Yitenda ya Wapostoli 22
22
Paghulusi ghana kuthimwetwedha yomapirukero ghendi
(Yitenda 9:1–19; 26:12–18)
1“Mwayendhange nomwatate, mu tegherere kuyikughamwena yange edi na kuyimutongwera.”
2Apa ha yuvire eshi Muthiheburayi ghana kughamba, ko kuporerera kwawo.
3Ko kupita kwendi kughutho gha ninge eshi: “Ame noMujuda waTarsusi, oyu ha shamurukerire muSilisiye. Ene na na kurerire muno muJerusalema. Na karire nothihongwana thaGamaliyeli, mu kuranda thiwanathiwana muragho wawakerekandongo wetu. No na karire nonurwithi Nyambi yira yamwe mwakashadyarero mwaheya. 4Na shana kutjidha hanu wahe hakakukukutha mundhira dhino. No kwatire harume nawakamadi, ho na wa pakire mutorongo. 5Eyi ne kukona kuyitanaritha mupristeri shokuru nondhango dhodhihe. Kukwawo ko na wanine mambapira ghokunidimukitha, kwaWayendha waWajuda homuDamaskusi eshi tu ka shimbe karo hanu homuya kuno kuJerusalema na ha wape mahumbithero.
6“Oku shime na karera muruyendo rokuhenya pepi naDamaskusi, ko kunisheghenyena pamutwekatji thishe thothikuru thomudiwiru. 7Ho na wire pamuve no na yuvire diywi dina kunitongwera eshi: ‘Saghulusi, Saghulusi, yinye ghuna kunikutha‐kuthera?’ 8Ame ha ni hutha eshi: ‘Yowe dye ne, Fumu?’ ‘Yame Jesusi ghoMukanasareti,’ dyo gha huthire. ‘Yoyame yu ghuna kukuthakutha.’
9“Hanu wa ha karire pofotji nange, ha monine shemwa thishe. Ene diywi dyoyu gha ghambire nange, mbadi ha di yuvire. 10Ha nipura kwange eshi: ‘Nye sho ni tende, Fumu?’ Fumu ha ningi kukwange eshi: ‘Wimane no ghu yende kuDamaskusi. Ko sho ha ka kutongwere yoyiheya yi gha rikanyitha Nyambi eshi ghu yi tende.’
11“Thishe thishaghutwe tho, tho tha ni pakire ghukunga. Namukaruyendo rwange gha ni kokire panyara. Kemo dyo na ka kumine kuDamaskusi. 12Murume ghumweya Ananiyasi, murume ghomatjimapero no gha parire popamuragho, no gha wanine dina kwaWajuda wahe. 13Gheyire kukwange. Gheyire na ghemane kukwange ghuninga eshi: ‘Saghulusi ghomuyendhange, wa kona kumona karo!’ Pakapupi popo ko kumumona kwange. 14Ha ningi kwendi eshi: ‘Nyambi wawakerekandongo wetu, yo ghana kutorora ghu dimuke yihima yendi. Ghu mone Muhunga no kuyuva diywi dyendi. 15Yoyi mbo ghuna kara ghomushupi wendi kwawanu wahe ko yi wa monine no yi wa yuvire. 16Keho ne nye yokutaterera shime? Wiye ha kuyoghe ghu kushuke kumaharwero ghoye, oku we ghu netha Dina dyendi.’
17“Ko kahukakwange kuJerusalema. No oku shime na karera mutembeli mukurapera, ko kuniwana mupepo. 18Ha ni mono Fumu oyu gha ni tongwerire eshi: ‘Tambuke, no shwaghe wangu muJerusalema. Hanu wano muno, mbadi sho ha tawe yi ghuna kuninongonona.’ 19Ha ningi kwange eshi: ‘Kemo Fumu, ha yi dimuka eshi yame na karire mukukwata mumasinagoge ghomahe hanu wa ha tawire momoye, no kwapumura. 20Apa gha notokire manyinga ghaStefanusi ghokanonga koye, name nothinda po na karire. Na yi monine thiwana no na takamithire yitere yawa ha mu paghire.’ 21Ho gha ningire Fumu kukwange eshi: ‘Tunde po pano, yoyishi na himi kukutuma kokayenda kwawahayidena.’ ”
Paghulusi namukuru wawakayita waWaromayine
22Yoyiheya yi mbadi dha hakire kumutegherera mbunga, kokuyoghomoka kwawo eshi: “Gha tunde po! Munu ghokenge yo, mbadi gha kona kukara nomoyo!”
23Mbunga ko kuyoghomoka no kukupura yivata yawo, ghuyerutha rukungu. 24Mukuru wawakayita gha raghurire eshi, ha mu tware mukamba ha ka mu mwashure, no kumwepidhura eshi nye dhina kumuyoghomokera kemo mbunga. 25Awo ku hana mana kumughanga eshi ha mu mwashure, hepura Paghulusi kwamuyendithi wawamaporitha yu ghemanine po eshi: “Ha yi mu fundhwera kumwashura mukakakoghatji kaWaromayine, oku mbadi muna mu pangura ndi?”
26Apa gha yi yuvire yi, ha yendi muyendithi wawamaporitha kwamukuru wawakayita gha ka ghambe eshi: “Nye sho ghu tende? Murume yu ne mukakakoghatji kaWaromayine.”
27Mukuru wawakayita, ko kuyenda gha kepure Paghulusi eshi: “Ni tongwere eshi ghomukakakoghatji kaWaromayine ndi?”
“Kemo,” dyo gha huthire Paghulusi.
28Ko kuninga mukuru wawakayita eshi: “Ghukakoghatji kange, na ghu ghurire me nomanyinga ghomengi mu kughuwana.”
Ha ningi Paghulusi eshi: “Ene wange, na ghu wanine pamushamurukero.”
29Hamashurundate wa ha shanine kumwashura Paghulusi, ko kumuthigha wangu‐wangu. Namukuru wawakayita gha yapire naye thinda, apa gha dimukire eshi Paghulusi ne mukakakoghatji kaWaromayine no yi gha mu ghangithire.
30Yoyishi mukuru wawakayita gha shanine kudimuka thidhimbo thaWajuda thokwaPaghulusi, ko kuraghura kwendi mudiyuwa dyokuranda ko eshi, ha kongwedhe hapristeri hohakuru nawakamuragho waWajuda wahe pofotji. Ko ka shimba kwendi Paghulusi gha mwimeke kughutho wawo.
Actualmente seleccionado:
Yitenda ya Wapostoli 22: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
