Luk 5

Ia Jisas e solora hana duli luhi nira

(Matiu 4:18-22; Mak 1:16-20)

1E chikai na dani tahuna ia Jisas te tuu lilihina na tasi i Galili#5:1 Ara soloa na tasi i Galili tana asana Genesaret kesana tahu., mi ira danga na tinoni ara vunguli talihu labaa ia ma kara ni valinge vataa na valaguna ia God. 2Me hae dia ia e ruka na vaka pepechi tara raga datoa ira na tinoni pipiko tana lihilihi ni tasi mara basiaa na vaka koera nia mara kajaa nidira vuho nira. 3Ma ia Jisas e sahe tatana chikai vidakodira na vaka pepechi koera nia, na nina vaka ia Saemon, me nongia ia ke suha dia levu tasi. Ba, me tohotuu sivo ia Jisas tana lalona na vaka nia me sasanira visa kode na tinoni tara toha lilihi.

4Mi tahuna te kode ia na valagu me kori vahai vania ia Saemon de, “Ko vose diaa tana gouna ma kamu choni sivoa nimiu vuho ma kamu vuhoa siki cheche.”

5Me valagu ia Saemon me kori vahai vania de, “Taovia, ami tovo nohaa lohami tana puti matadu nia mami teha vuhoana siki cheche. Mi tana rongona nimu kori hoe minau ngeni ba ku choni sivo lakaa na vuho nira.” 6Mi tahuna tara agosi taonia ira nina kori ia Jisas, mara tangomana ira na vuhoana e danga na cheche me tuturiha na vuho nira na tarochi. 7Ba, mara alo diara nidira tinoni tara ago kolura tana rukanina vaka pepechi nia, mara mai mara vani dangaa kokolu koera na vaka koera mara ko maravi kodea kara ko lupi.

8Mi tahuna ia Saemon Pita te haea na omea te laba vahai nia, me sivo tuturu vania ia Jisas me kori vahai vania de, “Taovia, ko mui mai lilihigu, rongona inau na tinoni tu goni savi.” 9Ia Saemon e kori vahai rongona ia ma nina papi nira ara sola tara makai rongona te danga solehana na cheche tara vuhoa ira. 10Mara ko makai lakamu na tinoni pipiko koera, ia Jemes ma ia Jon, na dalena koera ia Sebedi.

Ma ia Jisas e kori vahai vania ia Saemon de, “Ko mui hoe na matahu, rongona e tuu ngeni de me ke dia hoe ngeni ba ko vuho tinoni.” 11Mara raga datoa lodira vaka pepechi i lilihi mara basiaa visa lodira omea levo mara bukea ia Jisas.

Ia Jisas e vani maurisia chikai na tinoni te hadoa na mudo

(Matiu 8:1-4; Mak 1:40-45)

12Me tahuna ia Jisas te toha tatana chikai na vera me laba tuhua ia chikai na tinoni te hadoa na mudo, me laba na tinoni nia me choni tuturu me chuporu vania ia Jisas me ngangaisia me kori vahai de, “Taovia, tina ko tala kiki hoe, mo ko vani maurisiu mo ko malesiu nau.”

13Ia Jisas e chibeli dia tinoni nia, me kori vahai de, “Inau u maoni. !Ko male!” Me laba taora me dia choni na mudo nia. 14Ma ia Jisas e kori susuliha vania tinoni nia ke mui na kori lenga vania ke chikai. Me kori vania ke dia tatana na tinoni ni kere me ke chirohia kokorana, me ke saua na kere vahai tana nina keja ia Mosis ke ni tihisi lengaa tana matadira na tinoni kode te male na kokorana.

15Seisuge te vahai ia, na kokorina tana rongona ia Jisas ma na hua te agosia ia e tangi talihu laba me vahania visa na tinoni mara mai kode tatana ia Jisas, matengana tara ngavina valingea nina valagu ia me ke vani maurisira. 16Mi kesana tahu, ia Jisas e dia tovosi na nonginongi tana talu mangu.

Ia Jisas e vani maurisia chikai na tinoni te lohu

(Matiu 9:1-8; Mak 2:1-12)

17Chikai na dani tahuna ia Jisas te sasanira ira na tinoni tana lalona chikai na vale, mi kesana na Parasii ma na tinoni toto manasa tana nina keja ia Mosis ara toha lakamu tana vale nia. Ira ara vota mai tana vera nira i Galili mi Jiudia mi tana vera leho i Jerusalem. Ma na susulihana Taovia e toha tatana ia Jisas me ke ni vani maurisira ira na tinoni oche.

18Mara laba mai kesana tinoni tara vou mai e chikai na tinoni te lohu kolua na mihena mara tovoa kara vou sahe vania ia Jisas. 19Me utu, rongona te danga solehana na tinoni lalona me utu na taha saheana. Ba, mara vou datoa tana vovotuna na vale nia mara pokaa na kokopana mara lelu sivoa tana hana tuhu te tuu ia Jisas.

20Mi tahuna te hae vagoa ia Jisas nidira dodonu tinoni nira nia, me kori vahai vania na tinoni lohu nia, “So, u kori kenihua nau hamu seko hoe.”

21Mi ira na tinoni toto manasa tana nina keja ia Mosis mi ira na Parasii nira ara tuturiha na vaikorivanihi tovosi mara kori vahai de, “?Isei nomu tinoni de, te kori sekolia ia God? Ia God bamu te hanaa kori kenihua hana seko na tinoni.”

22Ma ia Jisas e hanaa na papadadira me gesuara, “?Vahai hamu vei amu tamania hamu na papada vahai nia tana tobamiu? 23Tina vahai ku kori vahai nau de, ‘Nau u kori kenihua hamu seko hoe,’ ba kamu utu hamu na morosia. Me tina ku kori vahai nau de, ‘Ko tuchau mo ko didia,’ mihamu ba kamu morosia. 24Mi tana tahuna de nau ba ku tihisi lengaa inau na Dalena Tinoni tu tamani susuliha tana pari de ke ni kori kenihua hana seko na tinoni.” Ma ia Jisas e pililiu me kori vania na tinoni te lohu nia, “!Ko tuchau, mo ko kasoa na mihemu mo ko visu i veramu!”

25Me lovo tuu chikai na tinoni nia tana matadira visa kode na tinoni me tahaa na mihena me visu i verana, me livu kaea ia God. 26Mi ira ara makai kodea me lehosira na matahu mara livu kaea ia God mara kori vahai de, “Na omea leho taengana nira ta haera hita i ngeni de.”

Ia Jisas e soloa ia Livae

(Matiu 9:9-13; Mak 2:13-17)

27Mi bukena tana tahu nia, me dia ia Jisas me haea chikai na tinoni taha takisi, na asana ia Livae, te tohotuu tana nina vale ni taha takisi. Me kori vahai ia Jisas de, “Ko bukeu nau.” 28Me tu chau ia Livae me livu basia kodea visa nina ago me bukea ia Jisas.

29Ma ia Livae e agosia chikai na hahani leho i valena vania ia Jisas. Me danga lakamu na tinoni taha takisi ma na tinoni tovosi tara mai hahani koludira. 30Mi ira na Parasii kolu nidira tinoni toto manasa tana nina keja ia Mosis nira ara tu mara tai matadira hana duli nira ia Jisas, mara kori vahai de, “?Amu vahai hamu vei mamu hahani mamu inu kolura ira na tinoni taha takisi mi ira kesana tinoni lakamu te tangi sekoseko na kokoridira?”

31Ma ia Jisas e valagu vanira me kori vahai de, “Ira bamu na tinoni tara oche ta kara hanaa dia haeana na tinoni tataru, me teha siki tinoni tara teha na oche. 32Inau u teha mai na solora ira tara hoto na sasahadira, mu mai nau na solora ira hana tara toha tana sasaha seko ma kara ni leleo basiaa nidira seko.”

Ara gesuaa ia Jisas tana rongona na toha ni nonginongi ma na teha hahani

(Matiu 9:14-17; Mak 2:18-22)

33Me kesana tinoni ara kori vahai vania ia Jisas de, “Ira hana duli ia Jon mi ira hana duli ira na Parasii ara toha ni nonginongi ma na teha hahani, mi ira hamu duli nira hoe ara toha ni hahani ma na inu bamu.”

34Ma ia Jisas e valagu vanira me kori vahai de, “?Vahai vei, e talana tina kamu livura ira tara mai tana kabu ni Livusai nia kara toha ni nonginongi ma na teha hahani tahuna na tinoni tauha vaolu nia te toha kolura? !E teha talana! 35Mi ngeni ba ke laba na tahuna kara mai taha chonia na tinoni tauha vaolu nia, mi bukena ma kara hanaa ira na toha ni nonginongi ma na teha hahani.”

36Me tuu ia Jisas me kori vanira chikai na kori titihila me kori vahai de, “E utu na garua na kaleko tuali kolu na busu ni kaleko vaolu. Me tina ke vahai ia, ngeni ba ke sekoli voloa ia na kaleko vaolu nia. Ma na busu ni kaleko vaolu nia e utu ke vu jovo kolua na kaleko tuali nia.”

37Me kori titihila laka ia Jisas de, “Me teha lakamu chikai hanaa na dora sivoa na vuaeni vaolu lalona na lasa kevukevu#5:37 Ira ara agosia na lasa kevukevu tana kevu ni nanigoti. tuali, rongona tina ke vahai ia na vuaeni vaolu nia ba ke vahania na lasa nia ke tarochi. Me ke tareo volo na vuaeni nia me ke seko. 38Me teha vahai ia. Na vuaeni tara vasangina agosia, ngeni ba kara dora dia nomua tana lasa kevukevu vaolu. 39Me teha lakamu chikai na ngavina inuviana na vuaeni vaolu bukena te inuvia na vuaeni tuali, rongona te padaa ia na vuaeni tuali te inu odo.”

Actualmente seleccionado:

Luk 5: mln

Destacar

Copiar