MATHE 4

Yesu Jhu' Phyo' Shau" Da" Khyoo:

(Mar 1:12,13; Luk 4:1-13)

1Houg: lang" yu satan: jhu' phyo' zi shau" baja" ga: gyeungshang: da" Venyi: gi Yesu ri dain pyoid' yoo: khyoo: shu" lam" loo" bye. 2Bid' nyid myid: xi: nyid" voem: ashau" zoo: loo: lang" nyang: gi zoo gye" yoid nyid bye. 3Hau: uri jhu' phyo' su: yu satan: ju" re" wigi «Nang Mangso da" nya: zoo: nghoid deung rigi he: lugzeing ri zooyho' bue" loo we' ein: tid we'» ga: tid.

4Yesu gi «Byu gi zooyho' yo' za: kangso' dei nyid zi anghoid. Mangso mungdang: bain sho' yo' kangso' dayo" dei nyid» ga: tid.

5Houg: lang" jhu' phyo' su: yu satan: gi Yesu ri gyeungshang: da" voogung khyoo shu" vang lo" lho: akyu" mho' yhoemkhung: myhang: thang jang" moo do, loo" nhang: lho: wigi 6«Jhoem: mougsoug" moo

re" khyid: lug zeing moo azang" baja"-

nya: moug: lagyoo: yi da" lo, wigi vu, yu wa ga: tid to.

Nang Mangso nya: zoo: nghoid deung rigi hug: mo byam gyo" yu" we'›» ga: tid.

7Yesu gi «‹hug: re" da" Mangsoo ri nang yo" ca: yu" zi anghoid› ga: jhoem: mougsoug" moo lhid" to"» ga: doem phoug tu".

8Hau: thang: ri yu satan: gi Yesu ri gye" myang: da" boem tho' khyoo shu" do, lo" lho: Moug: myid mungdain: dangain" yo' hau: zi joem khayhi' yung" bang da" khyoo: ri dalheing: dam lo" toin" shid lho: wigi 9Nyang: ri «nang ngoori dajhi' goeb pid nghoid rigi hid: myang gu: dangain" ngoo nang ri byid: wa» ga: tid.

10Yesu gi yu satan: ri hid: su" ga: doem tid. «satan: we"- nga" jang" mo thu' loo" we'. Khasu" wim gari nang gi re" Mangsoo ri za: vhu" pid pid ca"- Cung" nghei byid: ca" ga: tid to" zi nang anghab yu" lha"» ga: phoug tid.

11Houg: lang" yu satan: gi Yesu jang" mo phang: loo" bye. Hau: thang: ri mau lagyoo: yi Yesu ri re" doo" zho" boem.

Yesu Galile Mung" Moo Moo" Zei: Shid" Da" Khyoo:

(Mar 1:14,15; Luk 4:14,15)

12Baptism sara: Yohan ri myheig bye: ga: da" khyoo: ri Yesu shau" gyoo: lang" nyang: gi galile mung" khyoo: vang lo". 13Nyang: gi Nazared voo moo anyid loo: za: Zebulon yo' Nabthali mung" mougkyoo"- Galile mung" yam mo Kapernaum Yesu da" voo moo lo" nyid nyid. 14Hid: su" bue" loo wa da" khyoo: ri Lapi: Esaia tid to" dang: deung loo wa shid re" nghoid. Lapi: Esaia gi

15«Zebulon yo' Nabthali mung" moo

gyid nung" yam- Yodan gyid lang thei: tab cang

Tungbau byumyu" yi nyid da"

Galile mung.

16Moug coid khoug: moo nyid da" Byumyu" gi

bidbang zeing ri myang boem wa.

shid: zau: da" bid shoem: yoeb moo zhung: jo, mo, da" atho' moo

bidbang ju" ri" wa» ga: kho" kyo" to.

17Hau: ayo, moo Yesu gi «Mougkhung: mungdain: ju" ri bye yoomo nanu" da" yooboo mo nheigloem: thid' loo ge» ga: Tarha" kho" shid" bye.

Yesu Ngoodo, Kuang Mo, Myid: Yug Ri: Khe: Yu Da" Khyoo:

(Mar 1:16-20; Luk 5:1-11)

18Akhid" Galile thoem" yam moo so" lo da" uri nya: mang: yo' nya: nhung" tang nghoid da" Petru ga: da" Simon yo' nya: nhung" Andre: eig yug goin du" yen" lang" zi Yesu lo" myang. Khasu" wim gari nya: eig yug gi ngoo: kuang yen" su: eig yug nghoid. 19Houg: lang" Yesu gi «Nga" thang: cang ge' re" eig yug ri Byu cang kuang da" byu koid' wa» ga: tid. 20Houg: lang" jang: nya: eig yug gi goin ri she: pyam' too" kho' lho: Yesu da" thang: moo bo cang loo" bye.

21Houg: mo doem xo' so" lo" ri gootu: dazoem" Zebedi da" nya: zoo: tang: Yaku yo' nya: nhung" Yohan gi nya: phoo yo' dage" lhid' khau: moo goin pho: nyid lang" zi lo" myang lang" nya: eig yug ri we' dalheing: dam khe: shu" loo" bye. 22Hau: tang: we' lhid' yo' nya: phoo ri she: pyam' too" kho' lho: Yesu da" thang: moo bo cang loo" bye.

Yesu Jhau" Byid: Khyoo: Yo' Noo Mo, Ri: Ge Loo" Nhang: Khyoo:

(Luk 6:17-19)

23Hau: lho: Yesu gi Galile mung" goin" cang koem" yen" zoore"- nyang: bang: da" Tarha" jung yi moo cang jhoug" byid: yen" wigi hau: mungdain: da" ngeibu: lu dang: cang kho" yen" ziyo' mung" byu yi da" noo phyoo" aja: ja:- nooboug: aja: ja: ri zheung: ge loo nhang: yen. 24Houg: yoomo Yesu da" khyoo: ri Suri mung" goin"- lei: khyoug: su phoid nhami lhupyo' nhang: lo" boem wigi Gung du: angei apyoo: mo, noo phyoo" aja: ja: shau" mo, yo' yu dab deizoo: dab mo, ngho' baid baid mo, yo' khyid: joem: lo, joem: shid: mo, myoo" sho' nya: jhang shu" ju" re" boem ri dangain" ri lhoem: ze: ge lho: nhang: kaid bye. 25Houg: yoomo Galile mung" yo' Dekapoli mung"- Yerusalem voogung yo' Yuda mung" goin"- Yodan gyid lang thei: tab' voo khyab' daxi: mo mo, Byu ajoem atung: bang: gi nya: jang" moo bo cang yen.

Actualmente seleccionado:

MATHE 4: LCL

Destacar

Copiar