Mateus 8

Ca quep xio pin tocwa wari' co ma' non caji nan

Marcos 1.40-45; Lucas 5.12-16

1Quiji' ca' ac cain na pacun Jeju. Mija nana wari' co ja' ja' nonon. 2Hwet ac con na wari' co ma' non caji nan. Lepra na wixinain ca caxi nucun. Pe torotop mi' ac con na, tomi' ac con na: Taramaxicon ne. Mo ta quep xio xim mapa' ma', taxi' inem pain ca quep xio taxi' mapa' ta non.

3An piri' iri nain micon ne, quep ac con na, tomi' ac con na: Param inain, xio pin ra ta non. Xio hap pin ac ca na, om pin con na caji nan.

4Tomi' ac con na Jeju: Taraju wet ne e'. Ta tomi' hwet momon oro wari' pain ca quep xio xim ca' me ta non. Hwet e' ron sacerdote co taramaja pe nain cote ne xiricon Iri' Jam ac con na. Noro rain cwere pain ca xio pin ta' ca' ac mon tara, mi' ac mon tara pain carawa ca tomi' capari' Moisés pain cara pane, pain ca tomi' xo' capari' con wari' co xio pin pain caji nan. Mi' ron pain, tom mi' ron pain Iri' Jam me ac mon tara. Tom tain' iri tarain ne, querec pin' ac quequem tara oro wari' pain ca xio nem ma', je pain ca querec hohot pin quem Iri' Jam ma' quem na ca tomi' con ma'.

Ca quep xio pin tocwa co taramaja mi' non taramaxicon nucucun oro soldado

Lucas 7.1-10

5-6Mao ac cain na Cafarnaum Jeju ma'. Wa' mao iri na ne, xut hwet ac con Jeju na taramaxicon nucucun oro soldado ma'. Romano na. Ma' 100 nana oro soldado co taramaxicon ne nonon. Tomi' ac con na: Taramaxicon ne. Caxi tamana na wari' ne co taramaja mi' e' napa'. Carama pe na, om ca meo mami' ca pain ca caxi tamana nucun. Terem' e' na, terem' pe nain xuru cain. Jain jain na pain ca caxi tamana nucun ta non.

7Hwet ton, quep xio ton ta ac con na Jeju.

8Om na ta Taramaxicon ne ac con na. Om ca ha' ne pain ca corom main xuru, xi awi ta' ta. Tomi' pira e' ron, xio tara ta e' ron. Xio pin ac ca tara. 9Tomi' ha' terem ca caxi nucun ta, taxi' ina. Win ne ca tomi' ha' pan toton oro taramaxicon ne ca', ma' nana oro soldado ne co tomi' ha' nanapa' quem, je cwerein parut. Mao rain i cain inon xucun, mao ac ca na. Hap ra ta ac ton na xucun, hap ac ca na quem. Ara rain i ca' ac ton na wari' ne co taramaja mi' e' napa', ara ac cain na quem na ca tomi' con ma'.

10Taraju iri nain i ma' Jeju ne, wa wa tamana ac con na, tomi' ac tococwa na oro wari' co ja' ja' nonon ma': Howa tamana napa' co cwa' ta! Tomi' iri'o' inuhu', om ca querec camain' ton win judeu ta' co an xiho' non pain ca howa nucun ta. 11Je ca tomi' xuhu' ca'. Mija tatara oro xucucun wari' co maqui' nanain oro xijein macan' pain pira. Cao' querec te wi xi', xao to ho' ac xucucun tara pain pana ca mam' cao' to wa pain pawin cain, pain ca taramaxicon pe ca Iri' Jam cwain, xao to ho' totoron hwanana nexi' Abraão con Isaque con Jacó. 12Oro judeu co wara tora' paxi' wawa pain cara pane iri nana ne, pain ca mama' tatarain pawin ca taramaxicon pe ca Iri' Jam paxi' wawa pane, wixicaracao' mi' ac tococwa tara pain ca jitacat tamana nein. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun ta na.

13Tomi' ac con na taramaxicon nucucun oro soldado Jeju: In mao rain xurum ta. Xio pin na wari' nem. Win ne ca howa mapa' ma' ac con na. Xio hap pin ac ca na wari' nucun ta.

Ca quep xio pin cocon oro wari' Jeju

Marcos 1.29-34; Lucas 4.38-41

14Mao ac cain na xiricon Pedro Jeju ma', querec ac cam na japinacon co caxi ma'. Terem' na, xi om ne ca xain ara cama ta. 15Quep ac cam na pain micam, xain xain om pin ac cama na. Tequi' pe ac cama na, ara mi' pan ac con na pain carawa ca cao' wa quem.

16Xo' um pin iri na ne, o qui' mija ac tococwa na con Jeju oro wari' co corom to ho' nonon caxicon jam. Tomi' e' na, hwerehwet ca' jujun e' na, hwerehwet ca' ac tococwa na. Quep xio quep xio pi' pin ac tococwa na oro wari' co caxi nana ma' quem. 17Quep xio pin iri tata ne, hwet pin ac ne na ca wara tomi' pe ca profeta Isaías cara pane. Ca' na ca tomi' pe nucun:

Cut ca' napari' pain ca caxi nexi'.

Quep xio napari' ta.

Ac i ma' na ca wara tomi' pe ca Isaías pane.

Oro wari' co ja' ja' xun paxi' nonon Jeju

Lucas 9.57-62

18Querec iri nonon oro wari' Jeju ne, pain ca to to mam' cocon ma', tomi' ac tococwa na co taxipa' ca ma'. Pan horoho mama' xin xijein cacarain com cain e' ac tococwa na. 19Om ca mama' querec caca, xut hwet ac con na wari' ma', co ca' na taxipa' nain ca xirao' nucun Moisés ma'. Tomi' ac con na: Taramaxicon co ca' na taxipa' capijacon Iri' Jam ac con na. Ja' ja' cara xim pain oro ca mao ta' ma ma' na ca tomi' con ma'.

20Tomi' ac con na Jeju: Noro rain oro carawa pain mi ma'. Ma' ma' xam' nain ca pi'am to nein. Noro rain oro me ma' quem. Ma' ma' xam' nain xirinain quem. Wata' iri na ne, pain ca Iri' Wari' ta' ca'#8.20 Pain ca Iri' Wari' ina ta ca Jeju pane, ac ca tomi' ta' ca na ira: Maqui' paxi' inain pawin, ane ac wari' ta' ne. Wata' co iri' taramaxicon ta, co wara tomi' pe ca Iri' Jam pane. Ca' na ca wara tomi' pe ca pata' pane: Main hwet turuhu' Iri' Wari' ne co to' witan xim nuhu' ta nuhu' pata' pane. To' witan ca' turuhu' pain ca caracat nuhu' ta nuhu' pata' pane, ac i ma' na ca tomi' ta' ca Jeju ira. , om napa' xirim ca pe xo' ta' ca' na ca tomi' con ma'#8.20 Tomi' mi' iri non pain ca om napa' xirim ca pe xo' ta' ca' con Jeju ma' ne, tomi' xo' ac i ca' paxi' non: Mo ta ja' ja' mapa', om terem xirim ca pe xo' ma. Win ne ca om pan capa' xirim ca pe xo' ta' ca' quem, ac i ma' paxi' na ca tomi' xo' con ma'. .

21Tomi' ac con na xucun ma', co taxipa' paxi' non ma': Wata' quem Taramaxicon ne ac con na. Ane na e' capa' pain ca in hwet cain' ton te ne. Mi' pin iri tara ne, an corom pe pin iri tain curucun pain manain pacun ne, ja' ja' ac xim tara. Ma ma? Ac i ma' na ca tomi' con ma'.

22Om na ta ac con na Jeju. Ja' ja' ho' ne pain xocori ca'. Oro win ma' ma co om howa nanapa' ma', co an xiho' nonon co cono' nana ma', wiricoco pan tatara co cut corom to pan nonon co cono' nana ta na ca tomi' con ma'.

Ca tomi' om pin cain camana' Jeju

Marcos 4.35-41; Lucas 8.22-25

23Maji ta ac ca na Jeju, piton pe ac cain na mam' horoho wa ma', ja' ja' ac cocon na co taxipa' ca ma' quem. 24Pan horoho pan horoho. Ane ane maqui' ac ne na camana' ca nuru mip tamana. Wap tamana na com ta! Moin' pin tain na mam' horoho nucucun com ira. Ane pi'am ca Jeju ne. 25Ho' querec xun ta ac caca na co taxipa' ca ma', ho' querec ac cocon na quem. To' witan xut ta Taramaxicon nuxut. Cono' pin xi' urut ta na ca merem caca ma'.

26Cain' cain' xihwe quem ac tococwa na. Para jin' tamana hwe ma' quem? Howa wijimain e' mahu' ra tata. Tequi' pe pin ac ca na, tomi' in pin ac cain na hotowa pain ca wap tamana nein com. Nuru nuru om pin ac ne na, tacana pe pin ac ne na com ma' quem. 27Wa wa ac cocon na. Cain' cain' ca co cwa' ne ta? Tomi' ha' ximao non oro carawa ra? Tomi' ha' non camana' pain com quem ra xucucun.

Ca quep xio pin tococwa wari' co corom to ho' nonon caxicon jam

Marcos 5.1-20; Lucas 8.26-39

28Pan horoho pan horoho, hwet pin iri nanain xijein cacarain ma' ne, je pain macaracocon oro wari' nein Gadara ma', hwerehwet qui' ac caca na wari' co corom to ho' nonon caxicon jam. Ma' 2 nana. Maqui' nanain oro manain pacun ca cut corom to tococwa co cono' nana ma'. Mana' tamana nana. Om ca wixicam ac tococwa. Moji'ac ca' taxipa' tata ira. Hwerehwet qui' iri nana ne, xuruxut cam' ac cocon na Jeju. 29Merem mip ac cocon na: Cain' cain' xim maparut quem Panxica Iri' Jam? Quep em' xim maparut pain ca om maqui' querec ne xec nein ca mama' jein xe xim caparut Iri' Jam ra, ac i ma' na ca merem nucucun.

30Cao' to nain i ma' caji mijac ma'. Mija na caji mijac. Iritocwinain ta. 31Jain jain ac caca na oro caxicon jam nucucun quem. Mo ta tomi' jein pin xim maparut, mama' jein caji mijac cain ac maparut tara. Corom hwet jein ta ac maparut tara, ac i ma' na ca merem nucucun.

32Mama' jein ta ac tococwa na. Hwerehwet ca' ac cocon na, corom hwet ac cacain na caji mijac ma', tamanain to pin ac ne na quem. Jein quiji' mama' ac nein na ca tamaja ne macan' ma', jein jein, wara ca' na com ma', pan corom mama' ac ne na, cono' cono' pi' pin ac ne na quem.

33Caram ma' co querec wet nanain caji mijac ma', jein mama' ac caca na. Tan' mama' iri nanain cidade ne, tomi' hwet ac cacain na ca ara ca Jeju ma', pain ca quep xio pin tococwa caram ma' co corom to ho' nonon caxicon jam ira. 34Maji con ta ac xucucun na, jein hwet ac cocon na Jeju. Hwet iri nonon ne, jain jain ac caca na, mao ra ta, paca' rain macaraxut ta ac cocon na pain ca tomi' mip cocon ma'.

Actualmente seleccionado:

Mateus 8: TBPN

Destacar

Copiar