MATHE 6

Pang" Thoug Byid: Gam Da" Khyoo: Jhoug" Byid: Zi

1«Subi" myang baja" ga: nyangnu" shid khoin" moo nanu" myonhoo: sho: da" moo" ri azei: wa shid re" zed" nyid ge'. Houg: su" anghoid rigi Mougkhung: tho' moo nyid da" nanu" nya: pho, jang" mo aphoug" ri yo" yu goo" wa zi anghoid.

2«Nang alu: kaid nghoid rigi Subi" coung" byid: zi yo" yu baja" ein:- tarha" jung joem mo:- khyoo: kang" nooyoo moo we' ayid void da" byu yi yhangti"- re" shid khoin" moo laboo" amoid nhang. Nanu" ri ngoo jhug jhug tid zi gi houg: su" koid: mo, gi nyang: nya: aphoug" ri yo" yu boem bye. 3Nang alu: byid: nghoid rigi re" lo, yo lo, koid: da" moo" ri lo, koung" lo, ri asi nhang. 4Houg: su"- nang alu: byid: da" moozoo"- hang" amyang ase' jang moo nghoid nyid ri hang" amyang ase' da" joyoo ri myang se' da:- re" phoo gi nang ri doem tau" byid: wa zi nghoid.

Akyu" Mho' Da" Khyoo: Ri: Jhoug" Byid: Zi

(Luk 11:2-4)

5«Nanu" akyu" mho' nyid nghoid rigi ayid void da" byu yi yhangti" akoid: goo. Khasu" wim gari subi" nyanu" nyang: ri yo" myang goo" baja" ga: tarha" jung yi yo' khyoo: kang" shoem: moo cang yab' lho: Akyu" mho' wa zi nyangnu" vho: boem da. Nanu" ri ngoo jhug jhug tid ba- nyangnu" gi aphoug" yo" yu abye: go. 6Nang akyu" mho' nghoid rigi re" da" khoug: lhung yab khyoo vang lo" lho: khoem" ri we' myhed" pyam' wigi hang" we' amyang da" joyoo moo re" phoo ri mho' we' hang" we' amyang da" joyoo ri yo" myang da" re" phoo gi nang mho' ziri byid: wa zi nghoid. 7«Nanu" akyu" mho' nyid ri tarha" tungbau mo byu yi yhangti"- dang: pug apoug mho' goo. Khasu" wim gari dang: sheing" sheing: mho' nyid yoomo tam" gyoo: byid: wa yhangti" nyangnu" myid wim nyid boem ago". 8Nanu" amho' shi" ri lang" nanu" ci: vho: zi dangain"- nanu" da" nya: phoo Mangsoo gi se' nyid gu nghoid yoomo tarha" tungbau mo mo, yhangti" amho' nyid goo".

9Houg: su" yoomo nanu" gi hid: su" ein: akyu" mho' ge'.

‹Mougkhung: tho' mo ngoonu" da" phoo Mangsoo we'. Re" myeing re" khyang" gyeungshang: nyid baja".

10Re" mungdain: we' ju" loo baja". Mougkhung: tho' moo nang nheig deig nyid yhangti"- myidjang: tho' moo we' re" nheig deig jang: bue" loo baja".

11Ngoonu" moo ca" nyid da" zoo: noem- khid" nyid" ngoonu" ri byid: we'.

12Subi" ngoonu" ri shoid' da" yooboo-

ngoonu" khyoid pyam' byid: yhangti"- ngoonu" da" yooboo ri we' khyoid pyam' byid: we'.

13Ngoonu" ri jhu' phyo' jang" moo ayhi: nhang: lo za:

yu deizoo: lo, mo khyoid yu we' o". ‹Coid doem: boo" doem: ri vhoeb da" akhang" yo"- phung" yoeb myonhoo: ngilang: gi Apyaid atoo: nang moo za: dajo, jo, baja" o"- Amen.›

14«Khasu" wim gari sube" da" shoid' vhang: yooboo ri khyoid pyam' byid: nghoid rigi Mougkhung: mo nanu" da" nya: phoo we' nanu" shoid' vhang: da" yooboo ri khyoid pyam' byid: wa. 15Sube" da" yooboo ri ayo" khyoid' pyam byid: nghoid rigi nanu" da" nya: phoo we' nanu" shoid vhang: da" yooboo ri khyoid pyam' pyid: wa zi anghoid.

Yesu Zoo: Noem Jang" Da" Khyoo: Jhoug" Byid:

16«Nanu" zoo: noem zeung: nyid nghoid rigi ayid void ci: da" byu yi yhangti"- nanu" myonhoo: ashoo: goo" sube" shid khoin" moo nyangnu" zoo: noem yo" zeung: zi myang baja" ga: nyangnu" gi nyang nya: da" myonhoo: ri mhau: shoem nhang: ago". Houg: yoomo yoo" eung: da" akyu" ri nyangnu" yo" yu boem bye. 17Nang zoo: noem zeung nyid nghoid rigi myojid" wi ayo" myang da" nya: phoo mo led lho: hang" we' asi wa shid re" myo, ced" xam: kyo' nyid ge'. 18Houg: gi byu shid moo anghoid- hang" we' amyang da" joyoo moo nyid nyid da:- Re" pho, shid khoin" moo za: nang zoo: noem zeung: da" khyoo: myang nyid wa nghoid wi gi hau: hang" amyang da" joyoo ri yo" myang da" re" phoo gi nang ri doem tau" byid: wa zi nghoid.

Ngei Sheing: Jo, Nu" Khayoo: Young: Too" Ca" Da" Khyoo:

(Luk 12:33-34)

19«Nhau: yo" zo: wi zo: shoin, lho: khoug" mo, yo" khau" baid' thoid yu lo" se' da:- myidjang: tho' moo nanu" da" ziyoo jonu" ri ayoung: too" goo. 20Nhou: yo" zoo ayo" zo: shoin,- khoug" mo, we' ayo" baid thoid, ayo" khau" lo" da" Mougkhung: tho' moo nanu" da" ziyoo jonu" ri young: too" ge'. 21Khasu" wim gari re" da" ziyoo jonu" jo, jang" moo re" da" nheigloem: we' jo, yoomo nghoid.

Gung Du: Da" Boobang

(Luk 11:34-36)

22«Hau: myojid" gi re" da" gung du: mo myibung: nghoid nyid. Re" da" myojid" soo" soo" gyeung: nghoid rigi re" da" gung goin" bang nyid. 23Re" da" myojid" age nghoid rigi re" da" gung goin" moug: coid' nghoid nyid. Nang moo bo da" bidbang gi moug: coid bue" byug nghoid rigi hau: moug: coid' gi khayhi' thu: no, jo, wa lha".

Phoo Mangsoo Yo' Moug Myid Da" Yoo" zoo: Yoo" Shug Khyoo:

(Luk 16:13; 12:22-31)

24«Hang" nghoid loug we' Aseing: eig youg jang" moo lang: jhang yo" vang wa zi anghoid. Nyang: gi dayug ri ngheing" lho: dayug rigi jheddab wa zi nghoid. Houg: su" anghoid lang" gi dayug rigi vho: lho: dayug rigi anoug angei koid: zi nghoid. Nanu" gi Mangsoo ri we' moug myid ziyoo jonu" ri we' dage" lang: jhang yo" vang wa zi anghoid.

25«Houg: su" wigi ngoo nanu" ri tid da" zigi cizoo: wa cishau" wa dei nyid wa shid re" civoid wa khasu" koid: wa ein: gung du: shid re" myid amyoo: goo. Hau: kang: so' gi zoo: noem tho' moo gung du: gi byime tho' moo je phau" zi anghoid. 26Moug: moo dang: yen" da" ngho' joem ri yu" yu" ge'. nyangnu" gi atei: ashab' sadeig moo we' akaid too"- nghoid loug mougkhoung: mo nanu" da" nya: phoo gi ngho' joem ri we' zoo: noem zho" nyid da. Nanu" gi ngho' joem tho' moo je gyi: anghoid goo" la". 27Nanu" mo khayug nghoid loug we' nyang: nya: da" apyaid' sheing: baja" ga: zain nyid dajhi' koo: yo" loung: kaid: go" wa la".

28«Hau: lho: byime shid re" ci: wim myid myo: nyid go" la". dain" yoo mo myi vhoeb' bain: joem khasu" youg gyi: lo ziri myed yu" ge'. 29Nghoidloug ngoo nanu" ri tid da" zigi Sholumon lang" gi nya: myonhoo: ngilang: dangain" moo bain: dakyang: yo" lhang" amoin: yi. 30Ade: loem" jeung" da" mo, we"- akhid" nyid" te: youg jo, lho: nab' yo nyid" gi myi: khyoem, moo du" zei pyam' wa da" vu, fu myo, ri lang" Mangsoo houg: su" zho" jhoug coung: goin nghoid rigi hau: tho' mo nanu" ri je zho" jhoug coung: goin wa anghoid goo" la".

31«Houg: su" nghoid yoomo nanu" gi myid myoo: ung: loug zoore" ‹ngoonu" cizoo: wa cishug wa civoid wa lha". ein: wigi atid nyid goo"›. 32(Khasu" wim gari tarha" tungbau mo mo, we' hau: gu: dangain" ziri sho: nyid ago") houg: dangain" ziri nanu" vho: nyid zigi mougkhoung: tho' mo nanu" da" nya: phoo gi se' nyid gu nghoid. 33Nanu" koem gi nya: da" mungdain: yo' nya: da" deung byeung" khyoo: ri xang: shid" sho: nyid ge'. houg: lang" hau: zi dangain" nanu" ri poug lung: byid: wa nghoid. 34Houg: yoomo nab, yo nyid" shid re" myid amyoo: goo"- nab, yo nyid" gi nya: shid re" kyi" khyeug wa zi nghoid. Khid" nyid" kyi" khyeug zigi khid" nyid" shid mo gi" bye.

Actualmente seleccionado:

MATHE 6: LCL

Destacar

Copiar