Luk 6

Ia Jisas na Taoviana na Sabat

(Matiu 12:1-8; Mak 2:23-28)

1E chikai na dani Sabat, ia Jisas e liu dia tatana chikai na uta ni wit kolu hana duli nira. Ma na hana duli nira ara tuturiha na pichuana na vungu ni wit nira, mara hajaa tana limadira mara hanira na piuna nira. 2Me kesana na Parasii tara toha tana tahu nia ara gesu vahai de, “?Amu vahai hamu vei amu pichua na vungu ni wit nia? Na nida keja hita e luti vanihita na ago tana danina na Sabat.”

3Ma ia Jisas e tuhu visu vanira me kori vahai vanira de, “?E vahai vei? ?Amu teha vata hamu na ijua na omea nira te agosia ia Deved ma nina tinoni nira i sau, tahuna tara ngalo hahani? 4Ia Deved e sahe tana valena ia God me tahaa na bred tabutabu nia, ma ia ma nina tinoni nira ara tahaa mara hania. Na bred tabutabu nia na hadira bamu ira na tinoni ni kere. Ma ia Deved lakamu te pichua na keja de.” 5Ma ia Jisas e kori hoto lakaa, “Minau na Dalena Tinoni, na Taoviana na Sabat.”

Ia Jisas e maurisia na tinoni te mate na limana

(Matiu 12:9-14; Mak 3:1-6)

6Me chikai laka na dani Sabat, ma ia Jisas e sahe tana vale lotu ira na Jiu me sasanira ira na tinoni. Me chikai na tinoni te toha tana tahu nia e mate na limana madoa. 7Me kesana na Parasii ma na tinoni toto manasa tana nina keja ia Mosis ara chau matena tina ke vani maurisia tinoni nia tana Sabat, ma kara keli vania ia Jisas matengana te ago tana Sabat.

8Ma ia Jisas e hana nohaa na hua tara padaa tana tobadira, me kejalia na tinoni te mate limana, me kori vahai de, “Ko tuu mo ko mai levu naho.” Me tuu na tinoni lima mate nia me dia levu naho.

9Ma ia Jisas e leleo dia tatadira na tinoni nira me gesuara, “?Na hua tana nida keja hita te talasangaa na agosiana tana dani Sabat? ?Ka agosia na omea talana o ka agosia na omea sekoseko? ?Ka taha maurisi tinoni o ka luvusi tinoni?” 10Me moro talihu laba ia Jisas tatadira ira, me kori vahai vania tinoni nia de, “!Ko kanasia na limamu!” Me kanasia tinoni nia na limana, ma na limana ia e talana visu laka.

11Mara kore solehana ira na Parasii mi ira na tinoni toto manasa tana keja, mara vaikorihi na hua ngeni ba kara goni vania ia Jisas.

Ia Jisas e vilia e sangavulu ruka na tinoni ni saurongo

(Matiu 10:1-4; Mak 3:13-19)

12Me chikai na dani tana tahuna nia, ia Jisas e dato tatana e chikai na vungavunga me nonginongi vania ia God tana puti matadu nia. 13Mi tana mohomohona, ia Jisas e solosaira hana duli nira me vilia e sangavulu ruka tatadira me solora vahai na tinoni ni saurongo. 14Na asalodira vahai ia Saemon, te solo vahania ia Jisas ia Pita,

ma ia Andru na tasina ia Pita,

ma ia Jemes,

ma ia Jon,

ma ia Pilip,

ma ia Batolomiu,

15ma ia Matiu,

ma ia Tomas,

ma ia Jemes na dalena i Alpeas,

ma ia Saemon na tinonina na ala-ala tara ngavina kara huru chonia na gaumane ni Rom,

16ma ia Jiudas na dalena ia Jemes,

ma ia Jiudas Iskariot, ia ngeni ba te ke saua ia Jisas vania hana hala.

Ia Jisas e sanira me vani lakara ira na tinoni ocheoche

(Matiu 4:23-25)

17Mi tahuna ia Jisas te sivo mai kolu hana duli nira tana vungavunga nia, me sivo me tuu tana netana kolu dangana laka hana duli kolu e danga na tinoni tara vota mai visa meana kode i Jiudia, mi Jerusalem, mi tana vera ni tasi nira i Taea mi Saedon. 18Ira ara mai na valingeana ia Jisas me ke taha chonia nidira oche. Mi ira te sivolira na tarunga ara mauri visu soha. 19Ma nina susuliha ia Jisas e laba lenga, mi ira kode ara ngangavina kara chibelia ia Jisas ma kara mauri.

Na mamahela ma na rota

(Matiu 5:1-12)

20Ma ia Jisas e moro dia tatadira hana duli nira me kori vahai de,

“!Talana vanihamu tamu teha tamania siki omea,

rongona na nimiu hamu na mamauri te morosi taonia ia God!

21!Talana vanihamu tamu ngalo kabomiu tana tahu de,

rongona ngeni ba kamu masu!

!Talana vanihamu tamu sasahavi tana tahu de,

rongona ngeni ba kamu mamahela ma kamu kiakia!

22“!Talana vanihamu tahuna ira na tinoni kara hae sekolihamu, ma kara hoso tahanihamu, ma kara kori sekolihamu, ma kara solo sekolihamu tana rongona amu bukeu nau na Dalena Tinoni. 23Me tahuna te laba na omea vahai nira nia, kamu mamahela ma kamu chipu kae, rongona ia God e livu nohaa na pepeluna leho vanihamu i heven. Matengana ira na kukuadira ara agosi vani nohara nina propet nira ia God i sau.

24“Mi ngeni ba ke seko solehana vanihamu ihamu tamu tamania danga na omea tana tahu de,

rongona hamu amu chauli nohaa nimiu mamauri talana tana pari de.

25Ngeni ba ke seko solehana vanihamu ihamu tamu masu tana tahu de,

rongona ke chikai dani ngeni ba kamu ngalo kabomiu!

Ngeni ba ke seko solehana vanihamu ihamu tamu kiakia tana tahu de,

rongona ke chikai dani ngeni ba kamu sasahavi ma kamu ngangai.

26Ngeni ba ke seko solehana vanihamu tahuna ira na tinoni kara livu kaehamu,

rongona hamu amu vahai kalavata na propet lelekaha nira i sau te tumai na kukuadira mara livu kaera.”

Kamu sahavira hamiu hala

(Matiu 5:38-48; Matiu 7:12)

27Ma ia Jisas e kori vahai vanira laka ira de, “Minau u kori vanihamu ihamu tamu toha de mamu valinge talanaa, seisuge hamiu hala kamu sahavira, ma kamu talana vanira ira tara hae sekolihamu. 28Ma kamu nongia ia God ke talana vanira ira tara varogehamu, ma kamu nonginongi vania ia God vanira ira tara sekolihamu. 29Tina ke chikai ke davaa chikai tabana na matamu, mo ko sau vani lakaa ke davaa tabana chikai. Tina ke chikai ke laua na pipisimu, talasangaa ke taha kolua na sotemu. 30Tina kara nongia siki omea tatamu ko talasangaa vanira bamu, mi tahuna chikai ke taha voloa siki nimu omea mo ko mui na nongi visu lakaa. 31Ma kamu agosi vanira ira na tinoni na omea vahai ihamu tamu ngavina ira kara agosi vanihamu.

32“Tina vahai kamu sahavira bamu ira tara sahavihamu, mui padaa ia God ba ke peluhamu matena. Matengana seisuge ira na tinoni tara goni savi ara sahavira bamu ira tara sahavira lakamu. 33Me tina vahai ihamu kamu talana vanira bamu ira tara talana vanihamu, mui padaa ia God ba ke peluhamu matena, rongona seisuge ira na tinoni sekoseko ara vahai lakamu ia. 34Me tina vahai ihamu kamu sau luhia siki omea vanira ira tamu hanaa ngeni ba kara tuhu visu vanihamu, mui padaa ia God ba ke peluhamu matena. Matengana seisuge ira na tinoni sekoseko mara saua nidira tamani vanira lakamu ira na tinoni sekoseko, rongona ira ara hanaa ngeni ba kara tuhu visu kodea i bukena. 35Ma kamu toba talana vanira hamiu hala, ma kamu tihisia na talana vanira. Ma kamu saua nimiu tatamani ma kamu basia na nongi hani tutuhuna. Tina kamu agosi vahania nia, ma ia God ba ke sau vanihamu na pepeluna leho, ma kamu ni lia na dalena God Picha Kae, matengana ia God e talana vanira ira na tinoni sekoseko mi ira tara teha na kama kaea ia. 36Ma kamu vaisahavihi vahai ia God na Tohamiu te sahavihamu.”

Mui pedera ira na tinoni

(Matiu 7:1-5)

37Ma ia Jisas e kori vahai soha de, “Kamu mui na pedeana kesana na tinoni, me ke ni teha ia God na pedehamu. Ma kamu mui na rotasira kesana na tinoni, me ke ni teha ia God na rotasihamu. Ma kamu kori kenihua nidira ruri ira kesana na tinoni, me ke ni kori kenihua ia God nimiu ruri. 38Ma kamu vatasa vanira ira kesana na tinoni, ma ia God ngeni ba ke vatasa vanihamu lakamu. Ngeni ba ke vatasa vanihamu vahai na danga ni kei te danga me muala matana. Ma na lehoana vahai na vatasa tamu sau vanira ira kesana na tinoni, ia ngeni ba ke vahai soha na dangana ia God ngeni ba ke sau vanihamu.”

39Ma ia Jisas e kori vanira chikai na kori titihila. Me kori vahai de, “Na tinoni dokodoko e utu vania ke naho sala vani lakaa chikai na tinoni dokodoko, me tina ke vahai ia, mi koera kode ngeni ba ko ruchu sivo tana mao. 40Me utu vani lakamua ke chikai na tinoni te sasani ke manasa liungia nina tinoni toto manasa. Mi ira tinoni tara kodesia nidira sasani ngeni ba kara manasa tuhutuhu kolu nidira tinoni toto manasa.

41“?Me vahai vei ovu morosi bamua hoe na lobolobo volo tana matana tasimu, mo teha na morosia na kubu ni hai te toha lalona na matamu tovosi? 42Mo ko kori vahai vania tasimu de, ‘Tasigu, ko tala hoe mu ku poka chonia na lobolobo te toha tana matamu.’ ?Ba ko teha na vahamaa na kori vahai vania na tasimu ia seisuge te totoha vata na kubu ni hai tana lalo ni matamu? !Ihoe na vanga tuliuliu! Ko hida ko taha choni luhia na kubu ni hai lalo matamu me ke ni moro marara luhi matamu, kode mo ko hanaa taha chonia na lobolobo tana matana tasimu.”

Na hai ma na vuana

(Matiu 7:16-20; 12:33-35)

43Ma ia Jisas e kori vahai lakamu de, “Na hai talana e utu ke livu vuana seko, ma na hai seko e utu ke livu vuana odo. 44Visa kode lalaka na hai ngeni ba kamu hae vago nohaa tana vuadira. Me utu kamu pichua na vuana fig tana halo kakaruha, me utu kamu pichua na grep tana asikee. 45Na tinoni talana e agosia na omea talana te dangalia na tobana. Ma na tinoni sekoseko e agosia na omea sekoseko te dangalia na tobana. Na mangana tinoni e koria na hua te dangalia tana lalona tobana.”

E ruka na tinoni ara ko loho vale

(Matiu 7:24-27)

46Ma ia Jisas e kori vahai lakamu de, “?Me vahai vei mamu solou nau ‘Taovia, Taovia,’ mamu teha agosi taonia na omea nira tu kori vanihamu nau kamu agosia? 47Inau ngeni ba ku kori lenga vanihamu nina naunau na tinoni te mai tatagu nau me valinge vagoa me toha taonia nigu valagu nau. 48Ia e vahai na tinoni te loho vale, te helia na pari me totu sivoa na tuhuruna tana marahova. Tahuna te laba na obo me tavelia, me utu na vutiana rongona na tinoni te loho odoa vale nia tana marahova. 49Ma na tinoni te valingea nigu valagu nau me teha na toha taonia, ia e vahai na tinoni te lohoa na valena te teha ngachi. !Mi tahuna te laba na obo me tavelia valena, me tavuti me seko kode kalavata!”

Actualmente seleccionado:

Luk 6: mln

Destacar

Copiar