Yohannis 14

Anu arax, rumma kee aniina kiyo

1Sin afcaado amribbishe wayto. Yallah imina, yottah lel imina. 2Yi Abbah caredde mango carwa tane. Amayim anniye wayaado, cara sinah asqarrabo adiyuk aniyo sinak arhxe dhaarhe? 3Anu edeeh cara sinah isqirribemko, anu alle aniyolle atin gantah tannawna ciloh malammih emeeteh innelle sin beyo kiyo. 4Anu alle adiyuk aniyo arax lel taarhigin” akko yerhxe. 5Toomaas lel: “Maddara, atu alle aduuk tanitokke minaarhige. Nanu arax aaginah naarhige?” akko yerhxe. 6Yeesus: “Anu arax, rumma kee aniina kiyo. Yi araxah akke wayemko Abballe yamiiteti miyane. 7Yotta teerhegeh tineh tekkemko, yi Abba gantah teerhegeh tannaw kito. Kadooko sarrah kaa teerhegiinih kaa tubliinih tanin” akko yerhxe.

8Filibboos lel: “Maddara, Abba ni uybulluwaaki, amayim ni dhiica” akko yerhxe. 9Yeesus: “Filibboos, tayidhdha mangum sinlih suge hanuk, kaddih yi mitaarhige? Yotta yubleh anniinnanti Abba yubleh yane. Aaginah: ‘Abba ni uybulluu’ tarhxe? 10Anu inni Abbadde aniyom, Abba lel yottadde yanemih mitaamine? Yottadde siga Abba kinni ishi ciyyo abtam kibah, ta anu sinak arhxe waani inni amooko waanisha waani maki. 11Anu Abbadde, Abba lel yottadde yanemih yi imina. Akke wayemko amaa ciyyoh yi imina.

12Anu Abba fanah adiyuk aniyomhi sabbatah, yottah aamininnanti anu aba ciyyo abo kinam, amayimko nabam gantah abo kinam rummah, rummah sinak arhxiyuk ane. 13Abba Barhadde yanabo ciloh, yi migacalle dhaacitinnannim sinah abo kiyo. 14Yi migacalle farhinnannim yi esserteenimko sinah abo kiyo.

Yeesus Quddus kin Ufayeh wacde saa

15Yi tikxiniinimko, yi amre dhawudhdhoona kitin. 16Anu Abba dhaacimo kiyo. Usuk lel umman gedda sinlih mara aki Xattiimeena sinah yaxaw kinni. 17Amaa rummaahit Ufaye, caalam maballo, mitaarhigemhi sabbatah kabbatto mirhicta. Atin laakin sinlih sigah sinadde yakko kinamhi sabbatah, kaa taarhigin.

18Xeewo balih sin mixaba, sinalle gaxo kiyo. 19Dago waqhteh ta caalam yi tablo maki, atin laakin yi tabloona kitin. Anu aniyomhi sabbatah, atin lel tannawna kitin. 20Amaa lellecidde, anu yi Abbadde, atin yottadde, anu lel sinadde aniyom taarhagoona kitin. 21Yotta kixinti, yi amrit yaalleh dhawrhinnan tiya kinni. Yotta kixinti, Abbah gantah yamkaxxano kinni, anu lel kaa akxano kee inne kaa ayshadhdhago kiyo” akko yerhxe. 22Amaa Iskariyootko akkinnixe Yahuuda lel: “Maddara, caalamah akkekkah, notta ishe tayshadhdhago litom aymih kinni?” akko yerhxe. 23Yeesus: “Akkinnanti yi yikxinemko, yi waanitta dhawrho kinni. Yi Abba lel kaa yakxano kinni, kayyalle nemeeteh lel ninni care kaalih abinno kino. 24Yi akxininnixeti yi waani mirhawrha. Taabbin waani lel yim makiiki, tamaa yi fare yi Abbahim kinni.

25Anu sinlih aniyom fanah tayim sinlih waanisheh aniyo. 26Amaa Xattiimeeni, Quddus kin Ufayi Abba yi migacalle faro leya laakin, ummannim sin yaydaraso kee inkoh anu sinak erhxeh aniyom sin xunsuuso kinni. 27Salaam sinlih xaba, inni salaam lel sinah axaye. Ta caalam akah taxayeekah maki anu sinah axayem. Sin afcaado amribbishe wayto, mashshiite wayto. 28‘Anu adiyuk aniyo, gaxo lel kiyo’ sinak arhxuk yi toobbin. Yi takxinindo, Abba yottaako nabamhi sabbatah, Abba fanah adiyuk aniyomuh xedene dhadhdhen. 29Takke gedda taamanoona ciloh, akkekkahko kado sinah warisheh aniyo. 30Ta caalamhi reezanti amiituk yanemhi sabbatah, anu mangum sinlih waanisho makiyo. Yi bukalle inki reeza maleya. 31Anu laakin ta caalam anu Abba kixiniyom taarhago ciloh, Abba akah yi yeemereekah aba. Uguta, takkeeko nadawok hayyaanta.

Actualmente seleccionado:

Yohannis 14: SCC

Destacar

Copiar