũ umbɔ arherhe idũnga? 9Umɛn abɛ iwu abi Upartiya, nu Umadiya nu Uerhama, nu aner abĩ Umesofotamiya, nu abi Uyahudiya nu abi Ukafadokiya, nu abi Upanta nu abi Uasiya, 10nu abi Ufirijiya nu abi Upamfirhiya, aka adzeka abĩ Umasar, nu ikɛi abɔɔ aka akhapa ru abĩ Urhibiya aka akhapa ru Usayirin. Umɛn abɔɔ idzeku Uroma, 11ru umɛn hã, abɔɔ awu abi Uyahuda na abirabɛ aka adzipa adɔsa agbeyambɔ, ikɛi abɔɔ awu abi Ukarita nu abi Urharaba, kishoo iki igũ umbɔ anu irherhe abin idzeu Unum ri idũmɛn!>> 12Kishoo adzeidzeu na adzunumbɔ, agɔr adɔkambɔ agɛ, <<Agben akɛrɛ ha awu use?>>

13Bɔr abɔɔ umɔ ayɛia umbɔ agɛ, <<Ahwa adɛ afĩrhã!>>

Ubitru adzowe isarhe ra anera

14Bɔr Ubitru abere nggu umbɔ udom hã, atsarhi irhaknga arherhe arherhe nggu anera agɛ, <<Umbi abimɛn abi Uyahudiya nu kishoo abi Urusharhima, umum idɛyiwa umbi arherhe akɛ, àka akpeto ru ubinkpi umum iki irherhe. 15Anera abɛrɛ asi ifĩrhũmbɔ adɛ ru nyaka umbi aka akaifɛrhkɔ, nggayɛ awu akara utɔɔrha aki ukpee! 16Ĩ'ĩ, awu ubin hã nukpi uner uwuku usɔm Arherhu-Num Uyowɛrh aka arherhe agɛ,

17<< <Unum agɔr agɛ, ri inum iyiki imimasha,

umum iwuri itsuke Ipfumum ra anera kishoo.

Nu awɛkacimbi akatsɛrh na akatsak

awuri isɔm Arherhu-Num,

na awɛdzɛmmbi awuri inyãmbɔ irhi,

nu akakũmbi ikɛi awuri irheyimbɔ urhɔ.

18Ra agãrhãmum akatsɛrh nu akatsak,

umum iwuri itsuke Ipfumum ri inum hã,

nu umbɔ ikɛi awuri isɔmmbɔ Arherhu-Num.

19Umum iwuri idɛyiwe abin idzeu afafã ra afã,

na atsar anɔnɔr nu abĩ,

adzirh, nu urha, nu ikɛi azoo aka afĩrhã asok arhɛrhɛ.

20Ishaa unum iwuri idzipa iwu uzĩ,

ufɛ̃ ikɛi uwuri iwu uku uzhãĩ ru nyaka adzirh,

kata ibiba nggaa ikpikpoi unum ukpu Uteijee.

21Nu ubɛn unera aka afɛn Uteijee

awuri ikpoa ififɔrh.>#2.21 Àka anyã ikɛi: Uyow 2.28-32.

22<<Umbi abimɛn abi Uisrairha, àka akpeto ra arherhe akɛrɛ, Uyesu aka awu uner Unazarat unerwi Unum aka asɛng unga akorha abin idzeu, nu abin igbigba na atsar, akirakɛ Unum aka akorhe ru umbi ri itsinga, ru nyaka umbi itsikammbi aka ahwɛng. 23Utsak uwurɛ adzowe unga ru umbi ri ikikorhu Unum ikɛi ri itsernga nu ihwihwɛngnga, umbi akũ akusa akwɛr anyapuwe unga nu igãrhãmau ucucii, afɛre unga ra abok abi arhim. 24Bɔr Unum asoyika unga na ashɔɔrka unga ru uver akpe, ubinkutsu akpe asi idɛ̃ɛ̃ akpɔmke unga. 25Udauda arherhunga arherhe ri itsinga agɛ,

<< <Ubɛn ivang umum inyã Uteijee awu nggu umum.

Ubinkutsu unga awe ru ubok ughamum,

umum isi ízusumum.

26Nggee amɛnmum agɔm anggɔm,

arhɛmmum agũibɛn akarhãrhã

iyormum ikɛi iwuri iwosha ri ifosa,

27Ubinkutsu, ungo usi ínekango umum ru udzak,

use ungo ineke Usarkasar Unerngo avɔ̃ɔ̃.

28Ungo uku utsu umum ihwɛng utsĩndĩ urhɛ,

ungo uwuri itɔka umum nggu anggɔm ra anangngo.>#2.28 Àka anyã ikɛi: Amb 16.8-11.

29<<Umbi abimɛn abi Uisrairha, umum iwemum ri ikeramɛn iki idɛyiwa umbi ugɛ utoka atokamɛn Udauda aka akpea nu umbɔ aka adzakukumbɔ unga, ikɛi udzaknga uwu nggu umɛn uba utsĩ irherɛ. 30Bɔr unga awu uner uwuku usɔm Arherhu-Num, na ahwɛnga Unum aka abemuka unga nggu uyirh agɛ, unga awuri itsu unangnga unying nu utarh isei iyɛrhanga. 31Unga aka anyã, arherha arherhe isisok Ukiristo ra akpe, agɛ asi ínekukumbɔ iyornga ru udzak, iyornga ikɛi isi ívɔ̃ngge. 32Unum aka asoyika Uyesu ha nggu urhɛ, nu umɛn kishoo iwu ideka umɔ ni idzidzɛrha ha. 33Unum adzowe unga imor nu ubok ughanga, unga aka ayɛi ibibemuwe Ipfu Isarsatangge ru Utɛ, na awupuwa ubinkpi umbi aka anyã na agũ icɛrɛ. 34Udauda asi ifũã ra afã, bɔr unga agɔr agɛ,

<< <Uteijee agɔr Uteijeemum agɛ,

<<Usei nu ubok ughamum,

35utsɛku umum iki itsu anggamtsakngo

awu ubin uku utsorhe andaidakngo.>> >#2.35 Àka anyã ikɛi: Amb 110.1.

36<<Nggee, uneke aner Uisrairha ahwɛng ugɛ, Unum aka atsu Uyesu uwuruwi, umbi aka anyapuwe nu ucucii awu Uteijee na awu Ukiristo ikɛi.>>

37Anera aka agũ rimi, amɛnmbɔ agbɛra adzɛu, na agɔr Ubitru nu abi itser Uyesu abɔɔ, agɛ, <<Umbi angwɛ̃mɛn, umɛn ikorhi uguse?>>

38Ubitru agɔr umbɔ agɛ, <<Àka adzipa ra arhimmbi umbɔ asorhuwa umbi ubɔtisima ri itsok Uyesu Ukiristo ngge atsũwe arhimmbi. Ikɛi umbi awuri iyɛimbi izũwũ Ipfu Isarsatangge. 39Ubinkutsu ibibemuwe ha iwu iyimbi nu angwɛ̃mbi nu kishoo abi anang aka ader, umbɔ abirabɛ Uteijee Unummɛn aka awuri iyisa umbɔ.>>

40Nggu irhɛm iyɔɔ irhɛirhɛ unga aka adzowe itsũwã na afituwe umbɔ agɛ, <<Àka afɔrh atsimbi ru ubinkpi uku udzɛu abi amɛn akatãrhã aki udan ukpirɛ.>> 41Abika ayɛi isarhanga hã umbɔ akorhuwe umbɔ ubɔtisima, ru unum hã umbɔ ayombɔ inera anaka agɔnga ataar (3,000) atoma ri irhɛɛmbɔ.

Iwɛrhɛ abika adɔsa

42Umbɔ atsu atsimbɔ ri ikpeto ri imesa abi itser Uyesu, nu iwɛrhɛ abika adɔsa, nu itsɔku uborodi ri ifɛn-Num. 43Unum akorha abin igbigba na abin idzeu arhɛrhɛ ru ubok abi itser Uyesu, nu ubɛn unera agũ idzeu. 44Kishoo abika adɔsa awu unying, nu abinmbɔ kishoo awu aki adɔkambɔ. 45Agoyiwe abin ukammbɔ, na agashuwe uhwɛka ra adɔkambɔ uku kpengkpeng ri itsũwãmbɔ. 46Ubɛn unum umbɔ anu ikɔng ru ufɔm Iya-Num nggu amɛn unying. Agha ubingha ananga unying ra ayambɔ, agha na ahwa nggu anggɔm nu itɛnamɛn, 47akpoi Unum na awe ru izama ra anera kishoo. Ubɛn unuma Uteijee anu itomuwe umbɔ abika afɔrh.

Actualmente seleccionado:

Abi Itser-Yesu 2: DuyaNT

Destacar

Copiar