मति 6

दान देवेके बारेमा सिछा

1येसुजि कहते गेलसि, “चेतले रहिह, तोहरा मन्‍सावानिके देखावेके तहिँया कथियो काम झिन करिह। यगर वसने करबह जउँ स्‍वरगमा रहलाहर तोहार पितासे किहो इनाम फेनि नाहिँ पउबह।#मति २३:५

2 “जब तोहरा गरिबवाके किहो देबह कपटियानि नहिँया हाला झिन करिह। हुनुका त मन्‍सावानिसे प्रसंसा पावेके तहिँया सभाघरवाह हसे गलियावाहमा धुतुहा बजोसइ। मुइ तोहराके सदियो कहबहिँ, हुनुका यापन इनाम पासकले बडइ। 3तुइ ककरहुँके किहो देइखुनि, तोर दहिनि हथवाक देलि लबडि हथवा थाह झिन पवइ। 4ताकि तोर देलि गुप्‍तमा हतइ हसे तोर पिता जुने गुप्‍तमा तोरके देखइ बडसि, हुने तोरके इनाम देबसि।

परथानाक बारेमा सिछा

(लुका ११:२-४)

5 “तोहरा परथाना करइखुनि कपटियानि नहिँया परथाना झिन करिह। हुनुका त सभाघरवाह हसे गलियावाक चोकवामा ठडियाके याको मन्‍सावाह देखइ कहके परथाना करसइ। मुइ सदियो तोहराके कहबहिँ, हुनुका यापन इनाम पासकले बडइ। # लुका १८:१०-१४ 6बाकि जब तुइ परथाना करबहि, यापन कोठवा भितरा जइसि हसे केउरिया लगाके गुप्‍तमा रहलाहर तोर पिताके परथाना करसि, तब गुप्‍तमा देखलाहर तोर पिता तोरके इनाम देबसि।

7 “तुइ परथाना करइखुनि अयहुदियानिक नहिँया बरबरइते परथाना झिन करसि, केहकेकि यसने परथाना करले परमेस्‍वर सुनबसि कहके हुनुका विचार करसइ। 8बाकि तुइ हुनुकर नहिँया झिन हखसि, केहकेकि तोहरा मङलेसे यगाहे तोर कथि चाहिँ बडइ कहके तोहार पिता जनले बडसि। 9उहेसे तोहरा यसके परथाना करिह:

‘हे हमार स्‍वरगमा रहलाहर पिता,

यपनहुँक नाउँ पवितर हखइ। # ६:९ यपनहुँक नाउँ पवितर हखइक यरथ जम्‍मे जन यपनहुँके यादर करइ, केहकेकि यपनहुँ पवितर बडहुँ।

10 यपनहुँक राज यवइ,

यपनहुँक इछा स्‍वरगमा पुरा भेल नहिँया इअ धरतियामा फेनि पुरा हखइ।

11 हमार दिन-दिनक चाहि लगना जेउना याजु फेनि हमराके देहुँ।

12 हमार अपराधसभ छमा कर देहुँ,

जसने हमरा फेनि हमार विरोधमा पाप करलहरानिके छमा देले बडहुँ।

13 हमराके परिछासे बचोहुँ,

बाकि दुस्‍टसे हमराके रछा करहुँ।’

[केहकेकि राज, सक्‍ति हसे महिमा सबदिन यपनहुँक हखइ। आमेन।] #६:१३ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्‍करनमा कोस्‍ठमा राखल बडइ।

14 “यगर तोहार विरोधमा पाप करलहरानिके छमा करबह जउँ, स्‍वरगमा रहलाहर तोहार पिता फेनि तोहराके छमा करबसि। # मरकुस ११:२५-२६ 15यगर तोहरा मन्‍सावानिक पाप छमा नाहिँ करबह जउँ, तोहार पिता फेनि तोहार पाप छमा नाहिँ करबसि।

उपासक बारेमा सिछा

16 “हसे जब तोहरा उपास रहबह, तब कपटियानि नहिँया मलिन मोहडा झिन देखोइह। केहकेकि हुनुका हमरा उपास रहल बडहुँ कहके मन्‍सावानिके देखावेके तहिँया यापन मोहडा मलिन बनोसइ। मुइ तोहराके सदियो कहबहिँ, हुनुका यापन इनाम पासकले बडइ। 17बाकि तुइ उपास रहइखुनि यापन मुडियामा तेल लगोसि हसे मुहवा धउसि, 18ताकि तुइ उपास रहल कहके याको मन्‍सावाह थाह झिन पवइ, बाकि गुप्‍तमा रहलाहर तोर पिता देखबसि हसे गुप्‍तमा देखलाहर पिता तोरके इनाम देबसि।

स्‍वरगक धन-सम्‍पति

(लुका १२:३३-३४; १६:१३)

19 “तोहरा यापन तहिँया इअ धरतियामा धन-सम्‍पति जामा झिन करिह, केहकेकि यहवाँ जामा करलि धन-सम्‍पतियाके किरवा खेसइ, किटवा नास पारदेतइ हसे चोरवाह चोराके लिगसइ। # याकुब ५:२-३ 20बाकि तोहरा यापन तहिँया स्‍वरगमा धन-सम्‍पति जामा करिह, जहवाँ किरवा हइने खेसइ कि किटवा नास हइने पारसइ हसे चोरवाह फेनि हइने चोरोसइ। 21केहकेकि जहवाँ तोर धन-सम्‍पति हसइ, वहवाँहिँ तोर मन फेनि हसइ।

22 “देहियाक दिवा त याखि हखइ। यगर तोर यखिया डउल बडइ जउँ, तोर जम्‍मे देहियामा पुरा इजोर हतइ। 23यगर तोर यखिया खराब बडइ जउँ, तोर जम्‍मे देहिया फेनि यन्‍हार हतइ। यगर तोरमा भेलि इजोरवा यन्‍हार हतइ जउँ, तब उअ झन बहुते यन्‍हार हतइ!

24 “कुनहुँ फेनि दु जन मालिकक सेवा करे नाहिँ सकबह। केहकेकि उअ एक जनके हेला करबिय हसे दोसरिके माया करबिय, नत उअ एक जनके यादर करबिय हसे दोसरिके हेला करबिय। वसने करके तोहरा परमेस्‍वर हसे धनक सेवा करे नाहिँ सकबह।

फिकरि झिन करिह

(लुका १२:२२-३१)

25 “उहेसे मुइ तोहराके कहबहिँ, तोहरा यापन प्रानक तहिँया कथि चिजु खाएके, कथि पिएके हसे कथि पेहरेके कहके फिकरि झिन करिह। कथि प्रान जेउनासे हसे देहिया लुगाफाटासे बडके हइने हखइ त? 26यकसवामा उडियाहि चेरइयानिके हेरह। हुनुका नत बिया छिटसइ, न यन्‍न कटसइ हसे न बखरियामा बटियोसइ ताफेनि तोहार स्‍वरगमा रहलाहर पिता हुनुकाके खियोससि। कथि तोहरा हुनुकरसे फेनि बहुत मोलक हइने बडह? 27तोहारमधे यसनुक कुने बडह जुने फिकरि करके यापन आयुमा इचिका समय फेनि बढावे सकबह?

28 “तोहरा लुगाफाटाक तहिँया केहके फिकरि करसह? मइदनवामा फुलइलि लिलि फुलवानिके हेरह, हुनुका कस्‍के बढसइ। नत हुनुका काम करसइ न लुगा बिनसइ। 29बाकि मुइ तोहराके कहबहिँ, सोलोमन रजवा यापन जम्‍मे महिमामा फेनि इअ एगुडा फुला नहिँया हइने कछाइल रहलिय।#१ राजा १०:४-७; २ इतिहास ९:३-६ 30जुन घसवा याजु बडइ हसे यनदिने यगियामा फकेतइ, यगर यसनुक घाँसके त परमेस्‍वर यसके कछोससि जउँ, अरे इचिके विस्‍वास भेल मन्‍से, कथि हुने बहुते तोहराके नाहिँ पेहरोबसि त?

31 “उहेसे तोहरा कथि खेबहु, कथि पियबहुँ हसे कथि पेहरबहुँ कहके फिकरि झिन करिह। 32केहकेकि अयहुदि मन्‍सावाह मतरे यकर खोजि करसइ। इअ जम्‍मे चिजुवा तोहराके चाहि लगसइ कहके स्‍वरगमा रहलाहर तोहार पिताक थाह बडइ। 33बाकि तोहरा पहिला परमेस्‍वरक राज हसे हुनेक धारमिकताक खोजि करिह हसे इअ जम्‍मे चिजुवा फेनि तोहराके दियतइ। 34उहेसे तोहरा यनदिनेक तहिँया फिकरि झिन करिह, केहकेकि यनदिनेक फिकरि उअ यपनहिँ करबिय। याजुक दुःख याजुक तहिँया बहुत बडइ।”

Actualmente seleccionado:

मति 6: CTHR

Destacar

Copiar